耶利米書 36章11節 到 36章26節   背景資料  上一筆  下一筆
Tùi chit段經文thang看tio̍h有kóa猶大官員中,iáu是有人會聽先知耶利米傳出來ê信息。In一聽tio̍h巴錄所宣讀上帝傳來ê信息,就急tio̍h想beh知影koh khah詳細些,並且mā決定kā chiah-ê冊卷上ê記錄帶去hō͘國王約雅敬看。M̄-koh當約雅敬王聽tio̍h巴錄所記載先知耶利米口述上帝ê信息了後,卻是非常憤怒,因為án-ne,chiah會kā巴錄辛苦寫落來ê冊卷用刀割破、放火燒。Chiah-ê動作lóng teh表示伊對上帝奴僕先知耶利米所傳ê信息,是非常自高、討厭。M̄-nā án-ne,ná親像下令去緝拿先知烏利亞仝款,chit pái mā下令tio̍h官員去緝拿先知耶利米kah伊ê秘書巴錄。

第11到13節,由10節thang看出tī巴錄向群眾宣讀上帝透過先知耶利米所講ê信息後,當時有一位名叫「米該亞」ê大臣。伊可能聽了後,感覺tāi-chì嚴重,就án-ne向老父「基瑪利雅」報告,就án-ne伊ài kiáⁿ到「宮廷書記以利沙瑪」ê房間去,koh一pái kā所聽tio̍h ê kā當時tú好「tī hia開會」ê所有高級官員講。「米該亞kā所聽tio̍h、巴錄當眾宣讀ê話一一向in報告」。

第14到15節,in聽了後,mā lóng認為事態嚴重,就án-ne決定派「尼探雅ê kiáⁿiáu底去傳喚巴錄,叫伊kā伊當眾宣讀ê hit冊卷帶來」,就án-ne巴錄就koh一pái當tio̍h chiah-ê大官員面前koh宣讀了一pái。

第16到19節,「in聽以後,驚惶得面面相覷」,這表示in心內受tio̍h極大ê震撼,認為tio̍h án-ne事m̄是小khóa。Á信息ê內容就是第7節所講ê,ài猶大ê以色列人民趕緊棄sak邪惡ê道路,因為上帝已經發出大受氣。Chiah-ê官員知影tāi-chì ê嚴重性,認為「一定tio̍h kā chit項事呈報國王」,in清楚知影,beh改變全國人民ê途徑,就是beh國王西底家出面下命令。In問這是m̄是先知耶利米「口授」hō͘伊ê。巴錄真清楚表示chiah-ê信息lóng是先知耶利米「一一口授ê」,而伊聽了後,就用「墨水記錄」落來。Chit句「用墨水記錄」,意思是in ài巴錄確認:伊所寫ê是m̄是lóng事實,無任何加添?而tùi chit節mā thang看出巴錄ê回答非常簡潔,伊清楚知影家己只不過是一個隨從,照主人吩咐而寫。Chiah-ê官員真好意,ài巴錄「kah耶利米lóng得bih起來,不beh hō͘別人知影」in bih起來ê所在。因為in知影若in兩人被發見,可能mā難逃被殺害ê結果。

第20節,chiah-ê官員ài巴錄「Kā hit冊卷留tī宮廷書記以利沙瑪ê房間」,然後kā冊卷帶去呈hō͘約雅敬王看,並kā得tio̍h此卷先知耶利米口述信息之經過,報告hō͘約雅敬王知影。其實in是kā hit冊卷扣留了落來當做證據,一則hō͘約雅敬王知影確實有chit件事,另外一方面mā是若需要起訴審案,mā是一個明確證據。

第21到22節,約雅敬王派「iáu底去the̍h hit冊卷」來念hō͘伊kah「王左右ê官員聽」。「hit時chūn是寒天」,因為án-ne,約雅敬王「坐tī火爐前烘火」。

第23到24節,iáu底chiah「讀完了三、四段,約雅敬王就受不了了,伊用小刀kā hit冊卷割破,tàn入去火爐裡」燒掉,chit種態度kah伊ê老父約西亞差不多是完全顛倒;伊ê老父約西亞當年聽tio̍h王是書記沙番講tī聖殿裡chhōe-tio̍h律法冊,而且聽tio̍h沙番讀完了後,就「拆裂衫褲」,並且隨時下令為全國人民詢問上帝該律法冊ê教示,koh khah重要ê,是伊承認上帝會án-ne向猶大國發出大受氣,是因為tùi祖先開始就無「聽從」上帝ê話,「無照這冊上所記載ê去做」(參考列王記下廿二:11—13)。

chit-má ê約雅敬王並無重視上帝ê話,卻是kā上帝ê話當做廢物仝款,用小刀割破先知耶利米口述上帝ê信息所記載ê冊卷,而且是kā它丟入火爐裡燒毀,「一直到kui個冊卷lóng燒光」為止。Tùi chia thang看出伊心中ê忿怒。M̄-nā án-ne,連伊身邊ê臣僕mā仝款,對上帝ê忿怒「一點lóng m̄驚惶」,「mā不拆裂衫褲表示傷心」。Tī in看起來,先知只ná親像亂叫ê烏鴉仝款。

第25到26節,chia提起其中有幾個幕僚向王請求「m̄-thang燒hit冊卷」,m̄-koh,約雅敬王並「無加chhap」,這mā是先知耶利米一再傳出上帝信息所提起ê,上帝派奴僕先知傳達信息,m̄-koh以色列人民上自君王,下到一般領袖、人民等,lóng m̄-chhap(參考耶利米書七:13、25—26、十一:7—8、廿五:4、廿六:4—5、廿九:19、三十二:33、三十五:15)。約雅敬王隨時命令「太子耶拉末kah耶斯列ê kiáⁿ西萊雅kah雅伯疊ê kiáⁿ示利米雅」等人去掠先知耶利米kah巴錄。M̄-koh上帝teh庇護祂忠實ê奴僕。

重新查詢 專卷研經 耶利米書系列
錯誤回報,請聯繫comm[@]fhl.net