民數記 32章1節 到 32章15節   背景資料  上一筆  下一筆
這是非常有意思ê一章,因為chit章說明以色列人民中ê呂便kah迦得chit兩個支族ê人,iáu未進入迦南地就想停腳tī約旦河東岸,無想beh進入迦南應允之地à。因為in發見iáu有比迦南地khah súi ê土地thang供in牧放牲畜。

另外有一個可能,就是已經長到近四十年ê曠野漂流、征戰ê時間,人心確實mā會疲乏。因為án-ne,in請求摩西准in建造城池tī迦南地外圍ê約旦河東岸。Á tī第十三、十四章,記載摩西bat派十二支派ê代表先進入迦南地去窺探,結果回報ê人,除了約書亞kah迦勒主張攻打外,其餘ê窺探者回報ê時,lóng講述當地人ê魁武高大,ná親像巨人,以色列人絕對phah不贏in。Chit種論調差不多hō͘以色列人民對進入迦南地ê心破碎。Mā為tio̍h chit-ê tāi-chì,以色列人民確實是付出真大ê代價,上帝伸手嚴懲in,hō͘年滿二十歲以上ê人lóng無法度進入迦南地。因為án-ne,當呂便kah迦得兩支派ê代表來見摩西,講in想停留tī約旦河東岸ê時,摩西確實是相當不滿意ê。M̄-koh in理性地解釋原因,表明kah驚惶「巨人」ê事無關,卻是確實看tio̍h迦南地外圍約旦河東岸ê雅謝kah基列之地真闊,koh khah適合in牧放牲畜。摩西後來准in ê條件是:in一定tio̍h帶頭衝鋒陷陣攻打迦南地,幫助其他十個族佔領迦南地以後,in chiah thang tńg來東岸khiā起。

M̄-koh,這有一個基本觀念一定tio̍h注意:若是無願意進入迦南應允之地,只因為看見約旦河東岸ê美,這就等於藐視上帝ê賜福,ná親像以掃看輕大kiáⁿ名份仝款(參考創世記廿五:34)。

值得注意ê是,除了第1節kā呂便排tī第一位外,以後lóng是迦得排tī呂便ê頭前,á呂便是雅各ê大kiáⁿ,這有可能是當做者寫此資料ê時,迦得支族ê發展已經大大超過呂便支族ê勢力à。

Chit段經文一開始就講呂便kah迦得chit兩支派,tī牲畜牧育ê工作上真有成就,牛羊真chē,chit點tī曠野漂流時間,確實是件非常無容易ê事。這mā講出上帝對in ê賜福。In mā看見就tī in暫時停留ê「雅謝kah基列」chit兩個地區,真「適合牧放牲畜」。

第2到5節,呂便kah迦得chit兩支派ê代表就去見摩西、以利亞撒kah以色列各支派ê領袖。In表示想beh留tī約旦河東岸chiah-ê地區,「mài叫阮過約旦河去,tòa tī hit-pêng」,這是in提出ê建議,mā是in ê心願。

第6到10節,摩西一聽見chit兩支派ê代表提出chit種意見了後,隨時表示看法:tùi in ê祖先(已經往生)派出代表去偵探迦南地tńg來,就表示無想beh進入,hit時已經有過一pái大大影響tio̍h kui個民心士氣。chit-má in提出chit種要求,mā是仝款,kah in ê祖先仝款。

第11到15節,摩西提起in祖先就是因為chit-ê緣故,害所有年滿二十歲以上ê人lóng無辦法進入應允之地。只有兩個人就是猶大支派ê迦勒kah以法蓮支派ê約書亞堅持聽從上帝ê旨意,chiah保存性命落來。摩西認為chit-má呂便kah迦得所提出ê,tú好是重蹈in祖先所犯ê 錯誤,「成做新一代ê罪人」,這會引起上帝ê忿怒,真可能引起另一pái大量死亡ê災難。摩西提出相當嚴厲ê警告。

重新查詢 專卷研經 民數記系列
錯誤回報,請聯繫comm[@]fhl.net