利未記 1章1節 到 1章9節   背景資料  上一筆  下一筆
利未記tùi第一章開始,一直到第七章止,真詳細描述有關各種獻祭禮儀ê規定。出埃及記第廿五到三十章、第三十五到四十章chit兩段落,lóng是teh記載有關聖幕,kah聖幕內面各項祭典所需要用ê物ê製造方法,甚至包括祭司人員穿ê服裝縫製方式。Á利未記則tùi第一到七章續接記載有關祭典禮儀ê細則。既然是kah祭典有關,必定是出tī「祭司文獻」ê作品。因為án-ne mā thang看出,聖幕kah後來進入迦南地所羅門建造聖殿,lóng是用祭祀禮儀當做敬拜上帝ê主要方式。後來耶路撒冷聖殿被摧毀,人民被掠到巴比倫做奴隸了後,發展出來「會堂」ê聚會,chit時ê聚會敬拜無koh是祭祀禮儀,卻是用注意聽上帝kah祈禱做中心。

Chit章是講tio̍h有關「燒化祭」ê條例。燒化祭ê祭品以厝內飼養ê動物為主,包括牛、羊、粉鳥á是斑鳩等,m̄-koh田裡ê野獸,水中ê魚類lóng bē-tàng用來做燒化祭ê祭品。所謂「燒化祭」,就是beh kā kui隻祭牲全部燒化bē-tàng存留。

第1到2節a句,chit段話ē-sái講是tùi第一章2節b到第六章7節ê引言。

「召喚」,這mā是希伯來文為tio̍h án-ne kā卷經冊號名ê由來。

上帝tùi祂ê「聖幕」裡召喚摩西,chia ê聖幕,就是出埃及記中有關摩西帶領以色列人民建造起來敬拜上帝ê「聖幕」。上帝tī chia「吩咐」伊轉告以色列人民照規定應該辦理ê事項。

第2節b句到9節,chit段經文先講tio̍h有關獻公牛當「燒化祭」ê規定。Siōng基本ê要件,就是beh「選用無殘缺ê公牛」當做牲禮(第3節)。Chit句話ē-sái講是所有獻祭ê基礎。

注意第2節b句chia ê「獻」字,原本是teh指「接近」,然後teh beh獻祭ê動物帶到「上主ê聖幕門口」。「接近」ê意思是teh指接近敬拜上帝ê聖幕,有含透過獻祭禮儀,hō͘人接近上帝ê意思。

第3到4節,講獻祭牲ê主人tio̍h「Kā手hē tī祭牲ê頭殼頂」,chit種樣式是teh表示兩種意思:一是表示chit-ê獻祭ê人kah祭品之間有相當密切ê關係,因為祭牲teh代表主人,因為án-ne,當用火燒掉這牲祭ê時,表示獻祭者kā家己奉獻hō͘上帝。二是透過獻牲祭tī上帝面前,表示贖罪。因為chit種作法是上帝會「歡喜接納」ê方式,mā就ē-tàng「替伊贖罪」。

第5到9節,chit時chūn,祭司tio̍h tī聖幕門口宰殺祭牲,然後kā祭牲ê「血hiù tī聖幕門口ê祭壇四周」,尤其是一定tio̍h抹tī祭壇四個凸起ê角,因為chit-ê角有赦免罪行ê功用,然後點火燒掉祭品。因為內臟kah後腿比較khah lah-sap,可能會污穢土á是腸肚內有穢物,lóng需要經過洗盪了後chiah ē-tàng獻hō͘上帝。


重新查詢 專卷研經 利未記系列
錯誤回報,請聯繫comm[@]fhl.net