彌迦書 4章1節 到 4章13節   背景資料  上一筆  下一筆
彌迦書第四章kah第五章ē-sái講是chit本經冊ê第二部分;tī第一部分,先知彌迦譴責以色列ê達官顯要,並而且真清楚傳出上帝teh beh懲罰chiah-ê專門欺負弱小人民ê官員。Á tùi第四章開始,則以一種新ê信息出現,to̍h是安慰ê信息,mā是希望ê信息。Tī chit段只有十三節ê經文中,主若是以一首詩歌為主軸,然後配合一段帶有chiok厚應下願景ê散文。先知彌迦傳出ê信息對hiah-ê已經因為戰亂感受tio̍h性命苦難ê以色列人民來講,是一個極大ê安慰kah鼓勵。

    第1到2節,先知文獻用詞ê一個特色,to̍h是提起「將來ê日子」。通常先知提起「將來ê日子」,lóng是teh指上帝ê拯救teh beh來臨。

	Chia指出建造tī山phiāⁿ上ê耶路撒冷「聖殿」kā成做所有萬民敬拜ê中心,chit-ê思想一直是申命記派作者ê異象(參考申命記十二:5、11、14、18、21、26、十四:25、十五:20、十六:2、5—6、11、16、16—17)。申命記作者一直認為耶路撒冷聖殿chiah是真正敬拜上帝ê所在,因為he是第一間為敬拜上帝而建造ê聖殿,而且建造聖殿ê藍圖是tùi摩西傳承落來ê,具有非常ê權威。先知彌迦傳出ê信息講耶路撒冷聖殿kā成做世間敬拜ê中心,意思就是teh指萬民kā tńg來歸到上帝ê面前,注意聽上帝ê話語,遵行上帝ê旨意kah命令(第2節)。大家lóng用上帝ê話為依歸,行上帝引chhōa ê道路。這mā ná親像詩篇ê詩人所講ê:「祢ê 話做我腳前ê 燈,
做我路上ê 光。(全民版)」(詩篇一一九:105)

	第3節,tùi第1到4節ê chit段詩歌kah以賽亞書第二章2到4節差不多是雷同ê。

    戰爭,是摧殘人性命尊嚴siōng殘酷ê手段,mā是siōng違背上帝創造人類kah萬物本意ê行為。Tī戰爭ê環境中,人ê性命是siōng脆弱ê,lóng無保障thang講。

	先知彌迦傳出ê信息是戰爭kā停息,「國際間無koh有戰爭,mā無koh整軍備戰」,先知彌迦講「排解列強ê爭端」,hō͘「民族間ê糾紛」thang得tio̍h排解,mā tio̍h hō͘列強無koh窮兵黷武。Ài kā戰爭用ê武器變成種作、生產ê工具。先知彌迦傳出ê chit句話,tú好說明無koh會有戰爭,只有種作、收割ê喜樂。

	第4節,chit節並無出現tī以賽亞書,只有彌迦書chiah有,mā是先知彌迦傳出上帝信息中一個非常重要ê ǹg望:性命無koh有驚惶,只有安詳kah快樂。這一定tio̍h有有兩個基本要件:一是每一個人生活上ê需要lóng夠額,無缺乏。二是人人lóng誠實、無貪婪ê心。先知西番雅提起一個無驚惶ê社會,tùi án-ne是一個充滿公義、誠實、夠額生活所需要ê ê社會(參考西番雅書三:13)。

Chit節thang看tio̍h兩種以色列人民siōng hèng ê果子—葡萄kah無花果,另外兩種是:橄欖kah石榴等,lóng是用來表明了以色列人民kah上帝特別ê關係。

第5節,先知彌迦呼籲以色列人民一定tio̍h以án-ne堅定ê態度,來告白in ê信仰,以表示in對上帝絕對ê忠實。伊kā以色列人民講無論別人怎樣「膜拜並順tùi in家己ê神明」,mā無論chiah-ê人ê厝道án怎ê興旺,m̄-koh以色列人民對上帝忠實之心一定tio̍h絕對bē改變,「遵守」上帝ê「旨意,直到永遠」,án-ne chiah是真確ê信仰態度。

	第6到7節,chit兩節koh一pái看tio̍h先知文獻中另外一個特色,to̍h是提起有關「殘存之民」ê信息(參考以賽亞書十一:16、廿四:14、三十七:31,耶利米書廿三:3、三十一:1—7,撒加利亞書八:6—8)。Chit兩節同ê時mā thang看tio̍h先知文獻中ê另外一個特色,to̍h是提出「希望ê信息」,上帝teh beh tī適當ê ê時機,帶領所有被掠到外國去做奴隸ê以色列人民tńg去故鄉,重新kah in立新ê約。Siōng重要ê一點是:上帝親自統治以色列人民(參考二:13)。

    第8節,chia講上帝tī耶路撒冷「ná親像牧者照顧伊ê子民」,就是teh指上帝會繼續保護hit-ê城hō͘ in bē淪陷tī敵人手中ê意思。

	第9到10節,有kóa聖經學者會認為chit兩節經文比較khah可能是後來ê人填加入去ê,因為耶路撒冷bat tī主前586年被巴比倫摧毀。Á先知彌迦tùi án-ne是主前第八世紀ê先知,怎樣可能講tio̍h後來發生tī主前六世紀ê tāi-chì。

	不過,另外有一kóa聖經學者抱tio̍h無仝ê看法,認為當主前721年,亞述帝國摧毀了北國以色列首lóng撒馬利亞後,kā以色列人民販賣到外國去做奴隸,另外一方面則同ê時kā外國人移民到撒馬利亞城來khiā起,特別是亞述帝國mā tùi「巴比倫、古伊、亞瓦、哈馬,kah西法瓦音遷徙人民到撒馬利亞各城市,代替受掠ê以色列人民」(參考列王記下十七:24),而先知彌迦tùi án-ne是主前750年到686年之間ê先知,伊必定親目看過chit幕殘酷ê景象而發出chit種預言,認為;如果今á日亞述帝國thang kā巴比倫人遷徙入撒馬利亞城,甚麼人ē-tàng保證未來ê日子巴比倫帝國bē興旺起來?如果巴比倫帝國強盛起來,beh kā耶路撒冷毀滅掉有困難mah?chiah-ê學者認為先知彌迦後來tī以色列人民心中有重要ê地位,主要原因to̍h是因為伊ê chit份預言成真à。

	第11到12節,chit兩節經文ê背景真有可能kah主前701年有關係,因為該年tùi án-ne是亞述大軍進攻耶路撒冷ê時chūn,這這年mā是希西家王在位ê第十四年。希西家王為tio̍h hō͘亞述帝國撤軍,m̄-nā賠上一千公斤ê黃金kah一萬公斤ê銀á,另外iáu有二十萬一百四十六名以色列人民hông擄去做人質。

Tùi亞述帝國來看,in併吞chē kah四十六個以色列人ê城市,而且俘虜chiah-ni̍h chē人民做奴隸,koh thang索取chiah-ni̍h koân ê戰爭賠償款,這是jōa-ni̍h-á榮耀ê一刻ah!ē-sái講是,有甚麼人會想tio̍h,就tī in siōng得意ê時chūn,上帝親自替祂ê子民出氣à。如果咱繼續讀列王記下第十十八到十九章,就會看tio̍h上帝差派天hō͘進入亞述營中,刣死了十八萬五千名兵丁,逼kah亞述皇帝西the̍h基立撤退tńg來尼尼微去à。這tú好說明先知彌迦tī chia所講ê,無人會知影上帝ê計畫,輕視上帝ê強權lóng會遭遇tio̍h上帝嚴厲懲罰。

    第13節,chit節是先知彌迦傳出鼓勵ê信息,主要目的是beh以色列人民一定tio̍h對上帝有信心,因為上帝teh beh成做in ê保護者,hō͘ in像尖銳ê武器仝款,thang擊潰來攻擊ê任何仇敵。

	「鐵角」,這是teh指尖銳ê軍隊,勇猛無比ê意思。

	「銅蹄」,是teh指徹底毀滅敵人ê進攻,甚至ē-tàng踐踏敵方ê軍隊,ná親像人teh踏螞蟻仝款ê容易。

重新查詢 專卷研經 彌迦書系列
錯誤回報,請聯繫comm[@]fhl.net