耶利米書 46章13節 到 46章28節   背景資料  上一筆  下一筆
Chit段詩歌ê歷史背景kah前段相差有將近有40年ê時間。因為前段詩歌提起埃及攻打巴比倫是tī主前605年,而chit段詩歌描述ê是巴比倫軍隊攻擊埃及,he是tī主前568 á是567年之間。整段詩歌描述巴比倫軍隊進攻埃及,致使埃及嚴重受創,差不多無法度khiā立,tùi chit-ê蹶不振。

M̄-koh Tī兩強中間苟延殘喘ê猶大人民,上帝iáu是會照顧,上帝提出祂ê應允,祂beh帶領猶大kah以色列人民tńg去故鄉重建家園。這說明上帝ê慈愛,祂雖然用嚴厲ê手路懲罰背叛ê以色列人民,m̄-koh祂並無棄絕in,因為上帝乃是個信實ê上帝,祂遵守kah以色列人民祖先所立ê約,beh成做in ê上帝,永bē改變kah祂ê子民之間所立ê約,因為chit-ê約是永遠ê約,mā是性命ê約。

第13節,「巴比倫王尼布甲尼撒進攻埃及ê時chūn」,這是發生tī主前568年á是主前567年ê時chūn,mā就是尼布甲尼撒在位ê第37年,hit時埃及國王名叫亞馬西士二世。Chit時chūn,上帝ài先知耶利米傳出祂ê信息。

第14到16節,chia講埃及全國lóng武裝起來,準備防禦巴比倫來入侵。

「密奪」,這是埃及ê軍事要塞。

「答比匿」,這是設tī尼羅河下游三角洲東部孟沙樂湖口以南ê所在,mā是當時埃及重要ê港口城市。

「挪弗」,是下埃及ê siōng重要城市。

Chia指出chit三個城市beh「起來,準備作戰」,真清楚表是巴比倫軍隊會用猛烈ê戰火攻擊這三座重要城市。M̄-nā án-ne,而且講出這三座城市會遇tio̍h「吞滅」。這是連埃及人所崇拜、óa靠ê「大牛神亞比士」,mā被phah倒「仆倒」tī土腳,亞比士並bē-tàng保護埃及ê安全,因為上帝「Kā它擊倒了」。因為連守護神lóng無法度自保,埃及軍人為tio̍h beh自保,大家lóng紛紛「tńg來到老家去」避難,好遠離「敵人ê刀劍」。

第17 kah 18節,chit兩節詩歌tú好成對應句;第17節提起埃及王是一個「phòng風王」,意思是teh指伊所誇耀ê武力並m̄是真實ê,是不堪一擊ê。M̄-koh相對ê,耶和華上帝是「萬軍ê統帥」,包括巴比倫ê軍隊ê皇帝「尼布甲尼撒」lóng是tī祂ê指揮下行事、用兵。先知耶利米就bat指出尼布甲尼撒王就是上帝揀選ê奴僕(參考廿五:9、廿七:9、四十三:10),而奴僕只有ē-tàng聽從主人ê指揮。Á tī上帝指揮下ê巴比倫軍隊之陣容,比「伊泊山」kah「迦密山」iáu koh khah雄偉,埃及ê軍隊根本不堪打擊。

第19到24節,chit段詩歌lóng是teh描述埃及tī強大ê巴比倫攻擊之下,顯露出來ê慘敗景況。

Chia講「挪弗會變成廢墟」,頭前有提過chit-ê城市是下埃及ê首都,若是變成廢墟,表示已經被攻落、摧毀了。因為巴比倫帝國ná親像依附tī牛隻身上ê一種吸血蟲「牛虻」仝款。埃及ná親像一隻肥壯ê牛,mā會因為牛虻ê攻擊,致使死亡、毀滅。Á埃及雇用來相戰ê「傭兵」tī大難來臨ê時,「個個轉身逃走,無一個挺身作戰」,án-ne,埃及根本lóng無抵抗巴比倫軍隊攻擊、蹂躪ê能力。Á巴比倫軍隊ê人數是遠比「草蜢koh khah chē」,而且是chē到「bē-tàng勝數」,結果是phah敗仗ê埃及人只有ē-tàng「蒙羞受辱」。

第25到26節,chit兩節是散文體,lóng是關係埃及ê神明kā lóng被消滅,所有ê貴族,包括國王kah領導者lóng會hō͘巴比倫帝國所消滅。

「底比斯」,這是設tī埃及南部ê城市。Á「亞捫」是chit-ê城市敬拜ê主要神明,ē-sái講是埃及人認為siōng偉大ê神。

Chit兩節經文mā有一個特點:埃及thang得tio̍h復興ê機會。為甚麼上帝會hō͘埃及有機會得tio̍h復興?Chia並無說明,不過有可能chit兩節經文是屬tī khah後期ê作品,主要teh說明埃及後來並無被巴比倫帝國hō͘完全消滅。

第27到28節,chit兩節講出慈悲上帝對以色列民族ê特別厚愛。當tī巴比倫kah埃及相戰中,siōng擔憂ê就是hō͘統治ê弱小國家、族群。Chia講上帝hō͘猶大kah以色列人民一份特別ê恩典,就是ài in「m̄免驚」,mā「m̄-thang驚惶」,上帝beh「搶救」in,並帶領in「tńg去故鄉」,hō͘ in thang「安居樂業,無所驚惶」。因為會有上帝kah in同在。

重新查詢 專卷研經 耶利米書系列
錯誤回報,請聯繫comm[@]fhl.net