Chit章是以利戶針對約伯ê問題開始講話，特別是針對約伯一再自認清白、無辜ê言論kah態度，表達了伊ê看法。Tùi以利戶ê言論thang看tio̍h伊m̄-nā自負，iáu自認為真有智慧（參考第33節），並且家己認為伊ê話ē-tàng hō͘約伯心服口服。

Tī第三十二章記載以利戶所講ê言詞中，mā有意思beh邀請以利法、比勒達、瑣法等三人加入伊ê辯論，不過包括約伯在內，kah-ná lóng m̄理伊，若無，就是in三人已經無想beh koh進行任何辯論，因為án-ne，以利戶chiah會直接轉向約伯講話。

    Chit段經文中，以利戶向約伯表明伊所講ê話，lóng有上帝ê靈teh引chhōa，伊用chit種方式teh表明家己講ê話，lóng是真實ê。以利戶強調上帝真偉大，當約伯一再控訴上帝對伊ê懲罰是錯誤ê時，以利戶則是beh hō͘約伯知影，上帝並m̄是三言兩語就ē-tàng認bat清楚ê。其實以利戶chit種講詞mā無甚麼新ê見解。

    第1到4節，伊Tī chit段無算短ê篇幅中，lóng是直接稱呼「約伯」ê名（參考三十三：31、三十七：14），講話ê語氣kah-ná家己比約伯iáu koh khah年長，而事實上伊真可能比約伯iáu少年。chit-má伊講家己所講ê話是「出tī到誠」、「是誠實話」。伊講「上帝ê靈造」伊，意思是teh指伊chit-má所beh講ê話，是充滿tio̍h智慧。

第5節，以利戶開始先kā約伯講，若有任何想beh「答辯」ê話，儘管講出來。伊用chit種語句開始，mā用chit種話結束（參考第32節）。可能是受tio̍h頭前約伯kah三位朋友一來一往ê問kah答之間ê影響，伊mā kā約伯講隨時lóng ē-tàng「答覆」。

第6到7節，「tī上帝面前lóng仝款」，這是tī「土粉」ê基礎上論人kah人之間ê性命關係。Chit點mā是基督教信仰ê基礎，任何人「tī上帝面前」無貧賤富貴之別，所有ê人lóng是用「土粉造成」ê，lóng是罪人，無一個是「行善」ê（參考詩篇十四：1）。「土粉」mā thang表示「卑賤」、「無tap-sap 」ê意思。人雖然是用「卑賤」ê「土粉」所創造ê，ē-sái講是tī人ê性命中，有上帝賜hō͘人ê「性命之氣」（參考創世記二：7），chiah hō͘人ê性命有意義。以利戶想beh hō͘約伯thang講透枝，因為án-ne，伊提醒約伯，既然大家tī上帝面前lóng仝款，lóng是上帝用土粉所造ê，約伯thang m̄免自卑，m̄免「驚」伊，因為伊mā是人，並無甚麼好驚惶ê。「我bē向你施壓力」，chit句話tú好說明以利戶並m̄是上帝，無夠額來對約伯造成威脅。

Chia「壓力」（《和合本》用「重壓」）一詞ê原意，有含恐嚇、懲罰ê意思就是tī內面。Á「施壓」這字，tī希伯來文有「手」ê意思。換句話講，是出重手打擊對方，á是用「手」壓tòa對方ê意思。因為約伯bat表示上帝ê懲罰hō͘伊感覺不安，因為án-ne伊祈求上帝「無koh恐嚇」伊（參考九：34、十三：21）。因為上帝乃是性命ê主，相對tī受造ê人，上帝有絕對ê主權。Taⁿ，以利戶對約伯強調伊kah約伯兩人之間lóng是平等，無需要有chit種驚惶感。

第8到11節，chit段經文是以利戶引用約伯講過ê話，因為án-ne，teh引用chìn前伊特別聲明hiah-ê話是出tī約伯家己ê話á是觀點。

以利戶引用約伯講ê「你講：我無辜，無犯甚麼過錯」，chit句thang參考第九章35節b句、第十章7節a句、第十三章23節、第十六章17節a句、第廿三章7節等等，因為án-ne，講上帝是「故意」beh hō͘伊承受ê（參考九：20—21、九：30—31）。約伯mā講上帝kā伊當做「仇敵看待」（參考十三：24、十九：11）然後用「用鐵鍊鎖tiâu」伊，「窺伺」伊ê「每一個行動」，chiah-ê話thang參考第七章18到19節、第九章18節，特別是tī第十三章27節，差不多完全引用約伯ê話。

第12到13節，以利戶真直接就指出約伯「m̄-tio̍h去」，伊講偉大ê上帝m̄是人隨便就ē-tàng指責ê。伊會án-ne講約伯，是因為約伯約伯一再要求上帝回答伊ê問題。M̄-koh，以利戶認為上帝是審判官，thang m̄回答人ê問題，ná親像傳道書第六章10節作者所講ê，人m̄ kah比伊偉大ê人抗辯。仝款ê，上帝比任何人lóng偉大，人無法度想beh kah上帝辯論。

    第14到16節，以利戶認為上帝並無沉默，卻是有回答，只是「無人注意聽伊ê話」。伊指責約伯並無專心注意聽上帝ê話，kan-taⁿ會要求上帝聽伊ê，這是錯誤ê態度。伊講上帝m̄-nā是對人傳達信息，上帝mā用「夢」á是「異象」向人啟示祂ê旨意。這表示即使人teh睏重眠，上帝mā無停止祂ê信息，因為上帝無需要歇睏。甚至為tio̍h beh hō͘人聽見祂ê話，上帝mā會用「警告嚇(heⁿh)驚」ê方式，hō͘沉睡ê人驚醒起來。

    第17到18節，上帝向人講話，為tio̍h beh hō͘人趕緊「棄sak罪行」，「bē致使自高自大」，以利戶chit種講法，已經teh提醒約伯，講伊經歷chiah-ni̍h大ê性命慘劇，koh khah應該tio̍h謙卑家己，án-ne chiah會明瞭上帝ê話。伊認為就是因為上帝慈悲、憐憫，雖然祂有絕對權柄thang hō͘人「落陰府」，m̄-koh祂並無án-ne做，而且顛倒，祂是一再施憐憫，beh救人「脫離死亡」。

第19到20節，Tī以利戶ê看法裡，「疾病」kah「身軀ê痛苦」，lóng是上帝管教ê方式。Á chit-má約伯tú好病得非常嚴重（參考七：5、十三：28、三十：17）。因為án-ne，Tī以利戶ê觀點裡，破病並無一定是pháiⁿ事，破病會hō͘人知影家己ê有限。

第21到22節，以利戶認為：無論人jōa-ni̍h-á有權勢、財富á是能力，對性命ê掌握iáu是非常有限。Chia所講ê「皮肉」、「骨頭」，lóng是teh指肉體，而「靈魂」則是teh指人ê心靈。肉體ê痛苦kah心靈ê苦悶，lóng tī說明人需要上帝ê扶持、看顧kah帶領。