馬可福音 15章33節 到 15章41節   背景資料  上一筆  下一筆
Tī第25節講上午9點ê時chūn釘耶穌tī十字架頂,chit-má是正午ê時刻,卻忽然發生變天ê現象。第33節用「烏暗罩tiâu大地」來形容天象改變ê現象。然後繼續三個小時,到下晡3點鐘。

第34到37節,馬太福音kah馬可福音lóng記載耶穌tī十字架頂只有講了chit句話。耶穌引用詩篇第廿二篇1節a句ê詩歌,說明伊帶tio̍h人類ê重罪,第一個感受tio̍h ê是kah上帝隔離好遠好遠。因為tī chia所用ê「上帝」是「以羅伊」,這是以色列人民teh稱呼上帝時用ê,tī亞蘭語ê發音真親像「以利亞」。因為án-ne,有人認為耶穌teh呼叫先知「以利亞」來救祂。就tī chit時chūn,耶穌大喊一聲了後,就「斷氣」。

第38到39節,chit兩節講tio̍h另外一個奇異ê現象出現,就是聖殿到聖所ê帳帷忽然「tùi上到下裂做兩半」,這帳帷原本是隔離tio̍h聖所kah祭司院。照希伯來書第十章19到20節ê記載,耶穌ê死,為咱開闢一條通過帳帷ê新路,是得tio̍h性命ê活路。Chit位羅馬軍官本來是執行釘死耶穌十字架之刑ê,chit-má看tio̍h十字架頂ê耶穌,就講伊「真是上帝ê Kiáⁿ」,這mā是馬可福音第一章1節所見證ê。

第40到41節,chia列出一份婦女ê名單,in lóng是耶穌kah門徒傳福音siōng有力ê支持者。Tùi加利利一直kah跟tòe耶穌來到耶路撒冷,並且親目目賭耶穌被釘死十字架頂。

重新查詢 專卷研經 馬可福音系列
錯誤回報,請聯繫comm[@]fhl.net