瑪拉基書 4章1節 到 4章6節   背景資料  上一筆
Chit章真清楚teh說明上帝審判ê日子來臨ê時,狂傲邪惡ê人lóng kā hō͘上帝所消滅。M̄-koh相對ê是hiah-ê敬畏上帝ê人,會進入永恆中。這是繼續tio̍h第三章17到18節所提起ê,當上帝「採取行動ê hit工」,上帝會kā「義人」kah「惡人」區分出來,並且hō͘眾人清楚知影上帝m̄-nā區分chit兩種無仝ê人,而且祂對待「義人」ê方式,必定kah對付「惡人」ê方法無相仝。

第1節,chia用「hit日子緊到à」,kah頭前所提起ê當上帝「採取行動ê hit工」是仝款ê。Á「狂傲邪惡ê人」,意思是teh指hiah-ê心中無上帝,á是藐視上帝神聖ê人,上帝對付chiah-ê人ê方式,就是用ná親像大火teh燒「麥hiūⁿ仝款」,真緊to̍h消失,「lóng無存留」。Chit種ê譬喻講法tī新約福音書裡耶穌基督ê教導中一再出現(參考馬太福音三:12、七:19、十三:38—42,約翰福音十五:6),lóng提起用火燒掉無好ê部分。

第2到3節,是teh肯定hiah-ê tī上帝記念冊中有美好記錄ê人,上帝m̄-nā會注意聽in祈禱ê聲音,mā會賞賜in特別ê恩典,這恩典包括:一是有陽光照耀,二是性命得tio̍h醫。

「日頭照耀」,tú好kah頭前第一節ê用燄火燒麥稭相對照。陽光kah燄火,這是完全無相仝ê「光」,一個是來自上帝ê祝福,會hō͘人ê心溫暖,充滿希望。另外一個人是會hō͘人ê心膽寒,Tī痛苦中失去ǹg望。Koh講,陽光mā是teh表示性命ê活力。所以tī chia用像「小牛仝款蹦跳,快樂」來形容chiah-ê tī上帝記念冊中ê義人。

第4節,chit節特別提起「ài會記得我奴僕摩西ê教示」,chit句話已經清楚說明指ê就是摩西律法經冊,是上帝tī「何烈山頒佈」hō͘摩西,「ài所有以色列人遵行ê律法誡命」。

第5節,chit節是非常重要ê一節經文。Chia真清楚講tio̍h tī上帝審判ê「日子來到以前」,一定會先差遣祂忠實奴僕「先知以利亞」來臨。照列王記下第二章11到12節ê記載,先知以利亞是hō͘上帝直接用一台火馬車接tio̍h天頂去。Taⁿ伊teh beh koh來,而且是tī上帝審判chìn前臨到。耶穌基督則真清楚指出行洗禮約翰就是先知以利亞來臨ê記號(參考馬太福音十一:14)。可見tī耶穌基督時代,咱人á是teh thèng候先知以利亞ê來臨,因為先知瑪拉基傳出了chit-ê信息。

第6節,先知瑪拉基強調若是真正遵照摩西kah先知以利亞ê教導ê人,每一個家庭必定會teh過和諧ê生活,而án-ne就bē koh一pái受tio̍h上帝嚴厲ê審判。

重新查詢 專卷研經 瑪拉基書系列
錯誤回報,請聯繫comm[@]fhl.net