耶利米書 22章24節 到 22章30節   背景資料  上一筆  下一筆
Chit段經文是teh指約雅敬王ê kiáⁿ約雅斤ê問題;伊是tī in父親約雅敬死後繼任為猶大王。當年伊chiah 18歲,統治時間真短,kah約哈斯仝款,只有短短三個月時間。年代是tī主前597年。就tī伊統治短短三個月期間,列王記ê作者mā用chit句話來做評語:「約雅斤仿效in父親ê pháiⁿ模樣,做上主看做邪惡ê事。」伊在位期間雖然短,卻tú-tio̍h巴比倫王尼布甲尼撒親自率大軍攻打耶路撒冷,猶大ê守軍差不多lóng無招架之力,因為án-ne約雅斤只有ē-tàng向巴比倫投降,伊m̄-nā被俘虜,而且「聖殿kah王宮內所有ê財寶lóng搬到巴比倫去」(參考列王記下廿四:13),全國所有ê菁英mā hông掠去巴比倫做奴隸(列王記下廿四:14—16)。

第24節,chia講即使約雅斤是ná親像上帝「正手所帶ê印á手指」hit種重要,chit-má上帝已經決定beh kā伊除掉。

第25到27節,chit三節講tio̍h約雅斤kah伊ê厝內人ê遭遇,m̄是被刣,就是hông掠去做奴隸。Chit段經文根據列王記下第廿四章10到16節ê記載,作者真清楚出,約雅斤siōng驚惶ê就是「巴比倫王尼布甲尼撒kah伊ê軍隊」,這是主前597年,巴比倫王率領軍隊來圍攻耶路撒冷城,約雅斤所有王室人員,包括伊ê母親和kiáⁿ、將領、王宮臣僕等,lóng向巴比倫投降。巴比倫軍隊並且洗劫了聖殿kah宮殿所有貴重物件,並且俘虜了所有國家ê菁英,只chhun siōng窮困ê人民。第27節chit節講約雅斤tùi受掠了後,就無機會koh再「tńg來」故鄉耶路撒冷,這表示伊tī巴比倫一直lóng被當做俘虜到死為止。

不過tùi列王記下第廿五章27到30節ê資料來看,約雅斤算是非常好字運ê,伊tī受掠了後ê「第三十七年十二月二十七日」,被巴比倫王釋放出來,並且被賞賜高位,「得tio̍h允准脫掉囚衣,終生kah巴比倫王同桌進餐」,而且每工lóng有生活費thang the̍h。這表示伊雖然是hō͘擄做奴隸,m̄-koh晚年享受高等ê待遇,已經無koh是俘虜、囚犯á是人質,卻是巴比倫王室ê貴賓,因為伊ē-tàng kah國王同桌共席。值得注意ê是,tī馬太福音記載ê族譜中,約雅斤則被列為正式族譜中,而且講伊ê kiáⁿ傳承譜系(參考馬太福音一:12)。

第28節,以先知耶利米向上帝發出幾個問題:約雅斤是m̄是就是「像一隻破碎、無人ài ê瓶子」?為甚麼連伊ê厝內人「lóng hông棄sak,流放到異鄉去」?其實chit兩個問題thang合併為一個,就是講國家衰弱,君王治國無力。

第29到30節,chia連續提出三pái ê「大地ah」,chia ê「地」,表示先知耶利米所燒熱愛ê國家。先知耶利米講約雅斤王是一個「一事無成ê人」,chiah會有án-ne悲慘ê結果。而且講「伊無後代好繼承大衛ê王位」,chit句話並m̄是講約雅斤無kiáⁿ,因為伊有七個kiáⁿ(參考歷代志上三:17—18),卻是因為尼布甲尼撒俘虜了約雅斤後,立伊ê叔父瑪探雅繼承王位,尼布甲尼撒kā瑪探雅改名成做西底家。換句話講,m̄是約雅斤ê kiáⁿ孫中繼承王位,卻是由伊a叔ê kiáⁿ孫繼承。

重新查詢 專卷研經 耶利米書系列
錯誤回報,請聯繫comm[@]fhl.net