約書亞記 7章1節 到 7章9節   背景資料  上一筆  下一筆
這kui章lóng是記載有關亞干犯罪ê事件。Chit章是teh回應第六章所強調ê,以色列人進攻耶利哥城並m̄是為tio̍h得tio̍h戰利品,in攻入迦南地是為tio̍h得tio̍h上帝所應允ê土地而戰,並m̄是為tio̍h生活物件ê需要,á是財力、人力。因為án-ne,上帝命令in絕對bē-tàng奪取當地ê任何物件。這有一個重要ê觀念tī其中,beh hō͘以色列人學習知影,in m̄是靠戰勝掠奪別人財物而富有,tī上帝所賞賜ê土地上,上帝所hō͘ in lóng夠額有chhun。Á貪心將是敗壞ê一個酵素,絕對tio̍h禁止,若無,kan-taⁿ會帶來koh khah大ê災難。

亞干ê事件mā teh說明,雖然有律法án-ne規定,iáu是有人不聽從,因為án-ne引起kui個進攻計畫受tio̍h波折、失敗。Tùi chia beh教導以色列人知影,違背上帝ê律法規定,所影響ê m̄-nā是一個人ê問題,卻是kui個民族受tio̍h懲罰;mā beh hō͘ in學習知影,遵守上帝律法是無任何人ē-tàng例外,大家lóng一定tio̍h嚴格遵守。

Chit段經文開始講述以色列人tī約書亞帶領下,派兵去進攻弱小ê艾城,結果卻慘敗而tńg來。Chit項事hō͘約書亞kah以色列人ê領袖大大意外,而詢問上帝ê旨意。

第1節,是kui章記事ê序言,mā是結語。因為chit節直接指出是因為亞干犯罪,chiah致使以色列人攻打艾城失敗。亞干是屬tī猶大支族ê人,對猶大支族來講mā是真大ê傷害。

第2到5節,艾城距離耶利哥城大約有二十四公里遠,而且chit段是上坡路程。若ē-tàng攻落這城,tī軍事頂面有重大意義,因為hi̍t 所在海拔高,容易防守,khiā起上mā安全。當約書亞派人去窺探了後,回報告認為hit-ê城防衛能力真弱,容易攻打落來。因為án-ne,只需三千名兵丁去攻打艾城就有夠。結果無想tio̍h,m̄-nā被艾城ê防衛軍phah敗,而且iáu有三十六人被刣死à。Chit pái敗仗,對全體以色列人來講,是真大ê打擊。因為in攻打耶利哥城ê時並無交戰,是靠約書亞帶領、祭司繞城,上帝親自顯現神跡而攻落來。chit-má in親自出兵去攻打,竟然慘敗而tńg來。這一定hō͘ in想tio̍h以後beh繼續攻打ê城鎮,死傷必定koh khah慘重。

第6到9節,「悲傷地撕裂衫褲,the̍h灰掖tī頭殼頂」,這是厝裡有人喪失性命而表悲痛哀傷,á是非常悲痛、懺悔ê一種態度(參考創世記三十七:34;以斯帖記四:1—3;約拿書三:5—6)。chit-má因為以色列軍隊出師不利,約書亞第一個想tio̍h ê就是in必定得罪上帝,因為án-ne,伊用chit種方式kah上帝對話,為tio̍h beh瞭解到底tó一個所在得罪上帝。約書亞對上帝所講ê話,mā是一種自責,因為chit pái攻城ê計畫,是伊一手策劃ê,結果卻慘敗。伊深驚會因為án-ne chit pái ê敗戰,促成hō͘當地ê迦南居民連連來攻打以色列人,這會因戰敗而心生驚惶ê以色列人,無心應戰,來死傷koh khah重。

重新查詢 專卷研經 約書亞記系列
錯誤回報,請聯繫comm[@]fhl.net