約書亞記 24章1節 到 24章13節   背景資料  上一筆  下一筆
Chit章記述約書亞koh一pái召集所有以色列各支派講話,mā是對in重申遵守上帝ê律法命令之重要性,chit種情形有ná摩西最後對以色列人民所講ê話仝款;摩西是將祝福kah詛咒、性命kah死亡pái tī以色列人民,ài in選擇性命。chit-má約書亞是beh以色列人民tio̍h選擇上帝,á是beh選擇偶像神明,m̄-koh伊真清楚表明,伊kah伊ê厝lóng tio̍h選擇上帝,對上帝忠實。

這是一段歷史ê回顧,tī chit段歷史ê回顧中,上帝透過約書亞提起幾件重要ê事:

第1節,chia講約書亞koh一pái召集以色列各支派tī示劍集會,ná親像第廿三章2節仝款。過去召集ê地點是tī示羅,chit-má卻是tī示劍。Á且強調in lóng「來到上帝面前」,chit句話已經teh表示當時ê「示劍」已經是一個宗教中心。Mā因為chit句話,接落去第2到13節chit段經文,ē-sái講是用上帝ê名對以色列人民講話。

第2到3節,先提起上帝呼召並揀選亞伯拉罕,而且強調當時亞伯拉罕所khiā起ê所在,是一個「拜別ê神明」,上帝賞賜hō͘亞伯拉罕有一個kiáⁿ以撒。

第4節,chit節提起雅各繼承族長ê使命,並且帶tio̍h kui個家族進入埃及。

第5到7節,chit段經文講tio̍h上帝差派摩西kah亞倫kā以色列人tùi埃及帶領出來,並且用紅海阻擋並吞食埃及人ê追兵,hō͘以色列人民thang進入曠野漂流真長一段時間。

第8到13節,chit段lóng是描述tī曠野發生ê各種事件,特別是上帝帶領in已經來到à約旦河東岸,過程中有亞摩利人來攻擊in,iáu有摩押人設法chhōe巴蘭來詛咒以色列人民等,m̄-koh上帝並無聽巴蘭ê祈禱。然後,上帝帶領以色列人民pôaⁿ過約旦河,進入迦南地,一一驅逐當地居民。M̄-koh chiah-ê居民hông驅逐,並m̄是因為以色列人民有甚麼能力á是有強大ê武力,卻是因為上帝ê賞賜。上帝賞賜hō͘ in ê包括土地、城市,mā包括了in tī迦南地享受美好ê食物。

重新查詢 專卷研經 約書亞記系列
錯誤回報,請聯繫comm[@]fhl.net