耶利米書 27章1節 到 27章11節   背景資料  上一筆  下一筆
Tùi chit章開始到第廿九章止,這三章是提起有關先知耶利米反駁假先知ê記錄;tī chiah-ê記錄中,thang清楚看出時代背景大約是tī主前595年12月到594年1月之間。Hit時有一股暗中串連想beh反抗巴比倫帝國統治ê計畫,參與chit項計謀ê國家包括:以東、摩押、亞捫、泰爾、西頓等邦國。

時間背景是tī主前601年年底,巴比倫尼布甲尼撒王koh一pái出兵去phah埃及,tī邊界附近,kah埃及發生激烈ê戰爭,結果雙方傷亡慘重。約雅敬王看tio̍h in雙方tī chit pái軍事衝突下lóng受tio̍h重創,心想這是一pái ē-tàng脫離巴比倫統治ê機會。M̄-koh先知耶利米卻傳出chit種信息,ài會猶大國王kah官員繼續順服tī巴比倫帝國ê統治,ē-sái講是當時有真chē假先知一再傳出beh趁此機會走chhōe獨立,in一再鼓勵約雅敬王tio̍h好好á把握chit pái ê機會,因為巴比倫kah埃及雙方ê軍隊tī chit pái戰爭中lóng受tio̍h重創。假眾先知甚至認為這mā是巴比倫帝國滅亡ê一個兆頭。猶大約雅敬王是聽從假眾先知ê話。結果巴比倫王尼布甲尼撒聯合敘利亞、摩押、kah亞捫ê游擊隊,tī主前598年12月重創猶大,約雅敬王被用鎖鍊鎖tiâu,帶到巴比倫去,聖殿裡ê寶物mā被帶到巴比倫王ê王宮(參考歷代志下三十六:6—7)。M̄-koh,尼布甲尼撒王並無以此為滿足,伊認為一定tio̍h嚴厲制裁背叛ê猶大國。

約雅敬ê kiáⁿ約雅斤繼任為猶大王;伊hit時十八歲,上任chiah三個月koh十工,巴比倫王尼布甲尼撒koh一pái派將軍帶兵攻打耶路撒冷城,約雅斤王知影猶大根本無法度抵抗,只有ē-tàng帶老母、kiáⁿ、高級官員投降。尼布甲尼撒王就率軍進入耶路撒冷城,搜刮了王宮ê財寶,並且毀壞所羅門王為聖殿所製造ê一切金器。巴比倫軍隊chit pái ê行動,總共俘虜了一萬gōa名猶大菁英,「只有留落來siōng窮苦ê人」(參考列王記下廿四:10—17)。尼布甲尼撒王立約雅斤ê a叔瑪探雅續接作猶大王,並kā伊改名成做西底家。

Chit一章是先知耶利米用象徵性ê動作,teh表達猶大國一定tio̍h向巴比倫投降,而且m̄-nā是猶大國,包括kah猶大結盟ê幾個附近邦國在內,lóng有得tio̍h先知耶利米ê信息。

Chit段經文有表示上帝確定ê旨意,beh hō͘巴比倫帝國興旺,因為祂揀選巴比倫王尼布甲尼撒為奴僕,為tio̍h是beh懲罰猶大以色列人民(參考廿五:9)。因為án-ne,任何對抗巴比倫王尼布甲尼撒ê動作,mā等於是teh對抗上帝仝款ê愚戇。

第1到3節,「約西亞ê kiáⁿ西底家做王統治猶大國ê初期」,chit-ê時間大約是tī主前594年。西底家應該是約雅敬ê小弟(參考列王記下廿四:17)。西底家王是tī主前597年繼任為猶大王,當時伊是「21歲」(參考列王記下廿四:18)。Chit時上帝ài先知耶利米用「皮袋kah木頭做一個枷擔,掛tī頷頸上」,行過hiah-ê tī耶路撒冷訪問ê外國使節團,hō͘ in看見。Chiah-ê 使節團就是代表「以東王、摩押王、亞捫王、泰爾王,kah西頓王」等。

「枷擔」,是中東地帶ê作穡人用來架tī牛隻ê頷頸上,hō͘伊聽hō͘喚耕犁田地ê一種用具,有時mā會用tī囚犯身中計作鎖枷刑具。先知耶利米用chit種方式beh表達:巴比倫會親像用chit種方式kā列國當囚犯á是動物一般,beh趕逐猶大國以及附近ê國家,會kā in lóng當做囚犯á是被飼養ê耕牛一般,用「枷擔」當做鎖枷來控制並且帶到巴比倫去奴役。

第4到5節,上帝ài先知耶利米kā信息傳hō͘頂面所講chiah-ê tú-teh耶路撒冷kah猶大西底家王商討beh結盟出兵ê大使,並ài in kā上帝hō͘ ê信息「轉達hō͘本國ê君王」。伊傳達ê信息真清楚表明兩項基本認知:一是上帝tùi án-ne「大地」ê「創造」者,「人類kah所有ê動物」lóng是祂創造ê。二是上帝有絕對ê主權,祂「ài kā地交hō͘甚麼人,就交hō͘甚麼人」,因為上帝是萬物之主。

第6到7節,tùi第4到5節ê信息已經真清楚teh說明上帝ê主權chia講上帝決定beh kā頂面所講chiah-ê m̄聽話ê國家kah人民,交hō͘祂揀選出來ê「奴僕巴比倫王尼布甲尼撒」(參考耶利米書廿五:9)管理,「由伊統治」,而且伊ê「kiáⁿ、孫á」lóng會繼續統治一段時間,「直到伊ê帝國衰敗」。

第8節,chit節講出先知耶利米心內siōng大ê痛苦,就是伊一定tio̍h勸家己ê國王、官員、人民接受「臣服巴比倫王尼布甲尼撒」chit種信息,而且iáu提出警告講,若「m̄肯」背負chit種形同囚犯「頷頸上ê枷擔」,上帝會用「戰爭、飢荒,kah瘟疫」懲罰拒絕聽從chit-ê信息ê國家kah人民。

第9到10節,先知耶利米tī chia特別提起「先知、占卜ê、解夢ê、算命ê,kah巫師」等等chiah-ê人,in lóng是冒用上帝ê名講預言teh欺騙人民。伊提出嚴厲警告,甚麼人聽從chiah-ê假信息ê國家kah人民,最後必定會面臨嚴重ê後果,he就是「受掠,遠離家鄉」,被「放ta̍k」流浪到世界各地做奴隸,甚至iáu可能因為án-ne而「被消滅」。

第11節,m̄-koh相對tī第10節所講ê,in若是「臣服」tī巴比倫ê國家kah人民,因為這是上帝ê旨意,in若肯聽從,上帝mā會有應允hō͘ in,就是beh hō͘ in「安居本土,種作家己ê土地」,hō͘ in成做自由ê人民,tī家己ê土地頂面安居樂業。

重新查詢 專卷研經 耶利米書系列
錯誤回報,請聯繫comm[@]fhl.net