耶利米書 25章15節 到 25章38節   背景資料  上一筆  下一筆
Chit段經文真清楚是一段非常嚴厲ê警告,講上帝用酒杯kah杯裡ê酒來表示對猶大人民懲罰。Tī前段有記載上帝beh帶領受掠受難ê以色列kah猶大ê人民tńg去故鄉,另外一個同時發生ê事,就是用懲罰hiah-ê欺壓過以色列民族ê列國、族群,作為以色列kah猶大ê人民得tio̍h釋放之方式。Tī先知文獻中,類似chit種譬喻一再出現(參考以賽亞書五十一:17、22,耶利米書四十九:12,撒迦利亞書十二:2)。雖然是teh指tio̍h巴比倫帝國對猶大人民以及耶路撒冷城ê嚴重殘害,m̄-koh,mā thang擴大看做是對所有背叛上帝ê人民,á是國家、族群所提出ê警告。

第15到16節,上帝ài先知耶利米帶上帝hō͘伊「盛滿大受氣ê酒杯」,帶到「各國,hō͘inlim」,hō͘ chiah-ê國家「lim了後會東倒西歪,瘋狂亂撞」,用chit種ná親像酒醉ê人ê樣式,來形容「戰禍」所帶來ê混亂kah殘害之嚴重。Chit種情形ná親像以前上帝懲罰耶路撒冷kah in ê眾領袖仝款(參考耶利米書十三:12—14)。

第17到18節,先知耶利米照上帝ê吩咐,就「tùi上主手上接落這酒杯」,然後kā這盛滿上帝大受氣ê酒杯「交hō͘上主差派」伊去ê各國,「ài in lim」落去。上帝過去用chit種方式懲罰「耶路撒冷、猶大各城鎮,連同in ê君王kah官員」,taⁿ mā用chit種方式懲罰巴比倫kah各國,hō͘ in「成做別人詆毀、唾棄、詛咒ê對象」。所提起ê各國就是tī第四十六到五十一章中所提起ê。
第19到26節,chit段經文中看tio̍h列出來一份真長ê名單,lóng是teh-beh lim這懲罰之杯ê人。值得注意ê是最後一個名單,就是「巴比倫」mā列tī其中。它原本是上帝用來懲罰chiah-ê族群ê「奴僕」,m̄-koh因為巴比倫王自認為有強壯ê軍事武力,是家己ê能力,kah上帝無關係,而m̄聽從上帝ê話,結果引起上帝ê忿怒,終其尾mā tam-tio̍h滅亡ê果子。Ná親像詩人ê詩中講:「上主手上the̍h杯,杯中盛滿伊震怒ê烈酒。伊kā酒傾倒出來;邪惡ê人lóng來lim,直lim到最後一滴。」(詩篇七十五:8)

第27到29節,上帝ài先知耶利米kā chiah-ê被列名單中ê國家講,一定ài in lim下上帝懲罰ê烈酒之杯,而且是beh hō͘ in lim到「醉」了,而且是「嘔吐、跋倒,koh khah án怎都爬bē起來」。聖經作者一再表示:只要上帝命令一出,絕對無可能逃避á是拒絕,卻是「非lim這杯bē-tàng」,除了悔改求上帝赦免以外,別無他途(參考以西結書三十三:11)。上帝講祂beh先毀滅耶路撒冷,然後,上帝用懲罰耶路撒冷城ê方式,來懲罰頂面所講chiah-ê國家。換句話講,上帝既然連家己ê城lóng會án-ne不寬待,koh khah無可能寬待其它ê城鎮、邦國、族群。Á上帝採用ê這苦杯,就是「用戰爭」ê方式,而戰爭所帶來ê已經不止是眾勇士彼此gia̍h刀劍廝刣而已,連帶出現ê乃是全體國民ê iau餓、破病、傷殘、家庭破碎、田野荒廢等。

第30到31節,這是用上帝開庭審判萬國萬民來描述上帝懲罰ê方式。Chia講上帝「tùi天頂發出震怒」,伊beh tùi祂「神聖ê居所發雷霆」而且祂發出怒吼ê聲音,就「像踹葡萄ê人發出ê hoah聲」。以色列人民採收葡萄ê時,beh kek葡萄酒chìn前,一定tio̍h先榨壓葡萄汁,chit時hiah-ê人會一面踩踏葡萄,一面唱詩歌,á是呼喊,hō͘所有參與踩踏葡萄ê工人用一樣ê節奏工作,這mā表示上帝ê懲罰是按部就班,連懲罰lóng真有計畫。因為án-ne,每一個地方ê人「lóng ē-tàng聽tio̍h」。

第32到33節,「災難」kah「大風暴」仝款,是teh指上帝極大ê忿怒ê意思。上帝所列出來ê名單,無一個會遺漏、佳哉免得。因為是懲罰是「tùi一國到另外一國」、「tùi地球ê一頭到另外一頭」,四界lóng會看見「屍體」,m̄-koh無人「收殮埋葬in」,chiah-ê屍體只有ē-tàng當做「肥料堆在地面」,而且會hō͘野獸、飛鳥啄食、吞食。

第34到35節,chia koh一pái提起「人民ê領袖」,其實就是上帝所委派ê「牧者」。In會受tio̍h嚴厲ê懲罰,情景ná親像「公羊被宰」刣仝款,chit種講法tī先知耶利米一再提起(參考十:21、廿二:22)。「連一個mā逃bē過」,意思是teh指無人例外。

第36到37節,因為上帝發出大受氣,ná親像頭前所提起ê,祂beh對所有m̄聽從祂旨意ê人民kah領袖進行懲罰,結果「安逸ê國土成做廢墟」,無任何人ē-tàng tī家己ê土地頂面過安逸ê生活。

第38節,「上主棄sak伊ê子民」,這表示上帝無koh看顧、保守in,失去上帝保守ê人民ê遭遇,就是危害in性命ê氣力隨時可能出現。

重新查詢 專卷研經 耶利米書系列
錯誤回報,請聯繫comm[@]fhl.net