耶利米書 21章1節 到 21章14節   背景資料  上一筆  下一筆
Tùi chit章開始,是記載猶大末期ê一kóa片段,一直到第廿六章24節止。M̄-koh chit段經文中並m̄是照時間順序寫做,其實,kui本耶利米書並m̄是照時間前後排序,卻是kā一kóa事件記述落來,主要teh說明猶大ê君王、領袖,以及人民等,in棄sak上帝ê嚴重情形,以及後來領受tio̍h嚴厲ê懲罰之結果。

Chit一章記載hiah-ê討厭伊、想beh謀害伊性命ê人卻來chhōe伊,請伊協助走chhōe解救京城耶路撒冷被圍困ê危機,看起來猶大beh解救被圍城ê困境真oh,因為án-ne chiah會想tio̍h beh chhōe先知耶利米來幫忙。如果m̄是in已經無計thang施,根本bē chhōe先知耶利米,因為in lóng真討厭伊,連聽lóng無想beh聽伊所講ê話,因為伊所講ê lóng是有關耶路撒冷會hō͘敵人所拆毀ê惡言,人民聽lóng會真oh過,而且認為先知耶利米是teh妖言惑眾,故意製造危機。Tī猶大人民眼中ê先知耶利米,ná親像一個「謠傳四圍恐怖」ê人(參考耶利米書二十:10),因為先知耶利米一直teh傳講耶路撒冷城會被巴比倫帝國所困ê預言。M̄-koh猶大人民硬是m̄聽,in歡喜聽假先知kah祭司所講ê hiah-ê聽來hō͘人感覺良好ê虛假信息(參考耶利米書十四:14)。

Chit章thang分做兩段,第一段是第1到10節,這是tī猶大王西底家ê時代為背景。第二段是第11到14節,這是tī約雅敬做王ê時代。

第1到2節,chia所講ê「巴施戶耳」並m̄是頭前第二十章ê所講ê「音麥ê kiáⁿ,聖殿總監巴施戶耳祭司」,卻是kah第三十八章1到6節ê巴施戶珥仝款。Á chia所提起ê chit位「西番雅祭司」,kah第三十七章3節是仝一個人,in lóng是當時tī耶路撒冷擁有極高ê地位ê人。In奉猶大西底家王ê差遣,去請求先知耶利米代向上帝求救。原因是「巴比倫王尼布甲尼撒正率領軍隊圍困chit-ê城」。M̄-koh這實在是真諷刺ê事,因為in既m̄聽先知耶利米ê苦勸,甚至iáu譏諷伊,mā設計beh殺害伊,chit-má當敵人來圍困首都耶路撒冷ê時,in chiah來請求伊為in向上帝祈求解圍。

第3到7節,chit段經文是上帝ài先知耶利米回應chiah-ê代表國王西底家來請求ê官員ê話。Chit段話真清楚,上帝決定beh摧毀猶大國,而且是用嚴重ê方法作懲罰,包括用「戰火、飢荒,kah瘟疫」等,因為上帝beh「用全部ê氣力,tī忿怒、義忿,kah大受氣之下痛擊」in,然後kā in交hō͘巴比倫王尼布甲尼撒,kah其他想beh殺害in ê敵人,chiah-ê仇敵一點mā「bē憐憫」in。Chit種回應ē-sái講是非常嚴厲,差不多無轉圜ê餘地。恐驚tio̍h猶大全國頂下lóng以真誠ê心懺悔認罪chiah有可能得tio̍h上帝ê拯救。

第8到10節,「上主kā活路死路lóng pái tī lín面前」,這是一種性命ê選擇,看是beh生,是beh死,並無中間ê路thang chhōe。Chia清楚講出,只有投降chiah是生路,抵抗ê,一定會tú-tio̍h「戰死、餓死、病死」ê結果,m̄-koh chiah-ê顯然m̄是西底家王kah伊ê臣僕想beh聽ê話。這是因為上帝決定beh「懲罰chit-ê城,毀滅chit-ê城」,kā chit-ê城kah人民「交hō͘巴比倫王」。

第11節,chia特別提起「大衛後代」,mā就是「王室」ê人tio̍h注意聽上帝ê話。上帝要求in一定tio̍h「ta̍k工」想tio̍h公義ê行為,因為這是上帝hō͘人性命siōng大ê恩典,忽略chit種事,就是忽略上帝ê恩典。Chia所謂「ta̍k工」,意思是teh指每工siōng重要ê第一件事,就是beh「tùi欺壓者手中解救被壓迫ê人」,這是成做一個公義ê君王á是社會領袖應該有ê使命kah責任。Mā是上帝揀選ê奴僕beh盡ê義務(參考創世記十八:19,以賽亞書四十二:1、6,阿摩司書五:24,彌迦書六:8)。如果īnm聽從上帝chit種命令,一定會惹上帝受氣。

第13到14節,chit兩節是先知耶利米針對耶路撒冷城ê居民所傳出ê信息。先知耶利米kā當時ê耶路撒冷人民講,即使hit-ê城地勢險要,上帝若是伸手來攻擊,mā無人ē-tàng抵擋。會án-ne講是因為耶路撒冷城ê人民可能認為in有佔優勢ê地理環境,kah堅固ê城牆thang做為軍事屏障,無人ē-tàng攻破in ê城牆。過去tòa hia ê耶布斯人就是bat án-ne誇口,講大衛帶軍隊來攻打,in只需要派出「盲人kah跛子」也ē-tàng phah敗大衛(參考撒母耳記下五:6),m̄-koh上帝kah大衛同在,雖然耶路撒冷城座落tī險要ê山丘上,iáu是hō͘大衛攻打落來。Taⁿ上帝beh成做耶路撒冷城ê敵人,就算有koh再顯要ê地理要件,mā無用。

重新查詢 專卷研經 耶利米書系列
錯誤回報,請聯繫comm[@]fhl.net