Chit段經文kā所有獻祭ê總數作一個統計，mā thang看出以色列人民對上帝ê感恩之情非常重。M̄-koh khah重要ê意義，應該是teh強調每一個支派teh敬拜上帝ê事頂面lóng仝款同等重要，無支派大細之分，而且每一個支派lóng支持聖幕kah祭司tī聖幕中ê角色kah工作。Koh講，獻祭kah事奉mā teh表明以色列人民kah上帝之間親密、bē-tàng分ê關係。

可惜ê是後來因為信仰變了質，致使獻祭ê態度mā大為改變，hō͘獻祭ê意義mā變質，已經會失去本來信仰ê意義，這mā是主前第八世紀先知阿摩司、彌迦所譴責ê，講上帝並無真正喜愛人ê獻祭，無論獻祭jōa-chē，lóng bē因為án-ne soah取悅上帝。因為上帝只希望in會用無變ê疼、謙卑ê心靈kah上帝同行，並且知影實行公道、維護社會正義（參考阿摩司書五：21—24，彌迦書六：6—8）

第89節，chit節mā是回應了出埃及記第廿五章22節，講上帝親自降臨tī聖幕中，而且透過約櫃親自kah摩西講話，這表明存放約櫃ê所在，mā是上帝顯現ê所在。Mā thang án-ne瞭解：聽tio̍h上帝kah人對話ê神聖之地，就是kah上帝立約ê所在。

注意chia ê「櫃蓋」原本有一個意義，表示「施恩座」，mā就是「覆蓋」ê意思，指kā人ê罪藉tio̍h上帝ê慈愛kā它蓋過去，這mā就是「贖罪」ê原意。