詩篇 104章1節 到 104章35節   背景資料  上一筆  下一筆
這mā是四首頌讚上帝創造之美ê詩篇之一,其它三篇是第八篇、第十九篇1到6節、第廿九篇等。作者tùi上帝創造ê宇宙萬物開始講起,頌讚上帝創造ê美。有一種講法,認為chit首詩是用創世記第一章為基礎,寫出創造ê美kah奇妙。親像第1到3節,是創造ê第一到兩工;第4到18節,是創造ê第三工;第19到24節,創造ê第四kah第六天;第25到26節,是創造ê第五天;第27到 30節,是kui個創造ê總結,講tio̍h一切受造物lóng是tī上帝ê「氣」中生活,因為萬物性命ê來源,就是上帝ê「氣」á是「靈」。

第1到3節,第1節ê a句,kah chit首詩篇最後一節(第35節)最後仝款。因為án-ne,起頭詩句kah結尾詩句仝款,lóng是用「我ê靈ah,tio̍h頌讚上主!」。

Chit段詩歌tùi「光」開始,然後有「穹蒼」出現,續落來是有「高天ê水」,mā有「雲彩」kah「風」。這詩人mā講上帝以雲彩當做「戰車」,表示雲彩是上帝ê交通工具(參考詩篇六十八:4,申命記三十三:26,以賽亞書十九:1)。

第4到9節,chit段詩歌出現創造ê第三工,mā就是大地kah大海ê出現,詩人特別強調上帝ê命令一出來,連水lóng得聽從。Chit種講詞對以色列人民來講真特別,原因是in看海洋、大水lóng是危害性命ê氣力。M̄-koh chit種危害性命ê氣力聽tio̍h上帝ê命令,就lóng乖順聽從,m̄敢超過jú雷池一步。

第10到13節,chit段詩歌開始出現山嶺間有水thang供給野獸、野驢á lim,有樹木hō͘空中ê飛鳥棲息、吟唱詩歌,而且有大地thang生出供給人類食用ê菜蔬,mā hō͘人thang種作五穀雜糧。

第14到18節,chit段詩歌提起「釀酒」,這表示人開始種植果子樹,mā會製造食用ê「油」kah得tio̍h糧食「培養體力」。第16到18節,詩人提起高聳ê香柏樹松樹lóng是上帝栽種ê,hō͘鳥á thang tī樹á頂做巢作窩延續下一代性命,m̄-nā án-ne,mā有野山羊kah石獾出入。

第19到23節,chit段詩歌特別提起日月星辰kah日夜ê變化,這真清楚是創世記第一章14到19節ê背景,m̄-koh mā說明有kóa民族kā日月星辰當做神明teh崇拜ê時,詩人卻真清楚表示,chiah-ê並m̄是神明,卻是上帝創造用來管理時間ê。Chia mā提起人kah獅出現。

第24到26節,chit段提起海洋,以及海裡ê動物。比較khah特別ê所在,是tī第26節,詩人提起人類造ê船隻tī海洋航行,ná親像海中ê動物teh泅水仝款。

第27到30節,chit段詩歌ē-sái講是頭前所有創造ê一個結論,表示chiah-ê受造ê一切,ē-tàng延續性命落去,lóng是上帝ê賜福。若是上帝kā祂ê活氣收tńg來,性命就結束。換句話講,所有萬物ê性命,lóng是tī上帝手中。上帝mā賞賜食物hō͘所有受造ê動物,以及人類。

第31到35節,這是詩人teh歌頌上帝創造ê偉大,只要活teh ê日子裡,一定lóng tio̍h o-ló歌頌。只要知影人ê有限、渺小,以及上帝就是性命ê主宰,所有作奸犯罪ê人就會遁形消失,m̄敢胡作非為。

重新查詢 專卷研經 詩篇系列
錯誤回報,請聯繫comm[@]fhl.net