馬可福音 2章1節 到 2章12節   背景資料  上一筆  下一筆
Tùi第二章1節到三章6節,作者連續提出五個事件,說明耶穌kah猶太人領袖之間發生衝突ê問題;(1)第二章1到12節、第三章1到6節,這兩段經文lóng是有關醫ê問題。(2)第二章13到17節,是耶穌呼召抽稅ê人利未來做門徒。(3)第三章18到 22節,這是有關禁食ê問題。(4)第二章23到27節,是有關違反安息日ê問題。特別是tī第四kah第五chit兩個事件lóng牽涉tio̍h安息日ê規定,引起ê反彈siōng大,因為án-ne tī第三章6節講法利賽人kah希律黨人決定聯手對付耶穌甚至想beh kā祂殺害。

馬可福音作者tī編輯上真特別ê手路,就是「三明治」編輯法,chit-má所讀chit段經文就是一個例,tī第1到5節提起耶穌醫一位半遂ê病人,然後第6到11節,提起經學教師對耶穌醫ê方法真有意見,續落來是第12節chit-ê病人回應耶穌ê話。Kā chit兩段經文併做伙來看,有一個主題中心,是teh討論有關耶穌ê權柄。Chit-ê問題thang kah第十一章27到33節對照,祭司長、經學教師,kah長老來質問耶穌ê權柄,就會發見耶穌無論tī醫能力á是tī教導上,lóng引起當時ê宗教領袖感受危機,因為群眾lóng khiā tī耶穌chit-ê邊,而且認為耶穌ê教導kah經學教師無仝,是比較有權威ê(參考馬可福音一:22)。

第1到5節,提起拆厝頂,這是因為當時ê房屋結構,厝頂是用橄欖樹枝、蘆葦草莖交叉編織ê,beh拆開並無困難。作者tī chia特別提起是「四個人抬tio̍h半遂病人」tùi厝頂上連同病人倒ê舖á縋落到耶穌面前。第5節真重要,講耶穌是看tio̍h hiah-ê幫助半遂ê人ê信心,tùi án-ne醫好chit位病患,而且所用ê方法是用命令ê語氣對病人講:「你ê罪蒙赦免à。」這thang看出堅定ê信心ē-tàng幫助別人得tio̍h耶穌ê恩典。Koh講,早期ê人認為破病kah犯罪有密切關係,因為án-ne,赦罪kah醫是仝款ê效力。

第6到7節,猶太人經學教師是相當有地位ê,in mā是宗教領袖,主要負責教導民眾認bat摩西律法為主要工作。In認為耶穌對這病人所講ê「你ê罪得tio̍h赦免à」chit句話,已經牽涉tio̍h僭jú上帝ê主權,牽涉tio̍h「褻瀆上帝」ê神聖。若是chit種罪名成立,耶穌會hông判處「褻瀆上帝」,tio̍h判hō͘人用石頭phah死ê死刑(參考利未記廿四:16)。

第8到11節,「耶穌馬上看穿in teh轉些甚麼念頭」,chit句話已經teh暗示耶穌kah一般人無仝,伊有特殊ê能力,ē-tàng知影人內心ê意念,á這只有上帝chiah有ê(參考撒母耳記上十六:7,耶利米書十七:10)。同時,耶穌mā證明家己有權柄赦免人,就是beh chit-ê病人the̍h起伊ê舖á tńg去厝裡。伊用ê仝款是命令句型。表示耶穌ê命令一出,事就成了,這kah創世記第一章所描述上帝ê創造過程仝款。

第12節講眾人lóng「非常驚奇」耶穌有chit種能力,kah tī第一章22節作者mā講眾人「驚奇」耶穌ê教導仝款。馬可福音作者常用「驚奇」ê字眼,表示當時ê人對耶穌言行舉止ê反應,顯示出眾人對耶穌認bat ê不足,尤其是祂ê門徒koh khah是án-ne。

重新查詢 專卷研經 馬可福音系列
錯誤回報,請聯繫comm[@]fhl.net