耶利米書 26章12節 到 26章24節   背景資料  上一筆  下一筆
Chit段經文是先知耶利米對chiah-ê祭司kah眾先知控告伊ê辯白,mā得tio̍h其中一kóa審案官員kah長老肯定ê回應,這mā表示tī he樣動盪不安ê世代中,m̄是每一個人lóng財迷心竅,喪失良知,iáu是有人願意注意聽上帝忠實奴僕先知傳出ê信息。

Koh講,chit段經文mā提起同是約雅敬王時代,另外一位先知烏利亞因為傳講上帝ê信息,結果被約雅敬王處死,伊ê屍體iáu被tàn tī平民ê墳地,表示侮辱伊。先知耶利米則講家己得tio̍h保護,無遇tio̍h chit種結果。

第12到15節,chit段經文是先知耶利米對控告伊ê事件提出申訴。伊講「上主差我」去「宣佈chiah-ê詛咒聖殿kah chit-ê城ê話」,並m̄是家己亂放話。伊koh一pái呼籲大家一定會「悔改,服從上主」,mā只有án-ne才能挽tńg來á是改變上帝本來beh毀滅ê計畫。伊無在意chiah-ê祭司kah眾先知怎樣羅織罪名控告伊,因為伊是盡上帝先知ê本分。因為án-ne,伊向chiah-ê審問伊ê官員表示無論in ài怎樣對待伊,伊mā bē向in求情。M̄-koh伊mā提出嚴厲ê警告,若是in「殺害」伊,就beh為tio̍h án-ne事「償付殺害無辜者ê血債」,因為伊是「由上主差遣來警告」in ê使者。上帝ê使者被殺害,上帝絕對bē靜默不語。

第16節,tùi chit節thang看tio̍h tī政府官員中,mā有比較khah清楚狀況ê人出來表達意見。In向chiah-ê祭司kah假先知講先知耶利米是「奉上主—咱上帝ê名講話,無應該處死」,這tú好講出兩點:一是in確認先知耶利米真正是奉上帝ê名傳達信息。二是in認為無應該處死上帝ê先知。

第17到19節,m̄-nā是政府官員中有人反對處死先知耶利米,連參與審案ê「長老中間有人」mā khiā起來反對chit項控告案。In講約tī主前715到686年猶大王「希西家」統治ê時,出現一位先知「摩利沙人」彌迦,向王提出上帝hō͘伊ê信息(參考彌迦書三:12),希西家王是因為聽從先知彌迦所傳達ê信息,而且伊是「敬畏上主,得tio̍h上主ê歡心」,並且積極進行宗教改革,「就án-ne上主改變心意,無kā原訂ê災難降tī in身上」,hō͘猶大國tī siōng危困ê時chūn得tio̍h解救。Chiah-ê長老mā提出警告講,「chit-má咱會自招大難ā」,因為in看tio̍h大家疏忽、輕視先知耶利米ê話語,真可能為tio̍h án-ne為國家kah人民帶來大災難。

第20到23節,chit段經文真重要,說明tī先知耶利米仝時代mā有另外一位先知,就是「基列‧耶琳人—示瑪雅ê kiáⁿ烏利亞」,伊mā是「奉上主ê名講預言」,而且所傳出ê預言mā是講猶大kah耶路撒冷會被上帝毀滅ê信息。結果「約雅敬王連同伊ê兵丁kah官員」,teh聽了後「就想刣伊」。Á先知「烏利亞知影了這陰謀」了後,就「驚惶地逃往埃及」去避難。M̄-koh約雅敬王顯然並無放過先知烏利亞,iáu特別派宮廷大官「亞革波ê kiáⁿ以利拿單」到埃及去kā烏利亞帶tńg來猶大交hō͘約雅敬王,約雅敬王果然kā上帝ê奴僕先知烏利亞「處死」,並且iáu「Kā伊ê屍體tàn tī平民ê墳地」。

第24節,比起先知烏利亞,先知耶利米thang講算是好字運ê了,伊因為得tio̍h「沙番ê kiáⁿ亞希甘ê保護」chiah無被處死。

重新查詢 專卷研經 耶利米書系列
錯誤回報,請聯繫comm[@]fhl.net