約伯記 13章1節 到 13章28節   背景資料  上一筆  下一筆
第十三章tùi第1節開始直到第18節止,chit段經文是約伯繼續teh回應拿瑪人瑣法所講ê話。然後tùi第十三章19節起,一直到第十四章22節,是約伯對上帝ê懇求。

第1到2節,chit兩節真清楚,約伯teh回應伊ê chiah-ê朋友講伊m̄知向有智慧ê老人á是先賢請益,m̄-koh約伯表示in所講ê chiah-ê自認為有智慧ê話,伊lóng知影,其實伊ê意思是伊比in lóng khah聰明,對上帝ê認bat koh khah深切。

第3到5節,第3節開始,約伯就講「beh向全能者理論」,chit句話ē-sái講是kui本約伯記ê中心思想。作者beh說明一個觀念:人thang kah約伯仝款,直接kah上帝爭論性命所tú-tio̍h ê苦境。「理論」一詞有含訴訟雙方tī法庭中進行「辯論」ê意思。原本約伯是「m̄敢kah上帝辯論」(參考九:14、19),後來伊開始有無仝ê想法,認為siōng好ê方式就是直接向上帝陳述家己ê狀況,因為上帝就是「法官」,án-ne,m̄-nā thang向祂陳述案情,iáu thang kah祂辯論,並且約伯深信家己會得tio̍h無罪ê宣判(參考第18節)。Koh講,tī約伯ê看法裡,伊ê chiah-ê朋友若是靜默不語,反tńg會是比較聰明ê作法,因為án-ne chiah bē顯露出in ê「無知」、「愚笨」。因為án-ne伊強調,chiah-ê朋友若是無講話,有可能iáu thang隱藏家己ê愚笨。

第6到8節,雖然tī第7節約伯提起「講白賊」、「假話」,這並m̄是講伊ê三位朋友講話不誠實,其實,伊ê三個朋友講話lóng真誠實,只是in對上帝ê認bat並無正確。約伯認為伊對伊所講ê,ná親像teh「想替上帝辯護」,伊講人無論怎樣用心想替上帝「辯護」,lóng是真愚戇ê作法kah念頭,因為上帝根本就無需要任何人替祂ê神聖辯護,mā無需要咱用任何方式為祂證明真正存在á無,koh-khah無需要咱用奉獻來滿足祂ê需要,因為上帝本身就是萬有ê上帝。

第9到11節,Tī chit段經文中,約伯真清楚提出伊ê看法:如果上帝ē-tàng chhōe-tio̍h伊ê錯誤,伊ê chiah-ê朋友mā bē比伊好jōa-chē。上帝是觀察細微ê,就算人tī暗中做偏袒ê事,上帝mā會清楚知影。每一個人面對上帝ê審判,lóng tio̍h感覺「驚惶失措」、「驚惶」。

第12節,chit節ē-sái講是約伯對伊chit三位朋友siōng尖酸刻薄ê一句話,約伯講in所講ê話ná親像一堆無用ê土粉。

第13到18節,約伯Tī chit段經文中真清楚表示,伊無希望koh再繼續聽伊chiah-ê朋友講落去。因為無用ê話,一句lóng嫌siuⁿ chē。伊tio̍h用真大ê勇氣直接向上帝申訴,伊ài chiah-ê朋友安靜聽伊向上帝申訴,án-ne,in就會明白伊為甚麼聽bē落去in勸勉ê話。堅持申訴到底,這是約伯目前ê態度。伊寧可因為發出抗辯ê聲音有性命危險,mā無願意因為驚死而默不作聲。第15節chia伊講「即使上帝刣我koh怎樣」,chit句話表明伊hit種kā命「豁出去」ê決定。伊án-ne講ê用意是teh表示家己真正是受tio̍h冤屈,只希望上帝會願意接受伊ê陳述、辯白。伊深信公義ê上帝絕對bē冤屈正直無罪ê人,公義ê上帝bē hō͘無罪ê人承擔有罪ê人所應該受ê懲罰。約伯講伊「已準備好勢beh提出ê抗辯」,beh向上帝陳述ê內容真有自信,相信必定會得tio̍h上帝ê接受,改判伊「無罪」,意思是停止伊ê苦難。

第19到23節,tùi第19節起到第十四章22節,chit段經文lóng是約伯轉向上帝陳述家己ê境遇,並且期待上帝ē-tàng kah伊直接對話。

Tùi第19節ē-tàng看出約伯堅決ê心。伊深信家己無犯錯誤,如成(chiâⁿ)實ē-tàng查出伊有任何犯罪行為,伊甘願接受懲罰來死。然後tī第20到21節約伯向上帝祈求兩件事:一是m̄-thang koh再「懲罰」、「恐嚇」伊(21節);二是hō͘伊thang直接kah上帝對話,án-ne伊就ē-tàng「答辯」(á是「辯論」,22節)。然後約伯期待kah上帝「辯論」,像tī法庭中ê檢察官kah被告辯論仝款(參考九:32)。Chit-ê意思真清楚,就是祈求上帝tī無聽tio̍h伊訴願chìn前,m̄-thang打擊伊,tio̍h等到聽完伊陳述了後,判定伊有罪,chiah來懲罰伊。約伯會án-ne提出要求,其主要目的就是希望上帝hō͘伊知影,伊到底是犯甚麼罪(參考十:2)?Chit點是kui本約伯記ê主要中心訴求。

第24到25節,連續對上帝發出四個問題:一是上帝為甚麼避無看tio̍h面?二是為甚麼上帝kā伊當做敵人看待?三是上帝為甚麼beh恐嚇伊?四是上帝為甚麼beh tui-jiok伊?約伯表示人ê性命是非常脆弱ê,ná親像「落葉」kah「枯乾ê麥hiūⁿ」無實質性命ê物件仝款,跟tòe風四界飄動,án-ne脆弱ê物,怎堪上帝用「恐嚇」kah「tui-jiok」án-ne嚴重ê懲罰來對待?

第26到28節,約伯充分說明家己性命ê無奈kah軟弱。伊期待上帝m̄-thang tùi伊年輕無知ê時代開始清算伊所犯ê罪過。因為hit種kan-taⁿ會hō͘伊感覺家己ná親像一塊已經朽爛ê木頭,á是親像一件蟲蛀過ê衫褲,一無是處。

重新查詢 專卷研經 約伯記系列
錯誤回報,請聯繫comm[@]fhl.net