耶利米書 42章1節 到 42章12節   背景資料  上一筆  下一筆
根據第四十章6節ê記載,先知耶利米被巴比倫將軍尼布撒拉旦釋放後,是tńg來到基大利ê身邊,去協助重整殘存留落來siōng貧困ê猶大人。Ē-sái講是發生chit件大屠殺ê事件,卻都無看見先知耶利米傳出任何譴責ê信息,m̄-koh tùi這第四十二章thang發見,原來伊起先並不知情,是chit群採取救援ê約哈難等軍官tńg來chhōe先知耶利米了後,伊chiah知影原來發生chit件殘酷ê事件。Ē-sái講是,即使是án-ne,伊iáu是無對chit-ê tāi-chì發出譴責ê聲音,chit點一直被聖經學者感覺gông-gia̍h bē了解。

Chit段經文mā是非常重要ê一段文獻,說明約哈難等人tī iáu未去埃及避難chìn前,是先tńg來chhōe先知耶利米,請求伊協助問上帝ê旨意,並且chiù-chōa一定會遵守聽從上帝ê話。先知耶利米照in請求,kā上帝真實ê話傳hō͘ in。

第1到3節,chit群跟tòe約哈難ê軍官kah「各階層人士同齊來」chhōe先知耶利米。In請求先知耶利米替in向上帝「祈禱」,主要目的是為tio̍h beh明白到底上帝有甚麼旨意。Koh講,in mā想beh知影續落來in該怎樣行。In希望先知耶利米ē-tàng hō͘ in知影上帝ê意思,指示in性命ê方向。In向先知耶利米表示,chit-má in確實是「chhun落來寥寥無幾」ê「殘存ê人」。因為in中間有bē少人已經逃走到埃及去避難了。

第4節,chit節非常重要,先知耶利米答應in ê請求,並且表示會毫無保留kā上帝beh伊傳達ê信息轉告hō͘ in,hō͘ in知影。

第5到6節,chit兩節是chiah-ê人民ê回應,表示in一定會遵守上帝ê話。In chiù-chōa表示:無論所得tio̍h信息ê結果「是好是pháiⁿ」,lóng一定會「聽從」。M̄-koh當in聽tio̍h上帝hō͘ in ê信息,是kah in所期待ê大不相同時,in表現出來ê態度,卻是寧可相信家己ê判斷,而bē記得家己bat向上帝發過ê誓。

第7到9節,「十工後」,這是因為先知耶利米需要thèng候確實地聽tio̍h上帝ê聲音chiah會回應出來。當伊聽tio̍h上帝ê旨意了後,伊召集約哈難kah軍官,以及各階層人士,hō͘ in知影上帝beh hō͘ in ê信息。

第10到12節,chit三節是上帝透過先知耶利米回應hō͘ chit群代表來詢問祂ê旨意ê話。

先知耶利米真清楚hō͘ chiah-ê人知影,ài in留落來kah hiah-ê siōng-kài貧困、無hông掠去巴比倫ê猶大人民做伙,mā就是kah先知耶利米仝款留落來。In會親像先知耶利米仝款得tio̍h上帝「揀選」,幫助猶大人民「建立」、「拆毀」、「培植」、「拔除」等,上帝一定會看顧in,kā in看做是揀選ê奴僕,ná親像祂揀選先知耶利米仝款。M̄-nā án-ne,上帝會以「仁慈」對待in,並且會hō͘ in「歸回故鄉」,這真清楚就是會保護in ê性命免受災害。

重新查詢 專卷研經 耶利米書系列
錯誤回報,請聯繫comm[@]fhl.net