Chit段經文記載以法蓮kah瑪拿西兩個支族ê人去chhōe約書亞，要求koh khah chē ê土地，原因是in感覺家族ê人口眾多，所分配到ê土地太小。照民數記第廿六章記載第二pái戶口普查ê時chūn，這兩家族統計加起來ê人數，就是所有族群中siōng大族，共有85,200人。因為án-ne，in做伙去chhōe約書亞，而約書亞則hō͘ in一個功課，ài in去將「比利洗人kah利乏音人」趕出所khiā起ê山區，這就表示hit所在區iáu未佔領，尤其是「迦南人擁有鐵車，勢力強大」，chit句話清楚說明，為甚麼以色列人tī迦南地「iáu有廣大ê地區無征服」（參考十三：1）ê原因。約書亞án-ne講，其實是明顯了：如果感覺族大人chē，就去征服hiah-ê iáu未投降ê迦南地人，家己開拓疆域。