民數記 9章1節 到 9章14節   背景資料  上一筆  下一筆
Chit章講tio̍h兩個重要ê主題,一是關係守Pôaⁿ過節ê規律,這tī出埃及記第十二章1到28節、43到51節等等;利未記第廿三章5到14節mā有記載。M̄-koh tī chia特別探討若是有人tú-tio̍h屍體,表示chit種人已經無清氣à,是m̄是thang守Pôaⁿ過節ê規律。二是關係上帝用雲彩降臨tī聖幕中,表示祂tī聖幕裡,chit時,以色列人民是m̄是beh行動ê事。

Ná親像頭前提過ê,chit段經文是講tio̍h有關Pôaⁿ過節tio̍h遵守ê規矩,kah出埃及記第十二章、利未記第廿三章所記載關係Pôaⁿ過節ê相關細則雖然無仝,m̄-koh卻thang互補。

第1到5節,tī出埃及記第十二章記載以色列人出埃及chìn前一夜,第一pái守Pôaⁿ過節,然後in出埃及後,經過三個月ê時間,行到西奈山下(參考出埃及記十九:1),tī chia是經過一年ê時間,守Pôaⁿ過節ê時間來臨。以後lóng是照規定tī每年正月十四日舉行,而且所有ê人(包括外僑在內)lóng一定tio̍h參加。因為án-ne,chia記載ê Pôaⁿ過節,thang講正式kā它律法化。Chia強調「上主命令摩西」,以色列人民「lóng一一遵行」。

第6到8節,chit段經文特別ê所在是講tio̍h有人因為不慎接觸tio̍h屍體ê時,該án怎chiah好辦理ê事。因為根據摩西律法ê規定,只要摸到屍體,就成做無清氣ê人。因為án-ne,in來詢問摩西為甚麼in無法度teh指定ê時間向上帝獻祭?摩西並m̄是家己決定tāi-chì,所有ê律法規矩lóng是出tī上帝ê旨意。因為án-ne,伊回答需要請示上帝ê旨意。這mā teh說明一件重要ê認bat:m̄是摩西teh決定以色列人民ê律法事務,卻是上帝teh決定。因為án-ne,遵守摩西律法等於遵守上帝ê教導。

第9到10節,chit段經文是摩西請示上帝了後所得tio̍h ê回應。Chia包括兩種對象,一是摸到屍體ê人,二是外出遠門ê人mā想beh守這重大節期者。

第11到12節,chit兩種人thang延遲一個月ê時間,mā就是tī二月14日暗時守Pôaⁿ過節。而且所有ê條例lóng tio̍h照Pôaⁿ過節ê規定,bē-tàng因為延遲一個月就有所省略。

第13節,chit節提起故意不守chit節期ê人,就是看輕上帝ê拯救恩典ê人,chit種人無法度成做上帝ê選民, tio̍h kā伊除名。

第14節,寄居tī以色列人民中間ê外族人,若是beh kah以色列人民守chit節期,mā是仝款,所有ê規矩lóng tio̍h遵守。照出埃及記第十二章48節ê規定,chiah-ê寄居者á是外族人,若是beh kah以色列人民守Pôaⁿ過節,第一個要件,就是beh先行割禮。

換句話講,任何人beh守Pôaⁿ過節ê活動,就一定tio̍h一切lóng kah以色列人民tī chit-ê節期所要求ê仝款,bē-tàng有省略。Á所有chiah-ê要求thang參考出埃及記第十二章。

重新查詢 專卷研經 民數記系列
錯誤回報,請聯繫comm[@]fhl.net