耶利米書 41章1節 到 41章18節   背景資料  上一筆  下一筆
本章是繼續第四十章事件ê發展,描寫有關巴比倫王尼布甲尼撒任命ê亞希甘ê kiáⁿ基大利為猶大省總督,被殺害ê經過以及續後ê發展。

無明確資料顯示以實瑪利beh謀殺基大利ê原因,只有ē-tàng猜測幾個可能性:

一是伊認為應該由猶大ê家族來當總督,若無,由其他族人來擔任統治猶大,對猶大家族ê人來講,lóng是一種侮辱,這可能kah伊是猶大家族ê kiáⁿ孫有關。

二是認為基大利乃是個傀儡政府,只聽從巴比倫王ê話,m̄知tio̍h趁機會帶領人民起來反抗。

三是用實瑪利受tio̍h亞捫王ê煽動、蠱惑引起ê,chit點tùi第四十章14節thang看出來。

第1到3節,「hit年七月」,這是teh指主前586年10月,距離耶路撒冷城淪陷後無久。M̄-koh mā有學者指出應該是會慢大約有長到一年時間,當基大利領導ê政府開始上軌運作了後。

有位「王族ê一員」,chit種人是「尼探雅ê kiáⁿ以實瑪利」,伊帶「十個人到米斯巴見基大利總督」,基大利邀請chiah-ê代表「同齊進餐」,m̄-koh就tī進餐ê時chūn,以實瑪利kah kah伊同來十個人,chiâⁿ實「拔出劍來,kā基大利刣死」。這說明約哈難提供ê情報準確。In m̄-nā殺害基大利而已,iáu有「kah基大利留tī米斯巴ê以色列人,kah tú好在場ê巴比倫軍人」,這表示基大利身邊ê幕僚,kah保護基大利ê「巴比倫軍人」mā殺害。這是非常嚴重ê事件,因為一者刣死巴比倫軍人,等於就是向巴比倫帝國宣戰仝款,koh講,刣死巴比倫帝國所任命ê官員,koh khah是等於藐視巴比倫帝國ê尊嚴仝款嚴重。

第4到5節,chit兩節講述基大利hō͘人發見遇tio̍h殺害chìn前ê事。

「有八十個tùi示劍、示羅、撒馬利亞」等地來ê以色列人,chiah-ê人準備「素祭kah乳香beh上聖殿獻祭」,主要是為tio̍h beh向被摧毀ê耶路撒冷城、聖殿舉哀。後來以色列人民每年ê「第四、第五、第七、第十月」lóng會舉行全國人民禁食,就是為tio̍h beh為耶路撒冷被包圍、攻破、聖殿被摧毀,以及基大利被殺害ê事件舉哀(參考撒迦利亞書七:3、5、八:19)。Chiah-ê人lóng是來自北國以色列ê城市,知影故鄉siōng重要ê聖殿被敵人毀了,in用非常哀傷ê表情「剃了鬍鬚、拆裂衫褲、割破家己ê身軀」等方式(參考耶利米書十六:6),帶「素祭kah乳香」,beh到聖殿去獻祭、哀哭。

「素祭kah乳香」,因為無cheng-seⁿ,所以無宰殺cheng-seⁿ流出來ê血。這mā說明聖殿已經被摧毀,無祭壇,只有ē-tàng tī聖殿所在地獻chit種簡單ê素祭,mā同時用chit種方式表示心中ê哀傷。

第6到7節,尼探雅ê kiáⁿ以實瑪利為tio̍h beh掩蓋(khàm)伊心中ê計謀,所以就「邊行邊哭去迎接」這八十個來自北國以色列大城市ê以色列同胞,表示kah in同齊哀悼耶路撒冷城ê毀滅。伊是用chit種方式騙取in,其實伊是準備進行一場大屠殺。當這八十個人一入城,「以實瑪利kah伊ê部屬」,mā就是身邊ê chit十個人,不分青紅皂白地就kā chit八十個北國以色列同胞hō͘屠殺,並kā in ê屍體「hiat入去坑裡」。Chit種行為是殺害無辜者ê性命,絕對bē被上帝所赦免。

第8到10節,tī chit八十個人中間,有「十個人向以實瑪利哀求」,願意用「真chē大麥、小麥、橄欖油,kah蜜,藏tī田裡」,希望換來以實瑪利m̄-thang殺害in。因為án-ne「以實瑪利饒了in ê命」。以實瑪利等人會同意不殺害chit十個人,真有可能是看tio̍h in願意提供chiah-ê重要ê生活物資。Koh講,in知影刣死了基大利kah巴比倫軍人後,絕對無可能tī猶大生存落去,而in kah亞捫國王ê關係好,因為án-ne,只有逃到亞捫請求政治庇護、避難。M̄-koh tī逃亡中mā一定tio̍h有食物,若無,就beh忍受iau餓ê痛苦,而且伊身邊mā有十個人kah跟tòe伊。因為án-ne,伊決定留落來chit十個人ê性命,就是為tio̍h beh獲取食物。Tùi第10節mā thang看出以實瑪利等人是非常有計畫ê,伊「掠了王ê cha-bó͘-kiáⁿ」,以及跟tòe tī基大利身邊ê幕僚kah tùi外國tńg去依附伊ê人(參考四十:12)。Chia所謂「王ê cha-bó͘-kiáⁿ」,可能是teh指kah西底家王室有關ê cha-bó͘人。

第11到15節,「約哈難kah跟tòe伊ê眾軍官聽tio̍h以實瑪利所犯ê罪」,第一個反應就是beh kā以實瑪利hō͘ in掠起來交hō͘巴比倫王,án-ne有可能iáu有機會挽tńg來殘存ê猶大人ê性命。因為只有án-ne,才能向巴比倫王尼布甲尼撒交帶,有可能án-ne thang免除巴比倫帝國ê報復。可惜ê是,chit項緝捕行動並無成功。「tī基遍附近大水池邊追上」,m̄-koh卻被逃脫了,只有救tńg來hông掠去ê人質。以實瑪利「kah伊ê八個部下lóng逃脫,投奔亞捫去à」。

第16到18節,chia講「tùi米斯巴被以實瑪利掠去ê,其中有軍人、婦女、兒童,kah太監」,m̄-koh並無說明總數是jōa-chē,其實,in是一陣siōng無辜ê人。當約哈難kah伊ê軍官搶救chiah-ê人出來了後,為tio̍h beh「逃避巴比倫人」ê報復,只好逃往「埃及」,半途in tī「伯利恆附近ê金罕」稍事停留。這「金罕」的確實地點已經無法度thang考。約哈難會án-ne想tio̍h beh逃往埃及去,是thang理解ê,因為雖然in lóng是無辜受害ê人,m̄-koh因為基大利kah護衛伊ê巴比倫軍人被刣ê事件,一定會引起巴比倫王尼布甲尼撒採取koh khah殘酷ê報復手段,可能利用chit pái機會kā猶大人民全lóng刣死。

重新查詢 專卷研經 耶利米書系列
錯誤回報,請聯繫comm[@]fhl.net