耶利米書 6章16節 到 6章30節   背景資料  上一筆  下一筆
Chit段經文koh一pái說明猶大人民偏行己路,固執ê心並無因為敵軍已經兵臨城下而歸向上帝,而凶悍ê侵略者,已經絕對m̄是猶大人民ê能力所ē-tàng抵擋、承受,上帝ài先知耶利米kā猶大人民講tio̍h趕緊悔改走chhōe上帝ê庇護,上帝願意拯救in,m̄-koh in ê心內卻iáu-koh剛硬,m̄肯聽從上帝ê話語,最後,上帝只好放棄,hō͘ in去承受苦難。

第16到17節,上帝「苦勸」猶大人民「tio̍h khiā tī十字路口觀察」,詳細觀察並「探問hiah-ê舊路,查一查hit條siōng好ê路」。Chia ê「舊路」、「siōng好ê路」,是teh指「祖先ê道路」,意思是teh指摩西帶領以色列人民行出埃及進入曠野ê時,一再教導以色列人民ê祖先,tio̍h謹守、遵行上帝ê誡命、律法,就ē-tàng存活落來。M̄-koh猶大人民並無聽上帝ê苦勸,包括上帝「指派守望者,替in聽警報ê角聲」,in mā是仝款聽tio̍h警報聲了,iáu m̄相信。

第18到21節,chit段經文記載上帝決定懲罰猶大民,「降災禍hō͘ in」,即使in獻上siōng美好ê「乳香」、「香料」,認為án-ne thang hō͘上帝歡喜,m̄-koh上帝拒絕in任何獻祭,因為祂只希望猶大人民聽從祂ê話。M̄-koh in iáu-koh m̄聽,結果就是面臨國家「滅亡」,人民死亡慘重。

第22到23節,chia koh一pái提起「「有一個民族beh tùi北方來;tī遠方ê一個強猛國家準備ài作戰」,這lóng是teh指巴比倫帝國。In有好ê軍事武力,而且手段非常「蠻橫殘暴」,「準備ài攻擊耶路撒冷」。

第24到25節,chia真清楚指出,敵人已經進入城內,進行搜索ê工作。只要看見人,就會刣戮。Chia形容耶路撒冷城內ê猶大人民心中ê感受,「像產婦陣痛」、「周圍充滿tio̍h恐怖」,chit種句話lóng是先知耶利米常用ê句話(參考二十:3、10)。

第26到30節,chit段經文是上帝kā猶大人民講,in拒絕聽從上帝ê信息之結果,就是:「披上麻衣」、「tī灰中phah滾」、「悲傷哀號,向喪失獨生kiáⁿ」仝款ê悽慘,原因是猶大人民是「頑劣ê叛徒,in ê心非常「剛硬」、「腐敗」,結果別國ê人民會kā in當做「渣滓」仝款看待,就是因為「上主hiat-ka̍k了in」,hō͘ in成做無價值ê廢物。

重新查詢 專卷研經 耶利米書系列
錯誤回報,請聯繫comm[@]fhl.net