約伯記 20章1節 到 20章29節   背景資料  上一筆  下一筆
Chit章是瑣法ê發言,mā是chit-ê 回合ê最後一位朋友發言。Tī第一回合中,伊mā是最後一位發言,而伊兩pái發言ê內容kah用詞lóng真嚴苛。其實,瑣法tī chit章ê講詞並無甚麼特別ê新意,iáu-koh是停留tī善有善報、惡有惡報ê傳統層面上,而且tī伊ê講法中,lóng tī說明約伯一定是犯罪真重,chiah會有chiah-ni̍h大ê苦難臨身。

    第1到3節,chit三節是瑣法表明伊無法度koh再保持沉默,因為伊受不了約伯án-ne「侮辱」朋友。伊指出約伯所講ê話hō͘伊「心煩意亂」,chit句話ê意思是teh指情緒bē穩、急躁、激動。因為án-ne,伊「忍bē-tiâu beh ài回答」伊講約伯所講ê lóng是「侮辱ê話」,chia所講ê「侮辱」,有含責備ê意思。

第4到5節,瑣法認為tī chit世界上,確實是thang看tio̍h「邪惡人」、「不虔ê人」興旺,m̄-koh chiah-ê人ê「得意lóng是目nih-á久」。Chit種講法就是聖經中典型ê智慧文學作品之特色,約伯ê chiah-ê朋友lóng真ài用類似chit種話來勸勉伊。

第6到7節,瑣法認為約伯ê談話充分顯示了伊ê驕傲,因為約伯有kúi-nā pái一再直接向上帝挑戰,親像:第九章32節、第十三章3、22到24節等等。約伯chiah-ê朋友ê觀念是,人算甚麼,怎樣thang án-ne向上帝講話?伊講人ê性命根本ná親像「糞土」仝款,會hông棄sak,甚至連丟gōa chēmā m̄知,chit種人,有甚麼好驕傲ê。

第8到9節,這是形容邪惡ê人所有ê一切,tī伊ê性命中lóng是真短促,ná親像喘做一睏就消失了,á是「如夢消失去」,醒來就消失à。瑣法ê chit種講法,是teh暗示約伯目前遭遇ê處境,顯示過去ê約伯,乃是虛有ê,不實在ê,taⁿ chiah會「消失得無蹤無跡」。瑣法認為邪惡ê人無論jōa-ni̍h-á有成就,其結果就是親像「夜間ê景象」,只要天一下光,koh-khah án怎都「見bē-tio̍h伊」ê影跡。因為chit種人真緊to̍h會ná親像「失蹤」ê人仝款,銷聲匿跡。這是因為上帝懲罰ê結果(參考以賽亞書廿九:7)。

第10到11節,第10節ê背景是一種「因果報應」ê觀念(參考出埃及記廿二:21—24)。瑣法chit種話,真顯然是teh暗示約伯á是伊ê 眾kiáⁿ,過去一定bat拒絕過窮乏人向in乞討,taⁿ換做約伯beh向人乞討,m̄-koh卻無人憐憫伊。瑣法認為作惡ê人即使過去「少年力壯」,m̄-koh「無久」就lóng會消失,無koh存在,ná親像「土粉」仝款。Chia ê「土粉」mā thang解釋為死亡。如聖經所講,人死了後kā tńg來歸「土粉」(參考創世記三:19)。

第12到19節,chit段經文lóng是用相對句型,來說明邪惡人ê處境,kah伊過去輝煌ê成就成對比。Mā是tùi chit節開始,以後ê詩歌lóng是描述邪惡ê人會遇tio̍h ê就是真實ê報應結果。

Tī chit段經文中,是用第15節做中心經文,然後有前後兩節經文相對;
(a)第12節kah第18節相對,kā「甘甜」ê物khǹg tī「嘴舌下腳」,意思是teh指伊tam bē-tio̍h真正甘甜ê氣味。Kah第18節ê「勞苦得來ê一切」,卻「無法度享受」chiah-ê「財富」仝款。

(b)第13節kah第17節相對,「tam味它ê氣味」應該是一件真甜美ê事,ē-sái講是邪惡ê人性命是目nih-á ê,真緊to̍h會消失(夭折),chit種人,即使有「流奶kah蜜ê溪流」,伊mā看bē-tio̍h這幅súi ê景象,koh-khah無可能享受擁有ná親像「江河」仝款chē ê「橄欖油」ê歡喜。

(c)第14節kah第16節相對,用「毒蛇ê毒汁」來形容ná親像被毒蛇咬中仝款,死亡已經臨到。

瑣法想beh表達一點:好人即使食了簡單ê食物,mā會受tio̍h祝福。相對ê,「邪惡人」即使食到ê食物非常好味thang口,mā會「發酸」敗壞,結果一食進腹肚裡,就變成ná親像「毒蛇ê毒汁」一般,kan-taⁿ會hō͘人kā所食進腹肚裡ê食物全lóng「吐出」來。瑣法tī chia強調講,上帝必定會收tńg來邪惡人原本收藏ê財富。Chit種觀念tī箴言ê作品中mā不時出現(參考箴言八:17—21)。伊認為因為邪惡ê人所有ê財富,tú好證明伊是由欺騙、欺壓得來ê記號。因為án-ne,就算伊kā財富藏tī別人看bē-tio̍h ê「腹中」,上帝mā會kā它「tùi伊腹中gîm出」。

第19節,thang參考彌迦書第二章1到2節。Chit種邪惡ê人是上帝所譴責ê對象。瑣法提出以色列人久長以來ê傳統生活規範:bē-tàng欺壓sàn-chhiah人。Chit節thang看出瑣法指責約伯就是chit種邪惡ê人,會欺負、剝削窮困ê人。

第20到21節,chit兩節連續用否定句型,包括「無」、「無法度」、「不留落來」、「無法度持久」等。瑣法提醒約伯「貪慾無止境」,而且在世間ê任何物件lóng「無法度保留」。伊用chit種方式teh kā約伯講,遇tio̍h án-ne悽慘ê境遇,就是因為家己所做邪惡ê事ê結果,致使甚麼都無留落來。

第22到23節,瑣法認為邪惡者tī「siōng滿足得意」ê時chūn,往往上帝已經決定beh伸手懲罰了,當上帝審判時刻一到,就是邪惡者災禍來臨ê時chūn。M̄免koh再在乎管邪惡人吞食jōa-chē財富,當上帝一發出「大受氣」,懲罰就會親像「暴風雨打擊」到伊身上,hō͘伊無法度逃脫。

第24到25節,thang參考阿摩司書第五章19節。Chit兩節真清楚說明邪惡ê人絕對無法度逃避上帝ê懲罰。上帝ná親像一個勇猛ê戰士,攻擊敵人從來m̄-bat鬆手。詩人mā持仝款ê看法(參考詩篇一三九:7—12),指出只有愚戇ê人chiah會想beh逃避上帝ê懲罰。

第26到28節,照瑣法chit種觀點,邪惡人所有ê一切lóng會真緊消滅,而這lóng是上帝親自懲罰chiah會án-ne。伊強調邪惡ê人犯罪必定會留落來明確ê證據,包括天頂ê天使會有記錄,地上ê土粉mā會留落來in作惡ê痕跡,因為án-ne「天」kah「地」lóng會做證,出來控訴邪惡ê人所做ê一切惡事。伊認為約伯就是因為作惡,chiah會引起上帝憤怒而hō͘伊所有ê財富「蕩然無存」。其實,約伯所beh控訴ê並m̄是伊tī財富ê損失,卻是帶來比chiah-ê koh khah大ê苦難,就是hō͘伊ê親朋好友侮辱,甚至譏笑伊,而且遠離了伊。

第29節,是chit首詩歌ê結尾語。瑣法只是無明講伊認為邪惡ê人就是約伯而已。

重新查詢 專卷研經 約伯記系列
錯誤回報,請聯繫comm[@]fhl.net