耶利米書 29章1節 到 29章14節   背景資料  上一筆  下一筆
Chit章雖然並未說明先知耶利米是tī甚麼時代ê背景下,寫chit封hō͘伊ê同胞ê信。M̄-koh tùi kui章ê內容看出chit張phoe應該是kah第廿七到廿八章ê時代背景仝款,lóng是tī猶大王西底家執政ê第四年,mā就是主前594年ê時chūn。信是寫hō͘ hiah-ê tī主前597年ê時被巴比倫王尼布甲尼撒掠去ê同胞,包括先知、祭司、長老,kah其他ê人。唯一無仝ê是第廿七、廿八chit兩章,是先知耶利米針對tī耶路撒冷ê同胞講ê話,而第廿九章則寫phoe hō͘ hiah-ê被掠到巴比倫去ê同胞kah宗教眾領袖。主要目的是勸in m̄-thang koh再心存叛亂,而tio̍h順服巴比倫ê統治,án-ne就ē-tàng tī巴比倫好好á生存落去。

Chit章thang分做兩大部分來看,其一是第1到23節,這是對hiah-ê受掠ê以色列同胞講ê;其二是第24到32節,講tio̍h有一位名叫示瑪雅ê人,寫phoe hō͘ ná留tī耶路撒冷ê領袖祭司西番雅,ài伊譴責先知耶利米。原因是先知耶利米寫phoe hō͘ hiah-ê被掠到巴比倫去ê同胞,kā in講tio̍h好好á tī巴比倫生活落去,因為in tńg去故鄉ê日子並無親像哈拿尼雅所講ê只有短短ê兩年,卻是長到七十年ê時間。當祭司kā示瑪雅chit張phoe the̍h hō͘先知耶利米看了後,先知耶利米就真清楚指出示瑪雅根本就m̄是先知,同時mā預言示瑪雅會受tio̍h上帝嚴厲懲罰。這lóng ē-tàng看出tī一個不安定ê時代,社會中lóng是會出現真chē擾亂人心安寧ê話語,而且是假冒上帝ê名傳講錯誤ê信息。過去án-ne,今á日mā是仝款。

Chit段經文真清楚看出,先知耶利米寫phoe hō͘被掠到巴比倫去ê猶大人民,包括所有猶太人社會領袖在內。Ài in kā心安定落來,好好á tī巴比倫過生活,繁延下一代。這tú好teh表示受掠ê猶大以色列人民並bē tī近期內回鄉tńg來故土。伊所寫ê信帶去hō͘受掠ê以色列同胞siōng大ê ǹg望,就是經過七十年後,上帝會親手帶領in tńg去故鄉,hō͘ in有能力重整家園。

第1到3節,chit三節是紹介先知耶利米寫chit張phoe ê背景。包括收phoe ê對象就是hiah-ê被掠到巴比倫去ê猶大人民,其中有「祭司、先知、長老,kah其他」社會菁英。Chia所講ê「長老」,tī《中文和合本》用「生存ê長老」,可能是tī主前595年ê時chūn,有長老因為帶頭叛亂而被弭平,帶頭ê長老已經被處用死刑,其餘ê lóng受掠,因為án-ne用「生存ê長老」chit句話。先知耶利米寫chit張phoe ê時間是tī主前594年,mā就是「約雅斤王、王太后、宮廷官員」等被「放ta̍k離開耶路撒冷」。先知耶利米ê chit張phoe是託「猶大王西底家派了沙番ê kiáⁿ以利亞薩kah希勒家ê kiáⁿ基瑪利到巴比倫見尼布甲尼撒王」帶去ê。

第4到5節,tùi chit節開始直到第9節,是chit張phoe ê第一段落。

Tī chit兩節中,先知耶利米ài受掠ê同胞tī巴比倫「建造房屋,定居,tio̍h種作,食田裡ê土產」。Chit句話有兩種含意:一是kā chit句話用來對照先知耶利米被呼召ê時,上帝hō͘伊ê使命是「重建,kah種植ê工作」(參考耶利米書一:10),án-ne thang想像得出猶大ê以色列人民被掠到巴比倫去,其實就是上帝對chit-ê悖逆子民一種重新改造ê方式,beh hō͘ in完全tùi hit-ê腐敗、棄sak上帝之約ê境況中拔出,重新栽種in。二是teh表示in kā bē tī真短ê時間內tńg去故鄉,卻是會經歷一段長到七十年ê時間(參考廿五12、廿九:10)。因為án-ne,in一定tio̍h真正照先知耶利米ê話去做,等到回鄉時間來到,就bē致使空手而tńg來。

第6節,chit節講tio̍h一個真重要ê認bat,就是上帝beh hō͘ in tī受掠ê巴比倫之地,延續性命,而且是代代延續落去。Tī chia講in ê「kiáⁿ mā tio̍h結婚,生兒育女」,hō͘ in「tī he地方繁殖起來,人口增chē,不減少」,chit種句話所代表ê就是賜福。表面上看起來,被掠到巴比倫去是慘痛ê經驗,mā是件非常痛苦ê事,m̄-koh,即使是上帝ê懲罰,mā會因為為chit種懲罰帶來另外一方面ê賜福,就是in bē被消滅,kui個民族iáu是會繼續生長、茁壯。因為有上帝ê賜福,才能得tio̍h性命力而hō͘性命延續落去。

第7節,chit節真重要,講beh chiah-ê hông掠去巴比倫ê猶大人民,一定tio̍h為巴比倫「城市謀福利」,並且iáu koh khah為「in ê繁榮」向上帝祈求。原因是chiah-ê城市ê「繁榮」,in mā會跟tòe繁榮。Chia ê所謂「繁榮」,有含一個意思就是「平安」。

第8到9節,chit兩節koh一pái看tio̍h先知耶利米koh一pái提出警告,tī hiah-ê受掠ê人中間,猶本來假先知繼續teh利用「占卜未來」傳達錯誤ê信息,伊ài大家千萬m̄-thang koh再聽信chiah-ê人所講ê預言,因為in kan-taⁿ會「欺騙」人民。

第10到11節,chit節thang參考第廿五章12節。先知耶利米講上帝beh tī經過「七十年」ê時實踐祂ê「諾言」,這諾言就是祂hō͘ in家己子民ê應允,就是chhōa in tńg去故鄉。這是上帝ê計畫,m̄是一般人ē-tàng了解。Chia講上帝ê「計劃m̄是災難,卻是繁榮;我beh hō͘ lín有光明ê前程」chit句話,tú好說明上帝ài beh進行祂拯救ê工作,m̄是一般人ē-tàng明瞭,chit句話mā同時回應了頭前所講ê,猶大人民被掠到巴比倫去並m̄是災難,反tńg是kui個以色列民族重新koh再造ê機會,上帝是透過chit種嚴厲懲罰ê方式來改造一個民族。

第12到14節,chit三節表示上帝kā會kah猶大人民重新和好。當in向上帝呼求ê時,上帝「會回答」in。M̄-koh這前提是hông掠去做奴隸ê猶大以色列人民有懺悔之心,上帝chiah會垂聽in ê祈禱,這kah過去in iáu未亡國受掠chìn前,上帝拒絕聽in ê祈禱(參考七:16、十一:14、十四:11—12),情形已經完全無仝。上帝m̄-nā應允beh垂聽in祈禱ê聲音,如果in「一心chhōe」,上帝向in「保證」一定mā會hō͘ in ē-tàng「chhōe得tio̍h」。所謂「一心chhōe」,意思是teh指專一順服kah in立約ê上帝。而且上帝應允一定會帶領in「回鄉重整家園」,而且m̄-nā是tùi巴比倫帶領in tńg去,mā tio̍h「tùi放ta̍k」in去ê「各國各地」kā in koh一pái重新「集合起來」,帶領in lóng tńg來到「受掠離開ê故土」。Á非常重要ê,是chiah-ê會hō͘領tńg來故鄉ê對象,就m̄-nā是猶大人民而已,表示所有以色列人民lóng有。

重新查詢 專卷研經 耶利米書系列
錯誤回報,請聯繫comm[@]fhl.net