約伯記 37章1節 到 37章24節   背景資料  上一筆  下一筆
Chit章開始並無出現像第三十四章kah三十六章1節ê「繼續」、á是第三十五章1節ê「koh」,顯示chit章經文乃是續接第三十六章ê文脈。主要內容是以利戶希望約伯tùi上帝ê偉大創造中看tio̍h家己是jōa-ni̍h-á渺小,並想beh去明白上帝tī伊性命中ê意義。

第1節,chit節kah第三十六章33節相連;tī第三十六章33節a句講tio̍h雷電預告風暴ê來臨,chit節則講「暴風」已經來臨。風暴kah雷電是一體ê兩面,兩個是分bē開ê,雷電出現ê時,往往總有風雨交加ê景象。Tī第三十六章33節b句講tio̍h cheng-seⁿ知影逃避雷電kah風暴ê侵襲,chit節則講tio̍h人tú-tio̍h chit種景象ê時chūn,m̄知往tó位去逃避,心kan-taⁿ會驚惶而「跳躍無停」,這顯示出人ê軟弱kah無力,遠不如cheng-seⁿ。

第2到4節,以利戶ài大家lóng「聽上帝ê聲音」,上帝就是透過chiah-ê「雷轟」、「sìh-nà」、「隆隆ê吼聲」、「不斷ê閃光」來向人啟示祂家己。因為án-ne,一個真正有智慧ê人,就會tùi chiah-ê天際上ê景象,知影上帝ê偉大,而謙卑家己。

第5到13節,Tī chit段經文中,以利戶用自然界ê景象來表示:所有chiah-ê「雪」、「雷電」、「風暴」、「雨水」、「寒流」、「密雲」等等,lóng是聽從上帝ê「下令」而行動,這絕對m̄是人ē-tàng「測透ê事」,說明無論是季節á是氣候ê變化,lóng kah上帝ê旨意、命令等有密切關係,因為所有受造ê宇宙萬物lóng聽從上帝ê話而行動。Á chiah-ê行動所表現出來ê意義,就是上帝teh「顯示對人ê慈愛」。

第14節,以利戶一直表示伊beh代表上帝講話,因為án-ne,一再ài約伯注意「注意聽」伊講話,因為伊ê話就是上帝ê意思。伊ài約伯「安靜一時á」,好好á思考「上帝奇妙ê作為」,這mā是用後上帝直接回答約伯ê時所提ê建議。

第15到18節,Tī chit段經文中,以利戶連續提出幾個問題,所用ê語句lóng是「你知影mah」chit種句型,chit種句型是帶有諷刺ê意味tī其中。Khah強調ê是,伊認為約伯根本就m̄-bat chiah-ê事。換句話講,以利戶雖然是用「你知影mah」,其實伊真正意思是「你根本就m̄知」。伊koh一pái用「雲彩」、「sìh-nà」、「南風」等來說明「上帝奇異ê作為」,m̄是人所ē-tàng理解ê。伊強調kui個「穹蒼」就是上帝創造ê奧秘。創世記第一章6節講tio̍h上帝創造「穹蒼」,並且稱做「天空」(參考創世記一:8),而人只不過是「穹蒼」中ê一個小小生物而已。

第19到20節,chit兩節表面上看起來,kah-ná以利戶真謙卑,ài約伯教導伊,其實伊是teh諷刺約伯。因為約伯一再要求kah上帝對話,因為án-ne,以利戶對約伯提出chit種看法。以利戶則認為約伯chit種態度明明是m̄知分寸。以利戶tī chia講伊m̄敢「要求kah上帝講話」,因為伊驚hō͘ 上帝ê忿怒hō͘「毀滅」。

第21到24節,chit段是以利戶ê結語。Tī chit段結語中,伊koh一pái引用自然天象,包括「天空ê亮光」、「涼風」、「北方有金色ê光輝」等,來陳述人ê愚拙、渺小kah上帝ê智慧、偉大實在無法度互相比較。

以利戶另外一方面mā是teh設法安慰約伯,ài伊m̄免koh再驚惶性命陷入苦難中,因為上帝ê慈愛會hō͘所有苦艱苦心去,了後就會親像「天空晴朗」仝款,約伯mā會koh一pái重現新ê性命希望。即使上帝ê威嚴hō͘人敬畏,m̄-koh上帝iáu是公義ê上帝,bē冤枉好人。以利戶ê終結iáu是認為:約伯ê苦難,m̄是tùi上帝來。因為上帝是「公義正直」ê,祂kan-taⁿ會替好人伸冤,bē「欺壓人」。伊提醒約伯m̄-thang「自認為聰明ê人」,beh知影「敬畏」上帝chiah是正確ê態度。

重新查詢 專卷研經 約伯記系列
錯誤回報,請聯繫comm[@]fhl.net