約書亞記 11章16節 到 11章23節   背景資料  上一筆  下一筆
Chit段經文mā thang看出作者ê筆法,ná親像出埃及記作者ê筆法仝款:ē-tàng hō͘國王心硬ê是上帝。Án-ne筆法所表達ê本意是:有甚麼人ē-tàng hō͘埃及國王án-ne心硬?除了上帝敢hō͘ chit種自傲心真強ê領導者受氣以外,iáu有甚麼人有chit種能力?因為上帝ài摩西帶領以色列人出埃及,chit對kui個埃及帝國是非常大ê損失,mā是造成國家經濟大亂ê一件事,甚麼人有chit種能力造成án-ne大ê損失?當然只有上帝。Chia tī第20節所用ê「上主hō͘ hiah-ê城ê人決心kah以色列做對」,寫法ná親像出埃及記所寫ê仝款。特別是tī第10節記載「hit時夏瑣是所有王國中siōng強大ê」,就kah當年摩西帶領以色列人出埃及ê時,埃及帝國是當時kui個中東地區siōng強大ê帝國仝款。人往往tī自認為軍事武力強大ê時,就會看bē起上帝所帶領ê「弱小」族群,án-ne chiah是造成滅亡ê主要因素。

第16到20節,講述約書亞帶領以色列軍隊佔領迦南地ê區域範圍,並且強調kui個迦南地區ê族群,只有基遍人聰明,知影kah以色列人講和,簽訂和平條約,因為án-ne chiah免tī受難。「其他ê lóng被征服à。」

第21到22節,特別提起巨人族亞衲,其實mā是teh回應民數記第十三章22節、28節、33節等等,當年摩西派去窺探tńg來ê探á,lóng表示對該族群真驚惶,chit-má作者講亞衲族無甚麼好驚ê,tī上帝帶領下,以色列ê軍隊將巨人族亞衲hō͘消滅了,並且消滅殆盡,tī以色列統治區內無殘留落來ê。

第23節,說明kui個征服迦南地ê戰爭就此結束,約書亞tùi第一pái扛約櫃phah前鋒進入耶利哥城,緊續落來tī上帝ê指示下進攻艾城,kah五王聯軍對敵,以及kah其他王國聯盟對抗等,lóng得tio̍h勝利,就此達成以色列人出埃及,經曠野進入迦南地ê願望。約書亞照chìn前ê約定,由以色列各支派推出代表參與分配土地事宜(參考民數記三十四:16—29)。Chit節mā ē-sái講是以色列人正式進入迦南地,佔領了上帝應允in khiā起ê土地。M̄-koh事實上並m̄是完全,因為iáu有kóa需要征服ê所在。

重新查詢 專卷研經 約書亞記系列
錯誤回報,請聯繫comm[@]fhl.net