詩篇 108章1節 到 108章13節   背景資料  上一筆  下一筆
有一種看法,認為詩篇tùi第一○八到一一○篇,這三篇是所謂「大衛詩歌」,意思是確認這三篇lóng是大衛所寫ê詩歌。原因是無論第五十七篇á是第六十篇,lóng有註明是屬tī大衛ê詩歌。Á這兩首詩篇koh kah這幾篇詩篇有關連。

Chit首詩篇是由兩首無仝ê詩歌合併做伙ê,第1到5節kah詩篇第五十七篇7到11節相近,而第6到13節kah詩篇第六十篇5到12節非常相近。前半部詩歌ē-sái講是teh歌頌上帝,而後半部詩歌是祈求上帝ê幫助,hō͘ in ē-tàng有力量對抗敵人ê侵犯。作者相信,只有óa靠上帝ê氣力,chiah ē-tàng贏過敵人威脅。咱無法度了解為甚麼會kā chit兩首無仝ê詩歌彙編做伙,真可能是因為當時以色列人民不時受tio̍h以東人kah非利士人ê侵犯攪擾,因為án-ne,kā頭前有用過ê詩歌koh再the̍h出來吟唱。

第1到5節,詩人表達了伊對上帝有堅定ê信心,無論tú-tio̍h甚麼狀況,lóng tio̍h用歌頌ê方式來o-ló上帝。第2節ê「我beh kā日頭mā喚醒起來」,其意是teh指早起起得非常早,天iáu未亮,日頭iáu無上升,詩人就已經起來歌頌上帝。Tī第4節提起上帝ê特點,就是有永恆ê疼,kah祂信實ê偉大,ná親像高天hit種ê大,hō͘人讚嘆,mā hō͘人敬畏。

第6到13節,chit段詩歌是teh祈求上帝拯救。Tī chit段詩歌中真清楚提起kúi-nā個族群,第8節提起瑪拿西、以法蓮等,chiah-ê lóng是屬tī北國以色列,而猶大則南國。瑪拿西是約旦河東岸,而以法蓮kah猶大lóng是西岸。詩人主要teh說明,chiah-ê lóng是屬tī上帝賞賜hō͘以色列民族定居ê土地。詩人用「頭盔」來表示siōng重要ê防衛能力,而用「權杖」來表示王權、統治權。

第9節,祈求上帝hō͘ in ē-tàng降服摩押,kā以東人趕出去,mā phah敗非利士人。

第10到13節thang看出詩人心中ê掛慮,因為以東顯然入侵而in無法度抵擋,詩人擔心會受害。M̄-koh,詩人mā講只要有上帝伸手幫助,就一定會戰勝仇敵。

重新查詢 專卷研經 詩篇系列
錯誤回報,請聯繫comm[@]fhl.net