約伯記 12章1節 到 12章25節   背景資料  上一筆  下一筆
Tùi第十二章開始直到第十四章,lóng是約伯回答瑣法ê話。Tī這部分thang分做兩大段落來看;一是tùi第十二章2節到第十三章19節,這部分是約伯針對伊chit三個朋友講ê話做一個整體ê回應。二是tùi第十三章20節到第十四章22節,這部分是約伯koh一pái向上帝提出伊ê申訴。因為án-ne,到第十三章就是約伯第一pái kah三位朋友對話ê結束。

Tī chit三章中有一個特色,約伯無對家己ê性命做任何自述,卻是針對瑣法所講ê話提出回應(參考十二:1—十三:18),mā同時回應了另外兩位朋友頭前所講過ê話。Tī chit部分,thang看tio̍h約伯差不多是用正khau倒削ê方式回應伊ê眾朋友。約伯認為chiah-ê朋友表面上看起來kah-ná真關心伊,所講ê話mā kah-ná真有智慧,m̄-koh對約伯來講,伊卻認為chiah-ê話,無甚麼內容,只是空洞、平淡ê言論。伊提醒chiah-ê朋友,上帝ê偉大無需要in來替祂辯護(參考十三:8)。

除了回答chiah-ê朋友所講ê話之外,約伯仝款無bē記得koh一pái向上帝提出伊ê抗告、辯護(參考十三:19—十四:22)。約伯iáu-koh強調家己是無辜受難(參考十三:23)。M̄-koh值得注意ê是,約伯並m̄是否認上帝,顛倒,伊iáu是無bē記得歌頌上帝ê偉大。

第1到5節,因為tī第十一章12節b句,瑣法講「無知ê人無法度變成聰明」chit句話,hō͘約伯真oh消受,因為án-ne,約伯teh回答瑣法ê話中,一開始就真諷刺ê講「Lín是有智慧ê人」,m̄-koh,約伯卻講in ê智慧lóng「beh kah in同齊死」。Mā就是講,in自認真有智慧,是菁英份子,m̄-koh tī約伯看起來,mā只不過是kah一般人仝款平凡,無甚麼特別á是了不起ê所在。約伯認為如果伊ê chiah-ê眾朋友有智慧,án-ne,伊ê智慧並無會比in差。Ná親像tī第九章2節a句約伯teh回答比勒達ê話ê時,講比勒達所講ê道理,伊lóng知影,無甚麼特別ê所在。約伯表明家己受hiah-ni̍h大ê苦難,m̄-nā無得tio̍h眾朋友ê慰藉,反而成做in譏笑ê話題。

    第6節,chit節tú好回應了第十一章17到20節瑣法所提起ê:只要走chhōe上帝,必定會得tio̍h上帝加倍ê祝福。M̄-koh約伯卻質疑地真正得tio̍h興旺ê,卻是hiah-ê盜賊。Tī約伯ê看法是:一般人ê錯覺是認為只要事事順利、興旺就是得tio̍h上帝祝福。因為án-ne,若是一個邪惡ê人興旺ê時,一般人就認為hit人是得tio̍h上帝ê祝福,這是非常錯誤ê。其實真實ê世界並m̄是án-ne,hiah-ê人乃是做邪惡ê tāi-chì、掠奪別人財產,chiah因為án-ne飛黃騰達。約伯用chit種觀念teh表達對上帝遲緩懲罰惡人ê不滿。

第7到11節,chit段經文是teh回應第十一章8到9節瑣法稱頌上帝創造ê偉大,mā是第三十八到四十一章ê縮影。Mā tú好表示出約伯心目中ê上帝,是一切性命ê源頭,所有受造ê萬物lóng會為上帝見證。

約伯mā是透過chit段詩歌teh表達一個中心思想:所有ê生物,其性命ê一切境遇、現象,lóng kah上帝ê創造有關。因為宇宙萬物lóng是tī上帝計畫中出現ê,因為án-ne,包括人性命ê境遇mā是tī上帝ê旨意下chiah發生ê。約伯tī chia提出ê反駁是:只要注意身邊ê動物,包括看會tio̍h ê飛禽行獸、地上ê生物kah海中ê魚類等就ē-tàng明白,m̄免去看hiah-ê遠古ê教示,hiah-ê距離現實siuⁿ遠。約伯用chit種話teh回應伊ê朋友,上帝創造性命,並m̄是beh hō͘人痛苦。因為án-ne,並m̄是親像瑣法所講ê,上帝beh懲罰甚麼人,就出手打擊甚麼人(參考十一:10),伊認為慈悲ê上帝必定不會án-ne。伊相信創造ê上帝,對所有ê受造物lóng有主權。換句話講,無任何一個受造物,ē-tàng脫離上帝。然後伊tī第11節用了一句流行tī古代中東ê諺語,講出世間ê人情冷暖,每一個人ê心中lóng真清楚。伊用chit句話teh表明,chiah-ê朋友中間甚麼人是真正關心伊,á是講甚麼人chiah真正明白伊ê心境,伊lóng真清楚。

第12到15節,約伯無反對chiah-ê朋友所講ê老人有智慧,m̄-koh約伯認為真正智慧,應該是認bat上帝奇妙ê作為,而這kah年紀並無直接關係。因為án-ne,若認為老年人必定非常認bat上帝,he是太膚淺à。伊講「上帝既有見識koh有實行ê能力」,m̄-koh若kā老年人ê性命經歷用來表示對上帝ê認bat,he是無正確ê。因為上帝ê見識kah能力,lóng大大超過人ê能力範圍。就算hō͘人認為有智慧ê老人,mā無法度改變上帝ê創造,甚至只要上帝停止落雨,人就面臨乾旱ê痛苦,而若是上帝hō͘大雨繼續降落,大地就氾濫成災。約伯用chit種譬喻說明老人即使有智慧,kah上帝相比,根本算不了甚麼。

第16到21節,chit段經文提起上帝對世間有權勢ê人ê主宰權。伊先提起兩種人,一是「欺詐kah被欺詐ê」,chit-ê意思是teh指世間所有ê人。Mā ná親像一般人所講ê「好人」kah「pháiⁿ人」ê意思。意思是無論是甚麼人,其實lóng tī上帝掌握ê中間,無人ē-tàng逃得了上帝ê審判。續落來伊用「統治者」,kah「君王」等在世間被看做有權勢ê人,tī上帝手中,上帝ē-tàng hō͘ in變成「愚拙」,甚至成做「囚徒」,因為上帝chiah是主宰者。

續落來約伯提起「祭司」,這是聖經時代ê宗教領袖,以及所謂「眾望所歸」ê人,這是teh指hiah-ê tī社會上有名望ê人,mā是社會ê意見領袖,m̄-koh chiah-ê人無論án怎mā lóng ài面對上帝ê審判。特別是hiah-ê「居高位」ê人,若是m̄知悔改歸向上帝,最終kan-taⁿ會「蒙羞」kah「失去權力」。

第22節,chit節khǹg tī-chia,hō͘ beh接落去ê第23到25節經文之脈絡看起來kah-ná中斷。Á是允准án-ne理解,真chē人tī暗中所策劃ê計謀,上帝lóng會真緊揭露出來,無法度隱藏。Ná親像耶穌所講ê,隱藏tī暗中ê事會hō͘揭發仝款(參考路加福音十二:2)。

第23到24節,kah第18到21節所描述仝款。

第25節,thang對照第五章14節,約伯強調只要上帝出手打擊,就算是擁有世間siōng大權柄ê君王,mā會親像lim醉酒ê人仝款,行路bē穩,東倒西歪ê。Chit種政權真緊to̍h會垮台。


重新查詢 專卷研經 約伯記系列
錯誤回報,請聯繫comm[@]fhl.net