利未記 4章1節 到 4章12節   背景資料  上一筆  下一筆
Tī前三章lóng是kah燒化祭ê禮儀有關,燒化祭表明出來ê主要意義,就是kah上帝有親密結連ê關係。

Tùi第四章到第五章13節,lóng是關係贖罪祭ê條例。贖罪祭teh表達祈求上帝ê赦免kah赦免。雖然有一種講法認為chit種祭,真可能是比較晚期chiah出現ê,特別是可能tī被掠到外國去了後,用chit種祭來表達認罪,祈求上帝憐憫。M̄-koh chit種講法並無完全被接受。因為在列王紀下第十二章16節,就有提起贖罪祭kah贖過祭ê事,chit時in iáu未被掠到他國做奴隸。

後來tùi chit-ê贖罪祭發展出「贖罪日」(參考十六:29-34),是全國性ê節日,每年舉行一pái,同時舉行禁食,並且停止一切ê工作,包括外僑在內,lóng一定tio̍h舉行遵守。換句話講,獻贖罪祭ê時,心情是嚴肅ê,bē-tàng帶有一絲á歡樂ê氣氛。

Chit段經文是談論因為疏忽á需要用獻贖罪祭來表明懺悔,懇求上帝赦免ê祭。

第1到2節,這是tùi上帝來ê命令,對hiah-ê「無意中犯了罪,違反了上主ê禁令」者,就需要獻贖罪祭,表示承認錯誤,用此來表明悔改。這表示是無意中犯罪,m̄是明知故犯ê罪。

第3到4節,chia講tio̍h大祭司犯罪連累了人民,就需要「獻一頭無殘缺ê小公牛」當做贖罪祭。這是因為大祭司身分高,影響kui個族群。因為án-ne,伊獻贖罪祭,mā teh表示kui個族群共同犯罪仝款。

第5到7節,chit三節講tio̍h宰殺小公牛ê時,所流出來ê血作三種儀式:一是大祭司tio̍h用chéng頭á ùn血,然後tī聖幕內面ê帳帷前hiù七pái。這七pái mā表示完全潔淨ê意思。因為大祭司犯罪,伊進入聖所就是污穢了聖所。二是用血抹tī聖幕裡ê香壇凸出ê四角,這是潔淨香壇,此香壇是上帝kah祂ê子民會面ê所在。因為大祭司犯罪,致使這香壇mā被污穢了,需要潔淨。三是另外ài kā chhun落來ê血倒tī聖幕門口獻燒化祭ê座上,表示chit-ê祭壇因為大祭司犯罪,mā遭污穢à。chit-má因獻小公牛ê血會得thang潔淨。

第8到12節,chia規定內臟除了腸á,lóng tio̍h燒獻外,其它包括皮、腸á、肉、頭、腿等,lóng tio̍h帶到營外倒灰ê所在燒hō͘伊成灰,表示所犯ê罪藉tio̍h chit隻小公牛ê燒獻,á化做烏有。

重新查詢 專卷研經 利未記系列
錯誤回報,請聯繫comm[@]fhl.net