Chit首詩篇siōng常常hông用tī主日禮拜ê時ê「宣召」，因為這是一首呼召民眾來敬拜上帝ê詩歌，用tī「宣召」ê時非常適當。Chit首詩篇ê內容kah第九十五篇真接近，親像第九十五篇2節kah第一○○篇4節；第九十五篇7節kah第一○○篇3節等等。

第1到3節，這是呼召萬民同齊來歌頌上帝。第2節ê「到伊面前」，意思是teh指帶禮物（獻祭用ê）到敬拜ê聖殿去。

第3節thang看出以色列人民siōng特別ê所在是kā kui個民族kah上帝之間ê關係，譬喻成羊群kah顧羊人之間ê親密關係（參考詩篇廿三：1、八十：1）。Chit點mā是tī所有ê民族中siōng特別ê。

第4節，chia講beh用「感謝」、「頌讚」進入敬拜上帝ê聖殿，這真清楚說明獻祭ê時ê禮儀，就是一面獻上祭品，一面tio̍h歌頌上帝賞賜ê恩典。

第5節，koh一pái強調上帝ê「慈愛」kah「信實」，lóng是永遠存在ê。前者表示上帝永遠無變ê疼，後者說明上帝堅守祂kah子民之間所立ê約，永遠bē改變。因為祂kah子民所立ê是永遠之約。因為án-ne，上帝一定會堅持到永遠。