Chit章lóng是講tio̍h有關利未人ê職責，kah in應得ê酬勞。Chit章mā ē-sái講是利未記第一到七章、民數記第一到四章8節ê總合。另外在申命記第十八章1到7節；以西結書第四十四章28到31節，mā有類似ê記事。Siōng主要是講tio̍h有關祭司tī聖所裡ê工作，以及in ê助手利未人應盡ê責任，kah享有ê福利。

Chit段經文提起亞倫kah利未人是上帝所揀選做聖所工作ê奴僕。利未人beh服事祭司、幫助祭司從事祭典ê事宜。除了祭司thang接觸聖幕內ê聖器á是祭壇外，利未人是bē-tàng觸(tak)tio̍h。這是為tio̍h維護聖幕聖潔ê緣故。

第1節，chit節真特別，講上帝直接對亞倫講話。Tī chit章中，除了chia，iáu有第8、20節等等，lóng是上帝直接對亞倫講話。另外在利未記第十章8節mā有一pái上帝直接對亞倫講話。Chia講tio̍h亞倫kah伊ê kiáⁿ孫，以及利未人tio̍h承擔聖幕內違反上帝神聖ê旨意之罪責。Á亞倫kah伊ê kiáⁿ孫負擔ê部分，是tī祭司ê工作上。Mā就是teh指獻祭ê部分。其他事務性ê工作，lóng是屬tī利未人ê工作，就tùi利未人承擔。

第2到5節，chia真清楚說明利未人kah祭司是無仝ê；in是beh幫助祭司，m̄-koh並m̄是祭司。In beh向祭司負責，是祭司指派in工作ê內容。M̄-koh in絕對無法度摸到聖幕內ê任何器皿，因為he是神聖ê。Koh一pái強調只有亞倫kah in家族ê kiáⁿ孫chiah是祭司。這mā等於回應了第十六章可拉等利未家族ê人對家己角色不清ê答覆。

第6到7節，chit兩節重複強調祭司ê特權，就是負責聖幕內獻祭ê工作，而且ē-tàng接近至聖所，其他ê人一概不准。