Chit段經文是為第六章攻打耶利哥城作序言。Chit-ê忽然出現ê「人」真顯然是上帝ê使者。Tī出埃及記第廿三章20到23節bat記載上帝對摩西講beh差派天使tī旅途中保護伊，只要摩西聽從。chit-má mā是仝款現象出現tī約書亞面前，是koh一pái肯定約書亞繼承摩西ê領導角色，mā同時表明上帝tī摩西身上ê應允mā tī約書亞身上出現。

第13節，表示約書亞帶領以色列人民並無tī吉甲停留真久，卻是繼續向耶利哥城推進。Á chit時chūn出現chit位手裡gia̍h刀ê人khiā tī面前，約書亞真敏感，就隨時問伊ê身分。

第14節，約書亞一聽chit種人是作上帝軍隊ê統帥，就隨時知影這就是上帝差派來幫助in ê使者，伊隨時坦覆 (thán-phak）tī土腳，表示願意順服上帝差派來ê奴僕ê指示。

第15節，這ná親像摩西早年tī何烈山遇tio̍h上帝ê情形仝款（參考出埃及記三：1—6），mā是先有天使出現，然後對摩西講伊所khiā ê所在是聖地， tio̍h thǹg鞋。Chiah-ê lóng tī說明約書亞就是摩西ê接棒者。