Chit段經文真清楚說明先知耶利米koh一pái針對hiah-ê受掠tī巴比倫中間ê假先知，提出嚴厲警告ê信息，先知耶利米講chiah-ê傳達假信息ê人，lóng會遇tio̍h上帝嚴厲ê懲罰。甚麼人聽從in ê話，甚麼人就連帶受災。

第15節，chit節提起上帝tī巴比倫為以色列人民「興起了先知」，其實，chit種先知就ná親像第8節所提起ê，是假先知，m̄是真正先知。因為上帝並無向in啟示祂ê信息。

第16到20節，chit段經文談tú hông巴比倫按立ê西底家王，以及無hông掠去巴比倫做奴隸ê猶大人民知影，m̄免因為án-ne歡喜，上帝對chiah-ê人ê懲罰，並無會比hông掠去巴比倫ê人iáu koh khah輕，卻是koh khah重。上帝懲罰ê方式，包括「戰爭、饑荒，kah瘟疫」，而chit三項lóng是先知耶利米一再提起上帝懲罰ê警語。Chiah-ê人仝款會hō͘擄、hō͘別人統治，無論tī tó位，in會受tio̍h「詛咒」，看見in ê人會「驚駭，唾棄，辱罵」in。原因就是īnm聽從上帝ê奴僕先知傳出來ê信息（參考七：25、十一：7—8、廿五：4—7）。In lóng是歡喜聽從hiah-ê假先知ê話（參考十四：16、廿二：25—26）。因為án-ne，先知耶利米koh一pái提出呼籲，ai3chiah-ê tī巴比倫做奴隸ê同胞「注意聽」伊ê話。

第21到22節，chia提起兩個假先知ê名。其一是「哥賴雅ê kiáⁿ亞哈」，另外一位是「瑪西雅ê kiáⁿ西底家」，這兩人mā lóng同齊被掠到巴比倫去當俘虜，m̄-koh in lóng是假冒上帝ê名傳信息ê假先知。上帝ê懲罰是hō͘ in當tio̍h猶大人民「面前」，被巴比倫王尼布甲尼撒用火把in兩人「活活燒死」。

後來，以色列人民teh詛咒別人ê時chūn，lóng會講：「願上主對付你，像伊對付被巴比倫王活活燒死ê西底家kah亞哈仝款。」chit句話ê意思是teh指會死得真痛苦、真悽慘。

第23節，chit節講出chit兩位假先知所行惡質ê行為。包括有「kah厝邊ê bó͘通姦」，chit句話有兩種意思，一是teh指去拜迦南人teh拜ê偶像神明（參考耶利米書五：7—8），另外一是teh指in tī道德行為規範上，無嚴守上帝ê誡命，犯姦淫罪。Koh講，in「koh冒上帝ê名講白賊」，表示in一面去做無應該做ê事，另外一面koh冒用上帝ê名，褻瀆上帝ê神聖，這是真無法度原諒ê行為。上帝當然清楚「知影」，mā tio̍h「親自指控」in ê罪。