約書亞記 23章1節 到 23章13節   背景資料  上一筆  下一筆
Chit章kah廿四章lóng是屬tī約書亞對以色列人民最後ê勸勉。這兩章kah申命記所記載關係摩西ê遺言有一個共同點就是:每一個上帝ê子民lóng thang自主做性命ê選擇,決定家己是m̄是beh遵行上帝ê命令、律法做tāi-chì。摩西是清楚表示生kah死、祝福kah詛咒chit兩項hō͘以色列人民家己選擇;而約書亞則對以色列人民表示:伊kah伊ê厝是選擇beh永遠事奉上帝。

第廿三章是上帝ê奴僕約書亞teh回憶過去直到chit-má,上帝賞賜hō͘ in chit片肥ê土地thang khiā起,m̄-koh iáu有kóa土地iáu未完成統治,需要in繼續全力以赴chiah ē-tàng得tio̍h。M̄-koh khah重要ê,iáu是tī伊苦口婆心ê kā以色列人民講,一定tio̍h遵守上帝ê律法誡命,án-ne chiah是in生存之道,chiah ē-tàng彰顯出上帝子民ê榮耀。

Chit段經文是記載約書亞知影家己chhun落來ê年歲已經無chē,伊學習摩西tī臨終chìn前向以色列人民ê代表講出最後ê遺言,chit份遺言中,主要teh勸勉以色列人民一定tio̍h忠實tī上帝。

第1到2節,chia一開始就講tio̍h「以色列人享受太平,無受四境仇敵騷擾有一段真長ê時間」,chit句話表示以色列人民確實遵照上帝ê旨意做tāi-chì,án-ne上帝就hō͘ in享受太平,bē受tio̍h仇敵ê侵犯。Chia並無講享受太平時間有多長,m̄-koh卻thang知影約書亞chit時chūn是接近一百一十歲(參考廿四:29)。若koh再對照第十四章10節,迦勒請求約書亞將希伯崙城分配給伊ê時chūn,是已經八十五歲。Á迦勒kah約書亞是同時被挑選出來進入迦南窺探ê十二位領袖之一,因為án-ne,thang猜測in兩人ê年紀相差bē siuⁿ-chē,án-ne,第1節所講ê享受太平有一段真長ê時間來看,大約是廿五年左右ê時間。

約書亞清楚知影家己ê時間差不多ā,就án-ne伊「召集全體以色列人、長老、首領、審判官kah官長來」,beh對in交帶後事。

第3到5節,約書亞提醒以色列人民kah所有代表領袖,上帝確實照祂所應允in ê話做到à,所有tùi出埃及到進入迦南地ê戰爭,lóng是上帝teh為以色列人民而戰。意思是teh指若無上帝替in征戰,in無可能享受chiah-ê成果。注意第4節chia提起iáu有「未征服ê各國土地」,表示約書亞並無帶領以色列人民全部完成統治迦南地。M̄-koh約書亞iáu是hō͘ in知影,上帝一定會遵照祂所應允以色列人民ê,hō͘ in。

第6到9節,約書亞koh一pái提醒in一定會堅強,謹守摩西律法上ê一切規定。第7節kah第12節留落來一個非常重要ê伏筆,就是tī in所khiā起ê土地上,iáu有迦南地ê人kah in tòa做伙,其實beh清除所有迦南地ê居民mā是無jōa可能ê。Á chit兩節mā說明約書亞ê煩惱後來lóng成做事實,he就是通婚帶來à信仰ê墮落,á是偏差。

第10到13節,chit段經文強調只要以色列人民確實遵守上帝ê命令,in會有強大ê氣力,大到ē-tàng用一個人抵擋一千人,意思是teh指m̄免驚惶別國ê人民比in多(參考申命記七:7),只要有上帝ê話語tī in性命中,就是無比ê氣力。M̄-koh若是in不聽從上帝ê話,對上帝無忠實,其結果只會hō͘ in陷入羅網、陷阱,上帝bē koh再庇護in,而in mā會喪失所佔領ê chit片土地。

重新查詢 專卷研經 約書亞記系列
錯誤回報,請聯繫comm[@]fhl.net