士師記 5章1節 到 5章31節   背景資料  上一筆  下一筆
這是一首o-ló詩歌,每pái以色列人民戰爭得勝ê時,就會吟詩唱歌o-ló上帝(參考出埃及記十五:1-18,民數記廿一:27-30)。Chia講吟唱chit首詩歌ê是底波拉kah巴拉,in帶領以色列人民吟頌chit首詩歌o-ló上帝。

Tī chit段詩歌中,主要teh說明以色列人民並無軍隊編制,lóng是為tio̍h beh應付外來敵人ê侵犯,有臨時志願軍成立。M̄-koh只要有上帝同在,就算tī án-ne臨時成軍ê狀況下,上帝iáu是會幫助óa靠祂ê人。

第1到3節,詩歌ê開始,就是tùi o-ló上帝、頌讚上帝講起。

第4到5節,只要有上帝介入ê行動,聽tio̍h ê人lóng會驚惶,chia用「大地震撼、天空落雨,雲層傾倒雨水」chit種話句來形容天地變色ê意思。意思是teh指無任何人不驚惶上帝來臨ê。

第6到8節,chit三節表示以色列人民tī迦南王耶賓殘酷暴虐統治之下,teh過非常悲慘ê生活。因為耶賓ê關係,商隊m̄敢入來kah以色列人民貿易,城市荒涼。Á第8節mā講出士師時代以色列人民ê真正ê問題,就是棄sak耶和華上帝,結果四萬名軍隊無一個活落來ê。所謂「四萬」mā thang指「全軍」ê意思。Án-ne thang表示:若是以色列人民棄sak上帝,就算ē-tàng聚集chē kah四萬軍兵mā是枉然。

第9到11節,m̄-koh因為有底波拉ê帶領,原本會潰敗ê以色列軍隊,開始有無仝ê樣式出現。因為底波拉帶領以色列軍隊phah敗迦南王耶賓ê統治。Chia所謂「騎白驢á ê、坐tī馬鞍上ê」,這lóng是teh指社會領袖,而「步行ê」,則一般平民。因為是凱旋歸來,大家不分階級,紛紛行到城門口去迎接。

第12到18節,tī chit段詩歌中thang清楚看tio̍h出征ê代表,除了第四章10節提起ê西布倫kah 拿弗伊利兩支派外,iáu包括了以法蓮、便雅憫、以薩迦等支派lóng有派出志願軍參與chit場戰事。不過mā同時講出呂便、迦得、亞設,kah m̄-koh等支族ê人並無加入,這mā說明以色列人民之間彼此ê不和諧,chiah-ê支派ê人無積極參與chit pái ê戰役,反tńg是西布倫、拿弗伊利族ê人「拼死奮鬥」。這tú好說明約旦河東岸kah西岸兩pêng ê族人,彼此之間已經有裂痕。Chit件事thang參考約書亞記第廿二章10到34節有關河東ê呂便、迦得、東瑪拿西支族ê人建造一座祭壇ê事件。

第19到22節,chit段詩歌說明戰事ê經過,主要teh說明無論擁有jōa-chē軍隊、裝備,若m̄是上帝允准,有chiah-ê精銳部隊,mā是無濟tī事。因為上帝會救助祈求祂ê人。

第23節,chia提起「米羅斯」chit座城,這是設tī 拿弗伊利境內ê城鎮之一。Chit節已經teh表示:凡是kah以色列人民有關ê戰爭,如果有人拒絕á是怠慢參與,lóng受到à嚴厲ê懲罰。這mā是teh表示無一場戰爭,有其他ê族群thang袖手旁觀(參考八:15—17、廿一:5—10)。

第24—30節,chit段詩歌是描述雅億刣死西西拉ê經過。雅億受tio̍h o-ló ê程度,tú好kah西西拉ê老母teh等待伊kiáⁿ「遲遲未歸」ê心境呈現強烈ê對比。

第31節,chit節thang看見因為有底波拉成做以色列人民ê士師,hō͘以色列人民享受長到四十年ê太平。


重新查詢 專卷研經 士師記系列
錯誤回報,請聯繫comm[@]fhl.net