約伯記 17章1節 到 17章16節   背景資料  上一筆  下一筆
Chit章是約伯繼續回應以利法ê話,tùi第十六章到第十七章約伯回應ê話中,並無中斷ê句話,mā tùi chit兩章經文中thang看出約伯堅定ê信心。伊一直深信:即使所有ê人lóng認為伊犯重大ê罪過,甚至指控伊隱瞞罪證,所以chiah會受tio̍h上帝án-ne嚴厲ê懲罰,m̄-koh伊iáu是堅信上帝thang為伊做證,iáu伊清白,因為伊實在是無辜ê受難者。

第1到6節,chit段經文thang看出約伯kah頭前所表現出來之態度相差真大。Tùi第1節就thang看出伊是繼續第十六章22節所提起ê,對性命失望到極點ê感觸。伊tī chia講「墳墓teh當等我入去」,然後tī第11到16節則講墳墓已經thí開嘴隨時thang「收留」伊入去。這mā明白約伯感受tio̍h性命siōng大ê悲哀,乃是伊身軀已經痛苦到極點,卻iáu koh khah忍受親朋好友ê嘲(sau)笑kah戲弄,hō͘伊感覺身心俱疲,受創甚巨。

Tī chit段經文中mā thang看tio̍h約伯記tī性命陷入極大ê困境下,iáu是無bē記得走chhōe上帝ê幫助,而且深信上帝chiah是伊siōng好ê保證人(á是中保)。Tī chia ê「作保」(證實)一詞,mā thang看做是用「性命作保證」,án-ne,約伯已經表明伊ài kā家己ê性命獻hō͘上帝,只為tio̍h向上帝祈求作伊ê擔保者。伊會án-ne講,是因為到目前是連一個願意替伊作保ê人都無,因為伊陷入苦難中,致使親朋好友lóng因為án-ne懍neh,而m̄敢為約伯作保,甚至iáu認為伊是罪有應得(參考十六:7—8)。

第5節,chit節thang參考第六章27節。Chit節是當時流行ê俗語,表示朋友之間應該忠實以對,而且會tī危急ê時chūn相挺,卻m̄是背叛。Chit節mā強化第六章14到21節所提起ê,約伯認為當伊siōng需要朋友ê時chūn,chiah-ê朋友m̄-nā無幫助伊,而且iáu故意「出賣」伊。其實約伯ê chit句話kah-ná teh暗示伊ê chit三位朋友,有想beh併吞伊ê財產ê意思,in用chit種態度對待約伯,是因為in想beh hō͘約伯提早氣憤來死。因為án-ne,約伯繼續控訴chiah-ê朋友作為,對伊來講ná親像落井下石ê卑鄙行為。除了這以外,in iáu用koh-khah無堪ê方式侮辱伊,就是吐唾沫tī約伯ê面上,就ná親像tī第2節所提起ê嘲(sau)笑、戲弄仝款。

第7到10節,約伯有kúi-nā pái描述家己ê身軀狀況,已經jú來jú差,因為伊極大悲傷不斷啼哭而影響視力。M̄-koh約伯相信有án-ne ê一工,chiah-ê參與kā伊譴責ê朋友知影真相了後,lóng會感覺大tio̍h驚,因為in lóng參與譴責約伯而得罪上帝。M̄-koh約伯並無因為chiah-ê朋友ê強力指責,就失去信心而退卻,反tńg是要求伊ê chiah-ê朋友來kah伊公開辯論。伊beh hō͘ chiah-ê朋友知影,in並無比伊聰明jōa-chē(參考十二:3、十三:2)。

第11到14節,約伯koh一pái陳述家己對性命ê失望。Chit段經文thang tùi第十六章16節,á是tùi第十七章7節後面接落去,lóng是約伯teh哀嘆家己對性命ê極大失望。Tī chit段經文中,約伯ê講法已經teh表示:若是tī苦難中無法度減輕性命ê負擔,往往會hō͘人對未來無koh寄望。當人對生存ê日子產生心灰意冷ê人生觀ê時,常常會有過一工算一工ê消極態度出現。

Koh講,約伯mā指出伊ê chiah-ê朋友安慰伊ê話是虛假、表面ê話,因為事實並m̄是如in所講ê hit種,甚至認為in是顛顛倒是非,kā「烏夜」(指性命已經無希望)當做「日時」(指iáu有未來thang講)。伊講家己ê現況只有ē-tàng以「墳墓為父」,意思就是伊已經無「家」thang歸;á是「蛆蟲為母」,老母原本是beh養育gín-á長大ê,而蛆蟲則靠食人身軀ê肉維持性命,tú好kah老母ê角色顛倒。Á「姊妹」,原本應該互相照顧、扶持ê,因為「姊妹」生活做伙,mā同時同齊成長,chit-má則彼此互相殘殺。約伯用chiah-ê話來kā伊譴責ê chiah-ê朋友,in身為長輩,卻無親像老母仝款照顧伊,就算是同輩如姊妹,mā仝款未盡義務,kan-taⁿ會腐蝕伊ê性命而已。

第15到16節,約伯講「陰間」chiah是伊性命ê去處。M̄-koh若是成(chiâⁿ)實到à「陰間」,chit種人人koh有甚麼希望?其實約伯雖然是一再地提起「陰間」,m̄-koh伊並無清楚真正「陰間」是án怎ê景況,因為伊並無去過。

重新查詢 專卷研經 約伯記系列
錯誤回報,請聯繫comm[@]fhl.net