耶利米書 32章16節 到 32章35節   背景資料  上一筆  下一筆
第16到25節ê chit段經文是先知耶利米信仰告白,mā是一篇非常好ê見證詞。是先知耶利米向上帝所許ê祈禱詞。Tùi第26到35節ê chit段經文是上帝回應先知耶利米tī第23節所講ê禱詞,thang清楚知影上帝為何會用hiah-ni̍h嚴厲ê手段來懲罰以色列人民。

第16到17節,先知耶利米講上帝是「以家己ê大能大力創造天地」(參考耶利米書廿七:5),通常提起上帝ê「大能大力」,lóng是用來形容上帝帶領以色列人民行出埃及。既然是大有能力ê上帝,就「無做bē到ê事」。

第18到23節,chit段經文是先知耶利米歌頌上帝ê頌詞,伊講:

上帝以「無變ê疼對待千萬人」,m̄-koh mā會「因老父所犯ê罪報應kiáⁿ」。

上帝ê「計畫偉大」、「作為非凡」,而且會照人心內ê意念作為審判ê標準(參考希伯來書四:12—13)。

上帝tī埃及行神跡奇事,以大能「領以色列人民出埃及」。

上帝信守「諾言」,kā「流奶kah蜜」之地賞賜hō͘以色列人民。

M̄-koh先知耶利米歌頌上帝了後,隨時講以色列人民tī得tio̍h上帝賞賜ê土地了後,就bē記得上帝ê恩典,「不服從」上帝ê命令,mā「不遵行」上帝ê教示,因為án-ne上帝施行懲罰,hō͘以色列人民「遭遇大災難」。

第24節,koh一pái提起耶路撒冷城會因為為「戰爭、饑荒、瘟疫」遭遇加倍ê災難。背叛上帝會有chit三種災難ê降臨一直是先知耶利米對以色列人民ê警語。

第25節,chit節是teh回應頭前所講ê,上帝ài先知耶利米去買地,而且是tī明明知影巴比倫帝國teh beh攻落耶路撒冷城,以色列人民會hō͘俘虜去做奴隸了,tī chit種前提下,上帝iáu是beh先知耶利米去買hit塊屬tī哈拿默ê土地。

第26到27節,koh一pái確定上帝無「做bē到ê事」,這是絕對無可能發生ê事。因為上帝是萬物ê創造主,祂事事lóng ē-tàng(參考創世記十八:14,約伯記四十二:2,馬可福音十:27)。

第28到29節,上帝決定beh hō͘巴比倫王尼布甲尼撒ê軍隊來「佔領」耶路撒冷。上帝án-ne決定,tāi-chì便會án-ne完成。而且chia清楚指出巴比倫王ê手段會真殘酷,伊會「放火燒毀一切」。

第30到32節,chit段經文真清楚說明上帝會án-ne做出毀滅耶路撒冷城ê原因,是kui個猶大國集體ê犯罪行為,而且是一代續接一代,是「以色列kah猶大人民tùi開國以來一直作惡激怒」了上帝,而且耶路撒冷是tùi「建城以來,居民mā不斷來激怒」上帝。Á koh khah令上帝所無法度容忍ê,就是chiah-ê以色列人民ê領袖,包括「君王、首領、祭司、先知,lóng做邪惡ê事」。

第33節,chit節講tio̍h以色列人民kah社會領袖lóng「變面不認」上帝,chia ê「變面」一詞,意思是teh指kā面背向上帝(參考以西結書八:16);mā就是表示去拜偶像神明。雖然上帝是一再差遣祂ê奴僕先知去警告以色列人民,m̄-koh「in lóng是m̄聽」。類似chit句警語一再出現tī耶利米書中(參考耶利米書七:25—26、十一:7—8、廿五:5、廿六:4—5)。

第34到35節,chia重複第七章30到31節ê話。

重新查詢 專卷研經 耶利米書系列
錯誤回報,請聯繫comm[@]fhl.net