耶利米書 3章19節 到 3章25節   背景資料  上一筆  下一筆
Chit段經文真可能受tio̍h主前第八世紀ê先知何西阿影響,真chē用詞kah詩句ê意義上真相近(參考何西阿書十:12、十四:4)。Chit段經文一再看tio̍h上帝對以色列民族呼喊ê聲音,希望祂揀選ê以色列子民會tńg來到祂ê身邊,chit種呼籲ê聲音,chit種呼籲ê聲音所表達出來重要信息:上帝無比ê疼,ná親像一個慈愛ê老父,teh期待叛逆ê子女tńg來到身邊來仝款。M̄-koh chit-ê信息有一個基本前提:以色列民族tio̍h知影認罪、悔改。上帝透過先知傳達ê就是chit-ê重要信息,因為無認罪、悔改,就無法度得tio̍h上帝ê憐憫kah赦免。

第19節,「以色列ah,我jōa-ni̍h-á樂意認你作kiáⁿ」,chit句話充分顯示出上帝kah以色列民族之間是父子關係。出埃及記第四章22真清楚記載上帝講以色列人民是祂ê「大kiáⁿ」,表示以色列人民tī上帝心目中ê地位siōng-kài重要。

「我認為你會叫阮老父爸」,chit句話已經清楚說明以色列民族否認上帝kah in之間ê父子關係,表示原本ê「父子」關係已經破裂,因為以色列民族「背離」了上帝。

第20節,chia講以色列民族是上帝ê「bó͘」,上帝是in ê丈夫。「bó͘」一定tio̍h對丈夫忠實,這是因為兩個之間有連結成一體bē-tàng分割ê關係(參考創世記二:24)。Chia講以色列民族竟然對上帝「不忠,像不貞ê bó͘私奔」,表示in除了敬拜上帝,mā同時teh拜偶像神明,就是巴力神明、亞舍女神等,這ná親像一個cha-bó͘-gín-á同時kah兩個以上ê cha-po͘人同睡。

第21節,「山頭殼頂有呼聲」,這是teh指猶大人民tī山頭殼頂設置祭壇拜偶像神明(參考三:2),所發出ê聲音。Chia講in原本拜偶像神明ê聲音,chit-má卻變成「流目屎哀求」,表示in tú-tio̍h極大ê痛苦而哀哭,原因是in「bē記得上帝」chiah會tú-tio̍h苦難,因為án-ne,chit-má醒悟過來,知影tio̍h悔改。
第22節,chit節用「beh醫」一詞,譬喻猶大人民ná親像患tio̍h重大破病仝款,需要醫,若無,一定會面臨死亡ê來臨。

「是!咱beh tńg去到上主hia,因為伊是咱ê上帝。」chit句表明以色列人民已經清楚知影,只有án-ne才能koh一pái重新chhōe-tio̍h性命ê契機。

第23節,所表達是in知影棄sak上帝去拜偶像,是「一點á好處」mā無,chit-má chiah學習tio̍h「獨獨上主」ē-tàng「拯救以色列」人民脫離亡國ê苦難。

第24節,chit節真清楚說明北國以色列人民因為失去上帝ê庇護,致使國家被滅亡,所有ê一切財產就會喪失,甚至連帶喪失ê是「祖先自古以來建立ê一切家業」。注意chia所提起ê,in mā會失去「kiáⁿ」,這是teh指in甚至bat為tio̍h beh追求koh khah chē ê財富,kā「kiáⁿ」當做牲祭獻hō͘神明(參考耶利米書七:31,列王記下十六:3、十七:17、廿一:5)。

第25節,chia講in beh「以見笑作牀鋪,以恥辱作被單」,表示侮辱了夫妻原本是聖潔ê牀鋪,taⁿ已經因為bó͘悖逆丈夫而hō͘「牀鋪」成做「見笑」ê記號。Chit種用「牀鋪」來形容,mā是teh表明夫妻同房ê意思,應該是聖潔ê。Á「祖先常常tio̍h罪上主—咱ê上帝」,chit句話真清楚表示以色列人民犯罪,m̄是始自今á日,卻是早tī祖先進入迦南地ê時就已經開始(參考何西阿書九:10),in無tńg來歸上帝,卻是繼續犯下kah祖先仝款ê錯誤。

重新查詢 專卷研經 耶利米書系列
錯誤回報,請聯繫comm[@]fhl.net