耶利米書 29章24節 到 29章32節   背景資料  上一筆  下一筆
Chit段經文是繼續指出假先知示瑪雅,想beh透過祭司西番雅威脅先知耶利米。M̄-koh先知耶利米m̄-nā無因為án-ne就噤若寒蟬,m̄敢出聲,卻是隨時傳出上帝kā懲罰示瑪雅ê信息。

第24到25節,「尼希蘭人示瑪雅」,伊是kah先知以西結同時期被掠到巴比倫去ê,mā是第8節所提起ê假先知之一。伊冒用上帝ê名寫phoe hō͘耶路撒冷「瑪西雅ê kiáⁿ西番雅祭司kah所有其他眾祭司,以及耶路撒冷所有ê人民」,chit種信,等於是一封公開譴責先知耶利米ê信。

第26到28節,chit段經文內容是記載示瑪雅所寫ê信:

伊以上帝ê名下命令,beh任命西番雅取代「耶何耶大」當耶路撒冷ê大祭司,而且chit張phoe mā同時寄hō͘「所有其他ê眾祭司,以及耶路撒冷所有ê人民」,án-ne,等於是冒用上帝ê名撤換耶何耶大。Koh講,伊講出beh撤換耶何耶大ê理由,就是認為耶何耶大無「盡責任」kā先知耶利米掠入獄,因為án-ne,已經無法度勝任大祭司ê職分了。伊ài祭司西番雅去接替大祭司ê職分。伊認為先知耶利米是一個「狂人」,因為án-ne,伊ài西番雅tī接替大祭司了後,kā先知耶利米掠起來,m̄-nā án-ne,iáu koh khah用「鐵枷套tī伊ê頷頸上」。理由是先知耶利米bat寫phoe hō͘受掠tī巴比倫ê猶大人民,講in「流亡ê時間會真長」(參考第10節),就是teh指「七十年」,而且ài in tī巴比倫「建造房屋,定居來,mā tio̍h種作,食田裡ê土產」(參考第5節)。

伊認為先知耶利米m̄-nā無講安慰、鼓舞ê話,反tńg講chit種會帶hō͘人民恐慌、不安ê信息。因為,伊tī國家動亂ê時chūn,無幫助民心ê穩定,反tńg鼓勵人民tī巴比倫做奴隸安定落來,這對當時受掠tī巴比倫ê猶大人民來講,確實是真痛苦ê信息,因為必定有真chē人會失去信心。
Tùi chia mā thang看出當時被掠到巴比倫ê以色列人民中,假先知並無因為án-ne而消失,顛倒ê,in照常是寄生tī苦難ê人民中間。

第29到32節,「祭司西番雅」kā收tio̍h ê信讀hō͘先知耶利米聽。先知耶利米就kā伊tùi上帝hia得tio̍h啟示,koh一pái寫phoe hō͘ tī巴比倫俘虜營ê以色列同胞。Tī phoe內,伊清楚指出示瑪雅是一個假先知,因為上帝並無「差派伊,伊卻自封為先知」,ná親像示瑪雅認為先知耶利米是「自封為先知」仝款。因為án-ne,上帝beh嚴厲懲罰chit種冒用上帝ê名ê假先知。先知耶利米並且傳出上帝ê懲罰方式如下:

一是上帝beh「懲罰示瑪雅kah伊êkiáⁿ-kiáⁿ孫孫」,這表示示瑪雅此後bē koh再出現。

二是kah前一位假先知哈拿尼雅所受ê懲罰仝款,就是「無法度活teh看見」上帝釋放了猶大人民ê奇妙作為。換句話mā teh暗示示瑪雅會真緊to̍h往生。

三是上帝認為示瑪雅ê信息是假ê,是teh「鼓舞」猶大人民「背叛」上帝,並無為上帝ê子民帶來真正幸福。

重新查詢 專卷研經 耶利米書系列
錯誤回報,請聯繫comm[@]fhl.net