耶利米書 2章1節 到 2章13節   背景資料  上一筆  下一筆
Tùi第二章開始直到第六章,chit段經文是記載先知耶利米tī約西亞王執政時代(主前639~608年)所傳講ê信息(參考耶利米書三:6),而chiah-ê信息差不多大是tī主前626到621年間ê狀況。主要ê內容就是猶大悖逆上帝ê旨意,必定會引起上帝ê忿怒而hō͘ in受外族入侵ê懲罰。

Chit段經文是上帝透過先知耶利米teh回顧過去ê歷史,hō͘ tòa tī耶路撒冷ê猶大人民知影,過去tī曠野漂流ê日子裡,上帝kah in之間ê關係是jōa-ni̍h-á ê甜蜜、恩愛。M̄-koh chit-má in竟然背叛上帝,棄sak上帝,bē記得上帝過去對in ê疼。先知耶利米透過chit段詩歌ài in回想祖先過去tī曠野ê時代,是án怎領受tio̍h上帝ê恩典,chit-má in又koh是怎樣背叛上帝。這mā teh說明一個中心信息:是人棄sak了上帝,卻m̄是上帝棄sak人;mā是因為人棄sak了上帝,chiah hō͘上帝感覺非常傷心。

第1到2節,chia一開始就講上帝ài先知耶利米「向耶路撒冷ê居民án-ne講」,上帝「會記得」猶大人民之間所立ê「約」,而上帝會永遠守tiâu chit-ê約。Chia特別強調當年tī曠野流浪ê時,猶大人民kah上帝之間ê關係是ná親像「蜜月」般ê「情深」。

第3節,chit節講猶大人民是「專屬tī」上帝,因為án-ne hō͘人看做是「神聖ê子民」,是聖潔ê。為tio̍h beh保護猶大人民,上帝hō͘ in chit種應允:「甚麼人傷害你,我就降災禍hō͘甚麼人。」表示上帝絕對不允准猶大人民受tio̍h任何傷害,ná親像in tī曠野漂流時代,上帝親自手帶領in行過每段路徑仝款。

第4到5節,chit兩節記載上帝teh控訴猶大人民背叛,指出in「去跟tòe虛無ê偶像」,mā因為án-ne mā「hō͘家己成做虛無」。這「虛無」,表示「lóng無價值」ê意思,chit-ê詞kúi-nā pái出現tī先知耶利米書中,用來形容假ê神明(參考八:19、十:3、15、十六:19、五十一:18)。先知耶利米用chit種詞句,其實mā是teh表達一個基本ê觀念:做一個人去拜「虛無」、「lóng無價值」ê偶像神明ê時,其結果mā是hō͘家己變kah「虛無」、「lóng無價值」。

第6到7節,chit兩節真清楚提起是上帝救猶大人民「脫離埃及」後,koh帶領in進入「荒野」,然後koh再chhōa in進入「肥ê土地」,這土地是teh指迦南地,mā hông稱做「流奶kah蜜」之地(參考出埃及記三:17、十三:5,利未記二十:24,申命記六:3、廿六:9,耶利米書十一:5、三十二:22)。M̄-koh猶大人民m̄-nā m̄-chhap上帝,mā kā上帝賞賜hō͘ in he美好肥ê土地hō͘「糟蹋」、「污染」了,這用詞真清楚表示猶大人民tī上帝賞賜hō͘ in美好ê土地頂面,去拜偶像神明,棄sak了上帝。

第8節,chit節thang看出猶大人民犯罪ê嚴重性,chia提起三種代表者帶頭犯罪,chiah-ê人包括「祭司」,是上帝ê奴僕,in是特別揀選出來,專門teh帶領人敬拜上帝;iáu有「統治者」,這是teh指國家君王、社會領袖(參考耶利米書廿三:1—4),mā thang做「牧者」;koh khah嚴重ê是「先知」,in是上帝ê奴僕,tio̍h聽從上帝ê命令去傳信息。M̄-koh chit-má是連「先知奉巴力ê名講預言」,而「巴力」是迦南地人民所事奉ê神明,是虛假ê神,先知若是奉它ê名講話,就是講不誠實、欺騙ê話。

第9到11節,上帝beh「控告家己ê子民」,chit種寫法是用法庭開庭審案ê方式呈現,表明上帝並m̄是捏造罪狀,卻是thang kah被告公開辯論。Koh講,「控告」ê另外一個意義,是teh指審判,是上帝開庭beh審判悖逆ê子民。Chia講beh「指控in ê後代」,這是teh指雅各ê kiáⁿ孫。上帝ê指控並m̄是無ê放矢,卻是有實據ê,上帝講ài in去「基提島」、「基提」chit兩所在看māi,意思是到世界各地觀察,這說明猶大人民棄sak上帝ê chit種行為,比全世界上任何民族lóng koh khah惡質。因為猶大人民m̄-nā無珍惜上帝賞賜hō͘ in ê榮耀,反tńg是kā chit份榮耀歸hō͘ hiah-ê虛假、lóng無作用ê神明身上。Chit點hō͘上帝感覺被嚴重侮辱。

第12到13節,因為án-ne,上帝決定ài beh進行懲罰,方式是「beh hō͘諸天戰慄驚惶」,這是teh指上帝beh邀請所有ê「天」lóng來出庭,祂beh指控猶大人民。Á當上帝公開指控猶大人民ê時,所有聽tio̍h ê人lóng會「驚惶失措」,因為猶大人民是上帝親自揀選ê,in原本是siōng脆弱ê一個小國、民族(參考申命記七:7),因為有上帝ê帶領,chiah hō͘ in成做世界上siōng強ê國家kah民族。上帝指控猶大人民是犯「雙重ê罪」,因為án-ne,上帝beh加倍嚴重ê懲罰in,m̄-nā hō͘ in無法度chhōe-tio̍h水泉,mā挖掘bē-tio̍h thang蓄水ê池á。這必定會hō͘ in痛苦萬分。
重新查詢 專卷研經 耶利米書系列
錯誤回報,請聯繫comm[@]fhl.net