馬可福音 11章1節 到 11章11節   背景資料  上一筆  下一筆
馬可福音tùi第十一章開始到第十五章,是記載耶穌最後一禮拜tī耶路撒冷ê事蹟,所謂「受難週」就是tùi第十一章開始算起。

前段講耶穌kah跟tòe ê門徒、群眾離開了耶利哥,chit-má in開始「行入耶路撒冷」,來到「橄欖山ê伯法其kah伯大尼」。Chia距離耶路撒冷大約只有三公里ê路程而已。

第2到3節,耶穌先派兩位門徒去準備。吩咐in到頭前庄頭去牽一匹「無人騎過ê驢á-kiáⁿ」來,並且交帶講若有人問,就講「主要用牠」án-ne就ē-tàng。Chit句「主要用牠」其實就是耶穌事先向人借用驢á ê暗語。用「無人騎過」chit句話,表示hō͘耶穌使用ê,lóng是siōng好ê,象徵tio̍h聖潔ê意思(參考民數記十九:2,撒母耳記上六:7)。

第4到6節,耶穌因為事先有聯繫好,原因是tī猶太、耶路撒冷等地lóng有耶穌認bat ê人(參考馬可福音三:7—8)。因為án-ne,門徒去到hit-ê庄頭,所tú-tio̍h ê情景lóng kah耶穌對in交帶ê事完全相符。就án-ne,in順利地kā驢á-kiáⁿ牽來hō͘耶穌騎tio̍h入城(第7節)。

第8節,chia講有人the̍h衫褲「鋪tī路上」,這kah迎接君王來臨ê風俗á是傳統有關(參考列王紀下九:13)。而且「有kóa人the̍h田野裡剉來ê樹枝鋪tī路上」,約翰福音第十二章13節講是「棕樹枝」,這就是今á日基督教會ê「棕樹節」由來,mā是受難週ê第一工。

第9到10節,是民眾歌唱歡呼ê頌讚聲音,chiah-ê歌頌ê詩歌是引用詩篇第一一八篇25到26節。Án-ne看起來,群眾kah-ná認bat耶穌就是拯救者ê款。這kah後來in tī彼拉多審問耶穌ê時所呼喊ê完全無仝。

第11節,chit節講耶穌進入耶路撒冷城後,馬上到聖殿去「各所在察看一下」,chit句話為第15到17節潔淨聖殿ê事件預留了伏筆。耶穌kah門徒並無tòa tī城內,卻是離開到伯大尼去。

重新查詢 專卷研經 馬可福音系列
錯誤回報,請聯繫comm[@]fhl.net