馬可福音 2章18節 到 2章20節   背景資料  上一筆  下一筆
行洗禮約翰ê門徒kah法利賽人lóng有「禁食」ê習慣,因為前者本身就是屬tī頂真ê靈修團體,後者可能是屬tī保守派ê法利賽人,有ê人甚至每一個禮拜會禁食兩pái(參考路加福音十八:12)。照摩西律法ê規定,每年有一pái是國家禁食日,就是「贖罪日」(參考利未記廿三:26—32)。Á除了chit-ê猶太人lóng會遵守ê贖罪日禁食外,耶穌並無教導祂ê門徒像行洗禮約翰á是一kóa保守派ê法利賽人hit種常禁食。其實在馬太福音第六章16到18節,耶穌mā談過禁食應該是一件真隱密ê事,無需要hō͘人看見á是知影。因為真實ê禁食,是teh向上帝表示懺悔、認罪ê意思,並m̄是用來展寶家己tī信仰上是jōa-ni̍h-á敬虔。另外,禁食mā是一種表示悲傷ê方式。

Tī chia,耶穌用猶太人ài用ê「婚宴」來譬喻。婚宴,是喜樂ê時chūn,當然無人會禁食。因為禁食是teh表示苦難、懺悔,á是苦修ê方式。

「Ē-sái講是日子將到」,chit句話通常表示審判ê時間,m̄-koh耶穌無指明是甚麼時chūn。耶穌tī chia將家己比喻為「新郎」,用來預言伊會受難,ná時chūn「就beh禁食了」,表示哀傷、難過ê時chūn會來臨。

重新查詢 專卷研經 馬可福音系列
錯誤回報,請聯繫comm[@]fhl.net