耶利米書 52章1節 到 52章11節   背景資料  上一筆  下一筆
Chit章是談起關係耶路撒冷城被巴比倫帝國ê軍隊攻破,而且聖殿被燒毀ê經過,以及猶大ê以色列人民被俘虜到巴比倫去做奴隸ê情景。M̄-koh有關耶路撒冷城被攻破摧毀ê部分lóng tī第三十九章1到10節已經記載過,尤其是這第五十二章所記載ê內容kah列王記下第廿四章18節到第廿五章21節、第27到30節完全仝款。對照來看,教會發見耶利米書ê編者,kā列王記下第廿五章22到26節,chit段有關巴比倫王尼布甲尼撒任命亞希甘ê kiáⁿ基大利作猶大總督ê記事省略,m̄-koh卻增加一段尼布甲尼撒王俘虜猶大以色列人民ê統計人數,特別是tī第30節提起第三pái俘虜以色列人民ê行動。

有學者認為chit章就是耶利米書編輯者附加上去ê。主要teh表明:先知ê預言確實是實現了,猶大王國確實是滅亡了。編撰者khah強調:先知傳達上帝ê信息雖然聽起來真不爽快,m̄-koh he確實是上帝ê信息,m̄-thang疏忽。上帝透過祂忠實ê奴僕先知所傳出來ê信息一定會聽,千萬m̄-thang藐視先知所傳達出來上帝ê話,若無,會為性命帶來koh khah大ê災難。

Chit段經文差不多kah列王記下第廿四章18節到第廿五章7節完全仝款。會出現仝款ê記事,真可能是採用仝款ê資料所致。是teh描述猶大西底家王受掠,伊ê kiáⁿ tī伊面前被巴比倫王尼布甲尼撒殺害,伊被挖出目睭,然後用銅鍊鎖tiâu帶到巴比倫去做奴隸ê記事。

第1節,chia講「西底家二十一歲ê時作猶大王」,這是主前596年。Tī「耶路撒冷統治十一年」,這是teh指主前586年。「伊ê老母哈慕伊」,是約西亞ê bó͘,mā是約哈斯kah西底家ê老母(參考列王記下廿三:31、廿四:18)。

第2節,「西底家王做上主看做邪惡ê事,像約雅敬所做仝款」,chia雖然無明確說明in到底做甚麼事hō͘上帝hit種受氣,m̄-koh卻指明kah約雅敬王仝款,án-ne就ē-tàng tùi約雅敬所做ê事來了解。耶利米書第廿六章20到23節則記載一件有關約雅敬王刣死了上帝ê奴僕先知烏利亞。Chit位先知kah耶利米仝款,lóng真忠實傳達上帝ê信息。M̄-nā án-ne,tī耶利米書第廿二章13到17節mā記載,約雅敬王tī國家為tio̍h賠償埃及ê戰爭費用ê時,iáu大興土木興建富麗堂皇ê宮殿,m̄-nā貪圖家己ê利益,甚至iáu流了無辜者ê血,以暴力壓制人民等,chiah-ê lóng是上帝無法度容忍ê事。約雅敬án-ne做,西底家mā tòe學做chit種邪惡ê事。

第3到7節,chit三節提起巴比倫軍隊圍困耶路撒冷城ê情景。上帝對祂ê子民「受氣」,是透過巴比倫軍隊來懲罰,無koh hō͘猶大人民khiā起tī「耶路撒冷」,hō͘ in到外邦地區去做奴隸,á是過痛苦生活。

「西底家背叛巴比倫王尼布甲尼撒」,chit句話thang參考歷代志下第三十六章13節,西底家王bat chiù-chōa tio̍h忠實tī巴比倫,聽從巴比倫帝國ê命令,m̄-koh結果並無照約束而行,而且拒絕聽從先知耶利米傳達hō͘伊上帝ê信息kah警告(參考耶利米書三十:17—19)。結果巴比倫軍隊西底家王在位ê「第九年十月十日」開始攻打耶路撒冷,一直到伊在位ê「第十一年」四月初9,這就是主前586年7月18日,án-ne,巴比倫軍隊圍城時間總共長到一年六個月。因為城裡「飢荒非常嚴重,人民無糧食」,結果是軍隊就棄械投降了。

第8到11節,雖然西底家王帶家眷重臣,以及禁衛軍同齊逃離耶路撒冷城,m̄-koh iáu是hō͘尼布甲尼撒王ê軍隊tī「耶利哥ê平原」tui-jiok上了,巴比倫軍隊俘擄了西底家王kah伊ê家眷,然後kā伊押解到tú-teh「利比拉」ê尼布甲尼撒王面前「審判」。

「利比拉」,這mā是當年埃及王尼哥ê軍事總部,tī chiamā bat囚禁猶大ê約哈斯王。Taⁿ chit-ê所在變成尼布甲尼撒王ê軍事總部,mā tī chit所在審問猶大末代國王西底家。巴比倫王尼布甲尼撒是非常殘酷ê國王,伊當tio̍h西底家面前kā伊「所有ê kiáⁿ lóng處死」,mā同時「處死去猶大ê眾首領」。續落來是kā西底家「兩隻目睭挖出來,用銅鍊鎖tiâu伊」,然後kā伊帶到巴比倫去,「關tī監獄裡,直到伊往生ê日子」。

重新查詢 專卷研經 耶利米書系列
錯誤回報,請聯繫comm[@]fhl.net