Tùi第10節開始直到chia章結束，是一一數算猶大諸王ê罪狀，mā包括耶路撒冷城ê人民在內。Chit段是關係猶大王約哈斯ê問題。

頭前已經講過chiah-ê王包括約哈斯、約雅敬、約雅斤等。Tī古代，國王kah國家ê關係是分bē開ê，因為án-ne，當上帝對一個國王講出懲罰ê時chūn，mā等於是beh懲罰hit-ê國家仝款。因為án-ne，讀chiah-ê經文ê時會發見國王被掠到它國，mā就是teh表明chit-ê國家已經被敵人phah敗，m̄-nā是國王受掠，人民mā連帶受災。

第10節，「約哈斯」是伊ê御用名號，伊ê本名叫「沙龍」，是約西亞ê第四個kiáⁿ（參考歷代志上三：15），約哈斯繼承in父親約西亞ê王位。約西亞是一位bē-bái ê國王，bat因發見申命記chit本經典，而大力推動宗教改革運動，先知耶利米mā bat參與伊ê改革工作（參考列王記下第廿二到廿三章25節）。可惜，約西亞因為派軍隊投入亞述對抗埃及ê戰爭，tī米吉多被埃及所敗，並且陣亡（參考列王記下廿三：29）。Chit節chia講「m̄-thang為已故ê王啼哭」、「m̄-thang為伊哀悼」，指ê就是chit-ê已故ê王約西亞，因為人民敬愛伊。M̄-koh「beh為伊ê kiáⁿ約哈斯啼哭」，因為伊「仿效伊祖先ê pháiⁿ模樣，做上主看做邪惡ê事」（參考列王記下廿三：32）。換句話講，伊一上任，就摧毀了in父親留落來美好ê信仰典範。結果被埃及王所俘擄，「永遠無法度tńg來，無法度koh再看見家己ê故土」，因為伊後來就死tī埃及（參考列王記下廿三：34）。

第11到12節，chit兩節是重複敘述第10節尾段ê詩歌。