耶利米書 40章1節 到 40章16節   背景資料  上一筆  下一筆
Chit章到四十四章lóng是談及耶路撒冷被毀滅了後ê景況。Chit章mā談及沙番ê孫á、亞希甘ê kiáⁿ基大利被巴比倫王尼布甲尼撒任命為猶大省ê總督,m̄-koh卻hō͘伊ê同胞hō͘謀刣。

Ná親像頭前有提起過ê,chit章ê第1到6節經文kah第三十九章11到14節ê記事有差異。有一種講法,是舊約學者布萊特(Bright, J)tī伊所寫ê《耶利米書釋義》冊中,提出ê看法,伊講:當先知耶利米被釋放後,tī tńg去故鄉ê路途中tú-tio̍h hiah-ê押解猶太人去巴比倫做奴隸ê軍隊,in m̄知頭前指揮官釋放先知耶利米,認為伊是漏網之魚,因為án-ne,koh kā伊掠。後來知影是王下ê命令,就án-ne koh一pái kā伊釋放。不過,兩段ê記事lóng仝款是先知耶利米無選擇去巴比倫享受禮遇,卻是tńg去故鄉kah hiah-ê貧困ê同胞做伙。

第1節,「拉瑪」,這是距離耶路撒冷城北pêng大約八公里ê一個小鎮。先知耶利米kah一陣被俘虜ê以色列同胞同時受掠,in行到à「拉瑪」chit-ê地方chiah被「護衛長」尼布撒拉旦「釋放」。Ná親像頭前所敘述ê,真可能是第二pái受掠,因為第一pái ê釋放是tī第三十九章已經記載過了。

第2到3節,chia提起巴比倫軍隊ê護衛長尼布撒拉旦mā認為耶路撒冷城kah聖殿ê毀滅,是出「上帝」ê決定,理由是「因為」以色列人民「得罪上主,m̄聽從伊ê命令」。Chit-ê話會tùi巴比倫軍隊指揮ê口講出來,有一個可能就是尼布撒拉旦tùi俘虜ê嘴中聽tio̍h in chit-má真懊悔當初無聽從先知耶利米ê苦勸,chit-má果然一切lóng會失去。因為án-ne,當伊beh解開先知耶利米ê身上鎖鍊ê時,就用伊所聽tio̍h ê chiah-ê話對先知耶利米講。這mā有意思beh表明:耶利米是一個可敬ê先知,可惜伊ê人民m̄聽從伊。

第4節,尼布撒拉旦「解開」先知耶利米「手上ê鍊á」,hō͘伊「自由」。同時mā hō͘ hō͘先知耶利米一個真好ê選擇:若是伊tio̍h kah尼布撒拉旦去「巴比倫」,伊會「好好á照顧」伊。這表示chit位巴比倫元帥確實對先知耶利米非常敬重。「如果無願意,就m̄免去」,thang真自由選擇「歡喜到甚麼所在,就到甚麼所在」,並且iáu hō͘伊看排tī「面前」ê是「kui片土地」,伊thang自由選擇。

第5節,chit節真重要,因為tī chia尼布撒拉旦得tio̍h「巴比倫王已經指派」亞希甘ê kiáⁿ基大利「作猶大各省ê省長」ê消息,因為án-ne,伊建議耶利米tńg去基大利hia。M̄-koh並無勉強先知耶利米,hō͘伊隨家己ê「意思」決定是m̄是beh tńg去。同時iáu送hō͘先知耶利米「禮物kah旅途需要ê食物」。

第6節,先知耶利米決定到「米斯巴去chhōe基大利」,這是因為基大利選擇以「米斯巴」城作為政府所在地;因為耶路撒冷城已經被巴比倫軍隊摧毀成做廢墟,而且城牆已經被拆,無適合khiā起,當然koh khah無適合成做政府行政中心。Chit-ê城距離耶路撒冷北pêng大約十二公里。Tī士師ê時代,chit-ê所在bat是一個宗教聖地,mā是軍事行動中心(參考士師記二十:1)。

第7到8節,「猶大官員kah無投降ê部隊」,chiah-ê就是所謂ê「游擊隊」,對巴比倫帝國來講,就是所謂ê「頑劣份子」。In聽見了chit-ê消息,就講基大利是受派「管理」留tī故鄉「hiah-ê siōng sàn-chhiah ê人」。就決定到米斯巴去見基大利。Chia列出一份名單,siōng值得注意ê是「尼探雅ê kiáⁿ以實瑪利」,伊就是後來暗刣基大利ê主要殺手(參考四十一:5),另外iáu有「加利亞ê kiáⁿ約哈難、單戶默ê kiáⁿ西萊雅、尼陀法人以斐ê眾kiáⁿ,kah瑪迦人耶掖尼亞」等,chiah-ê lóng是當時反對向巴比倫投降ê菁英份子。

第9到10節,chiah-ê意見領袖來見基大利;伊向in「保證」,ài in「mài驚向巴比倫人投降」,伊強調只要「服事巴比倫王,一切lóng會順利」,並且hō͘ in知影,伊會爭取到hō͘ in tī米斯巴生活ê時,thang「收存酒、果子、橄欖油」等,這表示in thang kah hiah-ê siōng貧困ê同胞同齊耕耘土地。因為大部分ê人lóng受掠巴比倫,必定留落來真chē田園等待種作。特別是hit時chūn,已經是開始採收果子ê季節,當基大利án-ne表示ê時,mā teh說明巴比倫王並無想beh沒收in農產品。基大利mā表示ê決心「beh親自留tī米斯巴」好好á照顧留落來ê以色列同胞。

第11到12節,chia提起流亡到國外地區tńg來ê以色列人民,包括有tùi「摩押、亞捫、以東」等地,以及其他「流亡ê所在」,大家lóng紛紛「tńg來到猶大」。Chiah-ê人中間有真chē人mā是來到「米斯巴見基大利」,並且就ná親像基大利所講ê,hō͘ in thang「tī hia收存真chē酒kah果子」。Tùi chia mā thang看tio̍h基大利治理ê手路是溫和ê,伊並無要求chiah-ê來歸降ê游擊散兵繳械,只是勸勉in tio̍h安定落來,順服巴比倫王。M̄-nā án-ne,伊ê態度是明智、開放ê,伊hō͘以色列同胞擁有家己ê田園,mā thang收藏家己ê糧食。這mā同時teh表明巴比倫帝國統治之下,對猶大殘存ê人民採取闊容政策,允准in擁有家己管理ê方式,chit點kah北國以色列被亞述帝國消滅ê時,所受ê待遇完全無仝;巴比倫王尼布甲尼撒並無tùi外國引進大量移民來kah以色列民族通婚,這mā是南國猶大ē-tàng繼續保存以色列人民kah信仰親密成一體ê主要因素。亞述帝國是消滅北國以色列後,除了俘虜以色列人民做奴隸,甚至kā in販賣到外國去之外,進一步ê作法,就是tùi附近國家、民族引進大量ê移民,hō͘ in通婚,引誘以色列人民去拜偶像神明(參考列王記下十七:24、29),亞述帝國án-ne做ê主要目的,是有計畫beh消滅chit-ê以色列民族。

第13到14節,tī第7到9節提起頂pái chiah-ê猶大逃走菁英去見基大利了後,其中一位「約哈難」koh一pái去見基大利,伊提供一則所知影ê重要消息,就是尼探雅ê kiáⁿ「以實瑪利」,受tio̍h「亞捫王巴利斯」ê教唆,beh來米斯巴暗刣基大利。M̄-koh基大利「m̄相信chit-ê話」。

第15到16節,約哈難m̄-nā提供chit段消息,並koh khah進一步表示beh先kā以實瑪利暗刣死,好保護基大利,而且ē-tàng防止巴比倫帝國因為基大利被刣而對猶大人採取報復手段。M̄-koh基大利阻止約哈難ê計畫。伊認為約哈難所得tio̍h ê消息無正確。

重新查詢 專卷研經 耶利米書系列
錯誤回報,請聯繫comm[@]fhl.net