耶利米書 44章1節 到 44章30節   背景資料  上一筆  下一筆
第四十二到四十三章講tio̍h tī巴比倫帝國統治下ê猶大殘存軍事將領約哈難等人,雖然是懇求先知耶利米替in祈求,因in想beh知影上帝ê旨意,並且chiù-chōa講:「無論上主—咱ê上帝ê話是好是pháiⁿ,咱一定聽從。」(四十二:6a),ē-sái講是,當先知耶利米tī十工了後得tio̍h上帝ê啟示講,ài chiah-ê殘存ê猶大軍事將領留tī猶大kah「hiah-ê siōng窮苦、無財產ê人」ê同胞同齊重建家園,上帝甚至ài先知耶利米kā chiah-ê殘存ê猶大菁英講beh建立in,bē拆毀in;培植in,不拔除in,因為上帝已經「後悔」懲罰猶大(參考四十二:10)。M̄-koh chiah-ê將領、菁英雖然bat信誓旦旦講會聽從上帝ê旨意,m̄-koh後來ê反應卻是違背in chìn前所chiù ê chōa,卻是照家己所認為安全ê路徑,逃向埃及去避難。

第四十四章真清楚記載先知耶利米對hiah-ê執意m̄聽從上帝信息而流亡到各地去避難ê猶大菁英發出信息,既然in堅持m̄聽從上帝ê話,án-ne,無論in逃gōa chē,lóng會tī「家己決定beh去ê所在遭遇戰爭、饑荒á是瘟疫來死」。Mā就是講,人如果teh kí上帝ê名chiù-chōa,就一定tio̍h確實照所立ê誓願去行。以藐視ê態度回應上帝慈愛ê人,祂絕對bē任其囂張、逍遙,即使逃到天涯海角mā是仝款。

Chit一章mā特別提起有kóa婦女kah in ê丈夫公開對先知耶利米表示,in已經向所拜ê偶像神明許過願,mā因為án-ne而得tio̍h飽足,享受tio̍h安樂ê福氣,無tú-tio̍h遭禍。M̄-koh in chit-má卻因為聽從先知耶利米ê話,而災難連連,痛苦無停。先知耶利米聽了後,無加講甚麼,只表示既然in執意án-ne行,就去pah。M̄-koh in會親目看tio̍h in ê國王西底家受tio̍h巴比倫國王ê處置,包括in認為安全ê埃及mā會仝款受罰,埃及國王合弗giú mā會tú-tio̍h仝款ê運命。

Chit段經文lóng是先知耶利米傳出上帝beh嚴厲懲罰chiah-ê囂張ê猶大菁英之信息。Chit段經文真可能是tī耶路撒冷淪陷chìn前,先知耶利米對全體南國猶大人民所講ê話。Á其講話ê時間可能是tī一個重要節期中,有真chē來自已經移居外國ê以色列人民回鄉參加節期活動ê時。M̄-koh mā有無仝ê意見認為這本來是先知耶利米對hiah-ê逃走到埃及去ê猶大菁英,mā就是約哈難等人所講ê,後來編者認為應該kā它擴大範圍,hō͘所有早已經去到外國避難ê以色列人民lóng ē-tàng明白上帝bat透過先知耶利米警告in,可惜ê是in lóng拒絕聽從上帝ê話,而且kā棄sak上帝當做是「理所當然」ê事。M̄-koh先知耶利米iáu是beh提醒散居tī外面國ê以色列人民,千萬tio̍h會記得:棄sak上帝ê結果就是災難會永遠kah跟tòe in,即使in是寄居tī大家認為安全ê所在á是國家,mā是仝款。

第1節,chit節指出hiah-ê流亡到「埃及」去避難ê人,分別散居tī「密奪、答比匿、挪弗,kah埃及南部」等地方。chit-má上帝ài先知耶利米kā in講關係in ê「運命」。

第2到6節,先知耶利米kā chiah-ê流亡到埃及等地去ê猶大人民講,上帝一定會降災難tī in原本引認為傲ê耶路撒冷,以及猶大各城市,因為in ê緣故,上帝beh會hō͘耶路撒冷kah猶大各城市成做廢墟「無人khiā起」,主要原因是上帝差遣祂ê奴僕傳達信息hō͘ in,m̄-koh in「lóng是m̄聽,mā m̄-chhap,m̄肯放棄向別ê神明獻祭ê惡習」。

第7節,chit節是上帝ài先知耶利米提問chiah-ê猶大菁英ê問題,問in「為甚麼」ài做上帝看做討厭ê事?為甚麼beh hō͘ in kah家己ê後代lóng「滅絕」?這tú好說明in心中根本to̍h無上帝,只有利益。

第8到9節,chit兩節清楚說明chiah-ê人即使是逃到埃及去,iáu是仝款積習難改,in已經習慣拜偶像,tùi án-ne「激怒」了上帝。而且是「猶大君王kah王后」等領導階層者帶頭拜偶像,做上帝看做「邪惡ê事」。Án-ne chiah是真正ê問題所在。因為chiah-ê領導者對上帝無忠實,人民就會放肆,棄sak上帝。

第10節,「直到今á日」,這是teh指先知耶利米勸勉in、公開指責in ê時刻。Chiah-ê逃走到埃及去避難ê猶大菁英,iáu m̄知「痛改前非」,m̄知beh「敬畏」上帝,mā m̄遵守上帝ê律法誡命。因為會「敬畏」上帝ê人,必定會遵守上帝所頒佈ê律法誡命。

第11節,chit節講出上帝決定採取嚴厲懲罰ê方式,就是beh「毀滅kui個猶大」。

第12節,特別指出約哈難等chit群逃走到埃及去避難ê菁英,因為m̄聽上帝ê話,「硬beh逃走到埃及去tòa」,m̄-koh結果是仝款會hō͘上帝「全部消滅」,無論in ê「地位高低lóng tio̍h tī埃及戰死á是餓死」,就是戰爭、饑荒、瘟疫ê災難會緊跟tòe in。

第13到14節,chit兩節真清楚講出上帝用「戰爭、飢荒,kah瘟疫」懲罰耶路撒冷,mā tio̍h用仝款ê方法懲罰chiah-ê逃「到埃及去」ê猶大人民,而且是「無一佳哉免得」,無人ē-tàng koh再tńg去猶大故鄉。

「除了少數難民」,chit句話mā koh一pái說明上帝tī極大ê忿怒中,lóng是存留teh恩典,無全部毀滅,卻是留tio̍h殘存m̄-koh忠貞tī上帝ê子民。

Chit段經文特別提起為甚麼chiah-ê tī埃及ê猶大人民會m̄聽從先知耶利米ê話,特別是一陣眾婦女,原因是in認為bat tùi所拜ê偶像神明得tio̍h福氣,taⁿ ài in表示堅決無放棄向偶像神明燒香獻祭。因為án-ne,先知耶利米轉達了上帝ê信息hō͘ chiah-ê拒絕改過歸向上帝ê猶大人民,清楚kā in講,上帝一定會嚴厲懲罰in,而懲罰ê方式,就是用戰爭、饑荒、瘟疫等。為tio̍h beh證明上帝ê話是真,上帝beh hō͘ in一個記號。

第15到18節,chit段經文mā說明chiah-ê逃到埃及去避難ê猶大菁英,kah一kóa猶大人民ê婦女,in提出in拒絕聽從先知耶利米轉達上帝信息ê原因,就是in bat允准bó͘去向偶像神明祭拜,結果得tio̍h chiah-ê偶像神明ê回應,hō͘ in豐富ê物質生活,thang「食得飽,非常享福,無災無禍」,ē-sái講是當in聽先知ê苦勸,m̄-thang koh再拜偶像後,卻發覺災難連連,in ê「同胞m̄是戰死就是餓死」。Chiah-ê理由hō͘ in無願意繼續聽從先知耶利米ê話,決定koh再tńg去拜偶像。In ê chit種講法kah主前第八世紀先知何西阿譴責北國以色列人民bē記得上帝ê恩典完全仝款(參考何西阿書二:8)。

第19節,chiah-ê婦女特別提醒先知耶利米,講in會án-ne做,並m̄是家己暗中去做ê,卻是眾丈夫lóng同意了後in chiah去做。Chit種回答是有根據ê,根據摩西律法ê規定,cha-bó͘人beh下願做甚麼事,有丈夫同意就ē-tàng(參考民數記三十:6—16)。因為以色列人民ê宗教事務,是cha-po͘人teh決定ê,cha-bó͘人只有ē-tàng聽從cha-po͘人決定ê事去行。Chiah-ê cha-bó͘人向先知耶利米提出chiah-ê答辯ê時,其實mā是teh表明in所行ê,並m̄是只出tī家己ê主張,卻是有丈夫ê認thang。

Chiah-ê人án-ne回答,thang tùi列王記下第廿二章到第廿三章30節,á是歷代志下第三十四章到第三十五章,有關約西亞改革猶大宗教信仰ê情形看會tio̍h。伊雖然真致力tī改革ê運動,卻tī一場kah埃及軍隊ê戰爭中往生,hō͘猶大ê以色列人民無法度接受chit種打擊,認為約西亞王就是因為摧毀巴力神廟kah女神亞舍拉神柱,chiah會tī戰爭中往生。Á tī歷代志下ê記錄中,約西亞推動ê宗教改革運動kah先知耶利米是有關連ê(參考歷代志下三十五:25),這就是為甚麼chiah-ê人會對先知耶利米講:「咱m̄聽你奉上主ê名對咱講ê話。」因為in認為聽從先知耶利米ê話,結果是國王tī戰場上往生,致使國家需要賠償埃及ê龐(pâng)大軍事費用(參考歷代志下三十六:3),hō͘ in開始面臨挨餓、生活困苦ê結果。

M̄-koh in bē記得一件非常重要ê事:為甚麼需要約西亞進行宗教改革?就是因為因棄sak上帝,致使in所行ê事lóng離開上帝ê誡命,行盡一切ê pháiⁿ事(參考耶利米書七:5—15),因為án-ne,當約西亞teh進行改革ê時,其過程是非常艱辛ê,因為伊繼承落來ê是伊阿公瑪拿西、老父亞們所留落來ê宗教信仰墮落ê弊病。其實,beh改掉上兩代留落來ê弊病,卻m̄是一朝一夕thang成,甚至有時chūn會開koh khah chē ê時間chiah ē-tàng完成。Mā thang án-ne講,如果m̄是瑪拿西kah亞們兩代tī信仰上ê墮落,約西亞thang m̄免花hiah-ni̍h chē時間tī進行宗教信仰改革,伊thang真緊完成國家大事、人民心靈ê更新,而hō͘國家koh khah符合上帝ê旨意,猶大國真可能會因為án-ne koh一pái恢復大衛王朝時代ê輝煌景象。

第20到23節,chit段經文是先知耶利米回應in ê話。伊hō͘ chiah-ê猶大人民知影,上帝真清楚in tī大街小巷中燒香獻祭hō͘偶像神明,只是上帝憐憫in,無降大ê災禍hō͘ in,結果in卻認為上帝根本khah輸迦南神明巴力kah天后。先知耶利米hō͘ in知影,taⁿ災難來臨,就是上帝hō͘ in ê回答。先知耶利米koh一pái強調,in會tú-tio̍h大災難降臨,是因為in棄sak上帝,去拜別人ê神明,「m̄遵守上帝ê誡命」,得罪了上帝。

第24到25節,先知耶利米傳出上帝ê話,講既然in執意beh拒絕上帝,上帝就無koh chhap in,tòe in去。這mā是使徒保羅所講,當人故意m̄承認上帝ê時,上帝會「chhut-chāi」chit種人去做伊想beh做邪惡ê事(參考羅馬書一:24、26、28)。

第26到27節,上帝表示拒絕koh再hō͘ chiah-ê悖逆ê猶大人民使用祂ê「聖名」,並且koh一pái提起上帝beh hō͘ in戰死,á是因為瘟疫而「病死」,直到「全部消滅」。

第28節,tī chit節卻講出上帝tī極大ê忿怒中iáu有慈悲憐憫,祂會看顧ná一陣忠實tī祂ê子民,祂決定留落來chiah-ê人來做見證。Chit種留落來一kóa少數人做見證,就是先知文獻中一再出現ê「殘存ê人民」,á是用「劫後餘生」chit-ê詞,表示上帝是慈悲、憐憫ê,猶大人民雖然惡質到足以完全消滅in,m̄-koh上帝無án-ne做,祂iáu為in留落來延續以色列民族命脈ê一小群殘存ê人。

第29到30節,為tio̍h beh hō͘猶大人民確信上帝ê信息,上帝決定hō͘ chiah-ê猶大人民「一個記號」,證明上帝ê懲罰一定會來臨。這記號就是除了巴比倫王尼布甲尼撒王thang為tio̍h án-ne事做見證外,mā有「埃及王合弗giú」mā會hō͘巴比倫王掠、殺害,無法度庇護hiah-ê去埃及ê避難者。

重新查詢 專卷研經 耶利米書系列
錯誤回報,請聯繫comm[@]fhl.net