民數記 14章1節 到 14章10節   背景資料  上一筆  下一筆
Chit章mā是記載有關hiah-ê受派前去窺探迦南地ê代表,帶tńg來ê消息,以及因為in ê報告所造成ê影響。Tī第十三章bat提起有十個支派去窺探ê代表認為,比起迦南人,以色列人民就「像草蜢á仝款渺小」。chit-má第十四章則提起有兩位被派去窺探ê人認為應該ài有信心進入迦南地,in就是用法蓮支派嫩ê kiáⁿ約書亞,kah猶大支派耶孚尼ê kiáⁿ迦勒。M̄-koh,in兩人報告ê時卻差一點á被以色列人民用石頭phah死。

為以色列人民chit種對上帝無信心ê態度,上帝mā非常艱苦心。上帝想beh用嚴厲懲罰來教示in,m̄-koh摩西懇求上帝ê憐憫kah赦免。上帝雖然是垂聽摩西ê祈禱,m̄-koh卻mā決定m̄ hō͘年滿二十歲以上ê人進入迦南地,beh hō͘未滿二十歲ê新生代進入chit-ê應允之地。

Chit段經文是講tio̍h以色列人民聽tio̍h chiah-ê代表ê報告後,產生真大ê困擾,人民開始感覺悲哀,上帝beh賞賜hō͘ in ê土地,竟然可能是koh一pái hō͘ in陷入奴隸悲慘生活之地,ná會是án-ne leh ?In甚至認為倒不如另選一位領導者來chhōa in tńg去埃及。

第1到4節,以色列人民koh埋怨起摩西kah亞倫來à。認為in帶領in離開埃及,竟然是去一個令in感覺驚惶kah不安ê所在。In認為只要進入迦南地,一定會hō͘殺光,bó͘-kiáⁿ會hông掠去做奴隸á是被姦污。In認為不如tńg去埃及繼續做奴隸來得好,甚至tio̍h選一個領袖chhōa in tńg去埃及。這等於是beh廢掉摩西kah亞倫,用chit-má用語,就是叛變。

第5到9節,摩西kah亞倫坦覆 (thán-phak)tī土腳,並m̄是teh向人民請罪,卻是teh向上帝祈求。In知影只有上帝chiah有辦法解決chit種問題。因為是上帝ài in tùi埃及帶領以色列人民出來ê。因為án-ne,上帝會家己解決chit種困難ê問題。

以法蓮族ê領袖約書亞kah猶大族代表迦勒兩個人出來對以色列人民講話。伊兩人所講ê有幾點重點:一是確實迦南地相當肥,á這mā是上帝應允ê要件。二是如果上帝歡喜以色列人民,就會親自帶領大家進入迦南地。三是bē-tàng背叛上帝。四是上帝會kah大家同在,ài有chit種信心。

第10節,m̄-koh in兩人所講,民眾聽bē落去,甚至想beh用石頭phah死in,ē-sái講是忽然看見上帝ê榮耀顯現出來。若m̄是án-ne,約書亞kah迦勒就會hō͘ in用亂石phah死。

重新查詢 專卷研經 民數記系列
錯誤回報,請聯繫comm[@]fhl.net