Chit章ē-sái講是約伯記中siōng簡短ê一章，是比勒達回答約伯ê話。內容會chiah-ni̍h短，真可能是因為資料有遺失á是收集不完整。其實，若詳細閱讀chit章ê經文，會發見內容並無甚麼新意。因為án-ne，有kóa學者認為可能是有kóa經文資料被編者刪除了，因為在內文中有真chē重複ê字句。不過，chit種觀點並無夠額ê資料thang佐證。

請注意，chit章經文並無針對約伯tī頭前所敘述過ê話提出辯論，卻是講述創造宇宙萬物上帝ê偉大。這kah chìn前比勒達針對約伯ê話題提出強烈ê答辯，是真無仝款ê態度。這就呈現出一種奇怪ê現象：chiah-ê朋友kah約伯lóng是各講各話，lóng無交集。

第1到2節，chia提起「上帝有大權力」，因為án-ne「萬民tio̍h敬畏祂」，這表示所有ê人lóng應該用真誠ê心回應上帝，bē-tàng有輕浮、隨便ê態度。伊講上帝hō͘「天頂ê國度和平」，chit句話mā teh說明：是上帝用祂ê大能力，chiah hō͘ kui個混沌ê宇宙平息安定落來，因為人類bat想beh造塔kah上帝比高低（參考創世記十一：4），而且有強大ê君王想beh kah上帝互相比較量（參考以賽亞書十四：12—14）。Chiah-ê lóng是人類愚戇ê行為。

第3節，「甚麼人ē-tàng數算事奉」上帝ê「天使」有jōa-chē？天使就是所講ê「天軍」（參考路加福音二：13—14），in是聽從上帝命令指揮ê軍團（參考約伯記十九：12）。天使所負責ê範圍，m̄-nā tī天頂，mā包括人間，因為án-ne，世間無一個國家ê軍隊會比天使ê數目koh-khah-chē。Á天使ê出現往往就是用「光」作代表（參考馬太福音廿八：3，路加福音廿四：4）。上帝ê天使是chē到thang照亮世間ê每一個角落。

第4到6節，chit三節kā人kah上帝相比，koh khah顯示出人ê渺小kah有限。Tī chit三節中，比勒達一再表示對以利法觀點ê支持，這mā同時是beh kā約伯講，ài約伯khah聽前輩ê話。

比勒達ài約伯記tiâu：所有ê人tī上帝面前，就m̄-thang chiah koh講家己是無辜、無罪ê。因為上帝bē冤屈好人（參考約伯記八：3）。瑣法tī chia是語帶諷刺ê講約伯竟然iáu自認是好人，無瑕疵（參考十一：4）。伊質問約伯甚麼人ē-tàng講家己「純潔」、「正直」。伊用天頂ê星辰來譬喻，就算看起來是非常「皎潔」ê「月娘」、「星辰」，tī上帝眼中iáu是有陰暗ê一面。伊用chit種方式來對照人ê生存，意思是連星辰月娘lóng無夠完美，koh khah何況是會死而且身軀會長「蛆蟲」ê人（參考廿一：26），怎樣ē-tàng tī上帝面前講甚麼家己ê偉大？